REGİONLAR


Astaranın Ərçivan qəsəbəsindəki məscidin yaşı 500 ildən çoxdur

Astara, 18 yanvar, Bağır Əliyev, AZƏRTAC

Azərbaycanın ən qədim məscidlərindən biri Astara rayonunun Ərçivan qəsəbəsində yerləşir.

AZƏRTAC-ın bölgə müxbiri xəbər verir ki, Məhəmməd Hənəfiyyə məscidi kimi tanınan bu tarixi abidənin yaşı 500 ildən çoxdur.

Kənd sakinlərinin sözlərinə görə, əsası 1499-cu ildə qoyulmuş məscidin divarları bişmiş kərpicdən hörülmüş, döşəməsi qırmızı kərpicdən, tavanı isə taxtadandır. Sonralar dağıntılara məruz qalmış bu tarixi abidənin özülü üzərində yeni məscid tikilib. Məscidin tikintisində diqqəti cəlb edən amillərdən biri də odur ki, bu ibadətgahın özülü qibləyə deyil, əks istiqamətdə qazılıb.

Məscid kişilərin və qadınların ayrıca ibadət etməsi məqsədilə iki hissədən ibarətdir. Binanın dam hissəsində azan vermək üçün 7 pilləli ağac materialından, hündürlüyü 3 metr olan minarə tikilib. Əvvəllər məscid iki mərtəbədən ibarət olub.

Tarixi məlumatlara görə, Şah İsmayıl Xətai bu məsciddə namaz qılıb. Səfəvilər dövlətinin gələcək banisi, balaca İsmayıl Ağqoyunlu Rüstəm padşahın təqiblərindən qorunmaq üçün 6 il Lahicanda yaşayıb, 1499-cu ilin avqustunda isə tərəfdarlarının müşayiətilə Astara rayonunun Ərçivan kəndinə gələrək, 1499-1500-cü ilin qışını burada keçirib.

Hazırda Məhəmməd Hənəfiyyə məscidi XIX əsr memarlıq abidəsi kimi dövlət qeydiyyatına alınıb və qorunur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.