İQTİSADİYYAT


Auditorlar Palatası ilə İmtiyazlı Sertifikatlaşdırılmış Mühasiblər Assosiasiyası arasında əməkdaşlıq məsələləri müzakirə olunub

Bakı, 23 iyun, AZƏRTAC

Müstəqil maliyyə nəzarəti sahəsində mütərəqqi dünya təcrübəsini öyrənmək və milli iqtisadiyyatın xüsusiyyətlərini nəzərə almaqla ölkəmizdə tətbiqini genişləndirmək və beynəlxalq təcrübədən daha səmərəli bəhrələnmək məqsədilə iyunun 23-də Azərbaycan Respublikasının Auditorlar Palatası ilə İmtiyazlı Sertifikatlaşdırılmış Mühasiblər Assosiasiyası (ACCA) arasında yenilənmiş Anlaşma Memorandumunun imzalanmasına dair tədbir keçirilib.

AZƏRTAC xəbər verir ki, tədbirdə Auditorlar Palatasının sədri, professor Vahid Novruzov, icraçı direktor Səbuhi Gülməmmədov, Aparatın rəhbəri Qəşəm Bayramov, Palata sədrinin müşaviri, Beynəlxalq əlaqələr və xarici təşkilatlarla iş üzrə komitənin sədri Fəqan Qarayev, Palata sədrinin elmi-metodik məsələlər üzrə müşaviri Nəcəf Talıbov, Maliyyə və texniki təminat idarəsinin rəisi Vəli Rəhimov, Palatanın üzvləri – “KPMG Audit Azərbaycan” MMC-nin direktoru Nəsibə Muradxanova, “BDO AZƏRBAYCAN” MMC-nin Audit üzrə tərəfdaşı İrina Litvinçik, ACCA-nın Türkiyə, Azərbaycan, Gürcüstan və Əfqanıstan ölkələri üzrə regional rəhbəri Filiz Demiröz, Bazarın inkişafı və genişləndirilməsi üzrə meneceri Ülgen Kıymık Coşkun iştirak ediblər.

Tədbiri giriş sözü ilə açan Vahid Novruzov qeyd edib ki, hələ 2007-ci ilin iyunun 20-dən iki peşəkar qurum arasında imzalanmış Anlaşma Memorandumuna əsasən əməkdaşlığa başlanılıb və bu əlaqələr ildən–ilə möhkəmləndirilib. Belə ki, ötən dövr ərzində ACCA-nın müxtəlif ranqlı təmsilçiləri Auditorlar Palatası tərəfindən təşkil edilmiş və keçirilmiş beynəlxalq tədbirlərdə mütəmadi olaraq yaxından iştirak və çıxış edib, audit və mühasibatlıq sahəsində peşənin inkişafına dair dəyərli fikirlər səsləndiriblər.

O vurğulayıb ki, 2019-cu il iyunun 13-də Azərbaycanın Auditorlar Palatası və ACCA arasında yenilənmiş Anlaşma Memorandumu imzalanıb və əməkdaşlığın belə bir inkişaf trayektoriyası tədris standartlarımızın daha da yüksək səviyyəyə qaldırılmasında mühüm əhəmiyyət kəsb edir: “Biz ACCA üzvləri ilə sıx əməkdaşlıq edirik, onları təlimçi qismində seminarlara, ixtisasartırma proqramlarına dəvət edirik, müxtəlif işçi qruplarında onların peşəkar təcrübəsindən və biliklərindən faydalanırıq. Biz maraqlıyıq ki, Auditorlar Palatasının üzvləri sırasında ACCA-nın akkreditasiyasını keçmiş və müvafiq sertifikatlara yiyələnmiş auditorların sayı mümkün qədər çox olsun”.

Daha sonra Vahid Novruzov auditor peşəsinin inkişafı və onun keyfiyyətinin artırılması, korrupsiyaya, çirkli pulların yuyulmasına və kölgə iqtisadiyyatına qarşı mübarizədə mütərəqqi beynəlxalq təcrübənin öyrənilməsi və yerli qanunvericilik nəzərə alınmaqla ölkəmizdə tətbiqinin müasir çağda böyük əhəmiyyət daşıdığını vurğulayaraq, ACCA ilə bu istiqamətlərdə əməkdaşlığın daha da gücləndirilməsinin zəruriliyini tədbir iştirakçılarının nəzərinə çatdırıb.

Tədbirdə ACCA-nın Türkiyə, Azərbaycan, Gürcüstan və Əfqanıstan ölkələri üzrə regional rəhbəri Filiz Demiröz çıxış edərək yüksək qonaqpərvərliyə görə Palatanın rəhbərliyinə öz təşəkkürünü bildirib və özünü doğma Azərbaycanda öz vətənindəki kimi hiss etdiyini vurğulayıb.

F.Demiröz ACCA-nın Azərbaycanın Auditorlar Palatası ilə uzunmüddətli əməkdaşlığından söz açıb və bildirib ki, hər iki qurum arasında çox sıx əlaqələr mövcuddur, birgə layihələrin, eyni zamanda, peşəkar kadrların yetişdirilməsi istiqamətində tədbirlərin həyata keçirilməsi buna bariz nümunədir. ASSA rəsmisi bugünkü Anlaşma Memorandumunun yenidən imzalanmasının mövcud əməkdaşlığın yeni innovativ metodlardan istifadə etməklə əlaqələrin uğurlu davamına yeni nəfəs gətirəcəyini qeyd edib və hər iki quruma bu istiqamətdə uğurlar diləyib.

Sonra Auditorlar Palatası və ACCA arasında yenilənmiş Anlaşma Memorandumu imzalanıb.

Tədbirdə, həmçinin memorandumdan irəli gələn məsələlər, gələcək əməkdaşlıq perspektivləri, ACCA-nın tamhüquqlu üzvlərinin auditor adı almaq üçün keçirilən imtahanların müvafiq modullarından azad olması mexanizmləri, ACCA-nın Davamlı Peşə İnkişafına dair təlim materiallarının əldə edilərək Palatanın üzvlərinə və assistentlərə tədris olunması istiqamətində tədbirlərin həyata keçirilməsi, Azərbaycanın Auditorlar Palatasının ACCA-nın İmtiyazlı Təlim Tərəfdaşı statusunu əldə etməsi imkanları və ümumilikdə ölkədə auditor peşəsinin inkişafı sahəsində əməkdaşlığın gücləndirilməsi məsələləri barədə iştirakçılar tərəfindən ətraflı müzakirələr və geniş fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.