İDMAN
Avropa Azərbaycan Cəmiyyətinin direktorunun “Peace and Sport” təşkilatının saytında məqaləsi dərc edilib
Bakı, 19 iyul, AZƏRTAC
Avropa Azərbaycan Cəmiyyətinin (TEAS) direktoru Lionel Zetterin “Peace and Sport” təşkilatının internet saytında “Azərbaycan öz idmanını qaçqın və məcburi köçkünlərin inteqrasiyası üçün necə istifadə edir” sərlövhəli məqaləsi dərc edilib.
TEAS-dan AZƏRTAC-a verilən məlumata görə, məqalədə azərbaycanlı qaçqın və məcburi köçkünlərin cəmiyyətə inteqrasıya olunmasında idmanın rolundan bəhs edilir.
Qeyd olunur ki, BMT tərəfindən təsis edilmiş 20 iyun - Ümumdünya Qaçqınlar Günü bizə İraq və Suriyada aparılan müharibələr nəticəsində bu yaxınlarda Avropaya axan qaçqınlar selini xatırladıb. Bu siyasi gündəmdə təhlükəsizliyi zədələmədən qaçqınlara humanitar yardımın göstərilməsi məsələsi yenidən gündəmə gətirib. Bu an Azərbaycanın idmandan qaçqın və məcburi köçkünlərin inteqrasiyası üçün istifadə etməsi yada düşür.
Diqqətə çatdırılıb ki, 25 ildən çoxdur davam edən Ermənistan-Azərbaycan, Dağlıq Qarabağ müharibəsi nəticəsində doğma yurdlarından didərgin düşmüş bir milyona yaxın qaçqın və məcburi köçkünü sosial-məişət şəraitinin yaxşılaşdırılması istiqamətində mühüm tədbirlər görür. Qaçqın və məcburi köçkün düşərgələri ölkənin bir çox ərazisində salınıb. Təəssüf ki, bütövlükdə yeni nəsil belə bir çətin şəraitdə doğulub. “Qarabağ” yerli futbol komandası bu münaqişənin faciəvi nəticələrinə bir nümunədir. Bu klub ev oyunlarını əvvəllər Ağdamda keçirirdi. İndi bu şəhər işğal altındadır. Klub isə dünyada çox nadir qaçqın futbol klublarındandır. Böyük çətinliklərə baxmayaraq, bu futbol komandası indi UEFA Çempionlar və Avropa liqalarında uğurla çıxış edir.
Avropa ilə Azərbaycan arasında iqtisadi, elmi və mədəni sahələrdə körpülər salmağa çalışan TEAS-ın direktoru xüsusi vurğulayıb ki, Azərbaycandakı hökumət və qeyri-hökumət təşkilatlarının təşəbbüsü ilə qaçqın və məcburi köçkünlərin inteqrasiyasında idmanın imkanlarından geniş istifadə olunur: “İdmanın rolu Azərbaycanda çox ciddi qəbul edilir. Gənclər və İdman Nazirliyi Sovet İttifaqının süqutundan sonra Azərbaycanda yaradılmış ilk nazirliklərdəndir. Bu nazirlik münaqişənin nəticələrindən əziyyət çəkən gənclərin inkişaf etdirilməsi zərurətindən yaranıb. Hesablamalara görə, Azərbaycandakı qaçqın və məcburi köçkünlərin 30 faizdən artıq hissəsini yaşı 25-dən az gənclər təşkil edirdilər. 1997-ci ildən Azərbaycan Milli Olimpiya Komitəsinə rəhbərliyi şəxsən Azərbaycan Prezidenti İlham Əliyev özü edir. Bu, Azərbaycan Prezidentinin idmana verdiyi önəmin göstəricisidir. Məhz onun sayəsində 2015-ci ildə Beynəlxalq Olimpiya Komitəsinin himayəsi altında Azərbaycanda birinci Avropa Oyunları, 2016-cı ildə isə Bakıda ilk dəfə olaraq Formula-1 yarışı keçirilib”.
