REGİONLAR
Astarada payız-qış mövsümünə hazırlıqla əlaqədar görülən işlər müzakirə edilib
Astara, 29 sentyabr, Bağır Əliyev, AZƏRTAC
Astara Rayon İcra Hakimiyyəti başçısı yanında Şura iclasında payız-qış mövsümünə hazırlıqla əlaqədar görülən işlər və qarşıda duran vəzifələr müzakirə edilib.
AZƏRTAC-ın bölgə müxbiri xəbər verir ki, yığıncaqda çıxış edən rayon icra hakimiyyətinin başçısı Qəzənfər Ağayev payız-qış mövsümündə əhalinin istilik və elektrik enerjisinə tələbatının ödənilməsinin qarşıda duran ən mühüm vəzifələr olduğunu bildirib. Payız-qış mövsümünə hazırlıqla əlaqədar şəhər, qəsəbə və kənd inzibati ərazi dairəsi üzrə nümayəndəliklərdə, idarə, müəssisə və təşkilatlarda müəyyən işlərin görüldüyünü vurğulayan Q.Ağayev bu sahədə zəruri tədbirlərin həyata keçirilməsi istiqamətində işlərin davam etdirildiyini diqqətə çatdırıb.
İclasda rayon icra hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri İlqar Malıyevin məruzəsi dinlənilib. Qeyd olunub ki, payız-qış mövsümünə hazırlıqla əlaqədar 35/10 kilovoltluq Ərçivan və Pensər yarımstansiyalarında təmir işləri aparılıb, 35 kilovoltluq hava xətlərində 15 ədəd dayaq basdırılıb, 96 ədəd yeni izolyator quraşdırılıb. Astara şəhər, Ərçivan və Kijabə qəsəbə, Səncərədi, Pensər, Təngərüd, Asxanakəran, Hamoşam, Şahağac və Şiyəkəran kənd inzibati ərazi dairəsi üzrə nümayəndəliklərdə 10 və 0,4 kilovoltluq hava xətləri üzrə, ümumilikdə, 263 ədəd yeni dayaq basdırılıb, 10315 metr naqil yenisi ilə əvəz olunub, 390 ədəd izolyator dəyişdirilib. Astara şəhərində elektrik enerjisinin keyfiyyətini yaxşılaşdırmaq məqsədilə çılpaq hava xətlərinin yeni SİP markalı kabellə əvəz olunmasına başlanılıb.
Diqqətə çatdırılıb ki, rayon Qaz İstismar İdarəsinin Astara xidməti sahəsi üzrə doqquz ayda 262 evin qazlaşdırılması həyata keçirilib. Rayon ərazisində xidməti sahənin daxili imkanları hesabına 10400 paqonmetr müxtəlif diametrli qaz xətlərində təmir bərpa işləri aparılıb. 262 ədəd qaz sayğacı quraşdırılaraq istifadəyə verilib, rayon üzrə quraşdırılmış sayğacların ümumi sayı 17110-a çatdırılıb. Astara şəhərinin qaz xətlərinin əsaslı təmiri və birpilləli sistemə keçirilməsi ilə əlaqədar 3140 paqonmetr müxtəlif diametrli qaz xətləri yenisi ilə əvəz edilib, 262 ədəd fərdi qaz tənzimləyici quraşdırılıb.
Payız-qış mövsümünə hazırlıqla əlaqədar Lənkəran Regional Meşə Təsərrüfatı Mərkəzinin Astara Meşəbəyliyində quru və yıxılmış ağaclardan qış mövsümü üçün 433 kubmetr həcmində odun yanacağı tədarük edilib. Hərbi hissələr, rayonun ucqar dağ kəndlərində yaşayan sakinlər odun yanacağı ilə təmin olunub. Rayonun 12 məktəbinə dizel yanacağı, 28 məktəb isə odun yanacağı verilib. Mövsümə hazırlıqla əlaqədar Şiyəkəran kənd və şəhər 2 nömrəli uşaq bağçalarında cari təmir işləri aparılıb.
Mənzil Kommunal Təmir-Tikinti İstehsalat Birliyi tərəfindən şəhərin küçələrində küvetlər məişət tullantılarından təmizlənib, ictimai yaşayış binalarında tüstü bacalarının təmizlənməsi işlərinə başlanıb.
Müzakirələrdə çıxış edənlər payız-qış mövsümünün başlanması ilə əlaqədar görülmüş işlərdən danışaraq, mövcud problemlər və qarşıda duran vəzifələrlə bağlı təkliflərini bildiriblər.
Yığıncağı yekunlaşdıran rayon icra hakimiyyətinin başçısı Qəzənfər Ağayev payız-qış mövsümündə əhalinin dayanaqlı və fasiləsiz elektrik enerjisi, təbii qaz və odun yanacağı ilə təmin olunmasında qarşıda duran vəzifələrdən danışaraq, əsas diqqəti bu sahədə mövcud olan problemlərə və yol verilən nöqsanlara yönəldib.
Qeyd olunub ki, rayonda suvarma kanallarının əhali tərəfindən zəbt olunması və buraya müxtəlif tullantıların atılması payız və qış mövsümündə bir sıra problemlər yaradır. Rayon ərazisindən Xəzər dənizinə axan çayların zibillənməsi, dəniz sahilinin müxtəlif tullantılarla çirkləndirilməsi yolverilməzdir. Dağlıq ərazidə yerləşən yaşayış məntəqələrinə çəkilən yeni yolların mühafizəsi daim diqqət mərkəzində olmalıdır.
İclasda mövcud problemlərin aradan qaldırılması üçün aidiyyəti idarə, müəssisə və təşkilat rəhbərlərinə tapşırıqlar verilib.
Sonda rayon icra hakimiyyətinin hüquq şöbəsinin müdiri Bəsti Əliyevaya “Dövlət qulluğunda fərqlənməyə görə” medalı təqdim edilib.