Müəllif bildirib: “İdmanın müalicəvi təsirini nümayiş etdirən faktlardan biri də odur ki, Ermənistan və Azərbaycan qoşunlarının təmas xəttində gərginliklərə baxmayaraq, Ermənistan komandası Azərbaycanda keçirilən Avropa Oyunlarında heç bir xoşagəlməz hal olmadan iştirak edib. Bundan əlavə, qaçqın və məcburi köçkünlərin həyat şəraitinin yaxşılaşdırılması üçün 2001-2015-ci illər arasındakı dövrdə Azərbaycanda 100-dək yaşayış məntəqəsi salınıb. Bu qəsəbə və şəhərciklər ən müasir sosial və texniki infrastruktur ilə təchiz ediliblər. Məktəb və tibb mərkəzləri ilə yanaşı, bu yaşayış məntəqələrində 2 Olimpiya Kompleksi (Ağdam-Quzanlı və Füzuli rayonları) və 14 idman mərkəzi tikilib. Azərbaycanlı qaçqın və məcburi köçkünlərin doğma torpaqlarına dinc və təhlükəsiz qayıdışına nail olmaq üçün idmandan geniş istifadə edilir”.
Bildirilib ki, Avropa Azərbaycan Cəmiyyəti sosial inteqrasiyanın yaxşılaşdırılması və sülhün bərqərar olunması üçün geniş istifadə olunan mədəni və idman tədbirlərinə xüsusi diqqət yetirir. TEAS Azərbaycanda və bütün dünyada qaçqın və məcburi köçkünlərin taleyinə diqqəti cəlb etmək üçün son illər çoxsaylı idman yarışlarının təşkilatçısı olub. Məsələn, Cəmiyyət 3600 tamaşaçının iştirakı ilə Londonda ümumdünya qaçqın və məcburi köçkünlərin “Arsenal əfsanələri” komandasının oyunçuları ilə futbol oyununu təşkil edib. Oyundan əldə olunan vəsait Britaniyanın əsas xeyriyyə cəmiyyətlərindən olan Qaçqınlar Şurasına bağışlanıb.
Avropa Azərbaycan Cəmiyyəti, həmçinin dünya şöhrətli “Repton” boks klubu ilə Azərbaycanın “Qəbələ” idman klubu arasında Şərqi Londonda keçirilmiş xeyriyyə boks yarışının təşkilatçısı kimi çıxış edib. TEAS ağır çəkidə boks üzrə dünya çempionu olmuş Frenk Bruno, idmandan uzaqlaşmış İngiltərə futbol yığmasının sabiq kapitanı Toni Adams və yüngül atletika əfsanəsi Mo Farah kimi böyük idmançıların dəstəyini təmin edib. Somalidən qaçqın olan Mo Farah idmanın onun taleyində oynadığı mühüm rolu etiraf edir.
Avropa Azərbaycan Cəmiyyətinin sülhün bərqərar olmasında və inteqrasiyanın inkişafında idmanın istisna rolunu qəbul edərək, 2016-cı ildə “One Step for Peace” xeyriyyə kampaniyasına 20 min avro bağışlamaqla “Peace and Sport” doqquzuncu beynəlxalq foruma dəstək olub.
“Peace and Sport”un fəaliyyəti böyük amallara xidmət etdiyi üçün qeyri-hökumət təşkilatlarının atdığı kiçik addımlar bu məqsədə öz töhfələrini vermiş olurlar. Biz şahzadə əlahəzrət II Albertin himayəsi altında Joel Bouzou tərəfindən idarə edilən bu strukturda iştirak etməyimizlə qurur duyuruq. Təəssüf ki, müharibə idmanda uğur əldə edə biləcək gənc nəsli məhv etmək gücünə malikdir. “Peace and Sport” kimi təşkilatların köməyi ilə belə halların baş vermə ehtimalı azalır”, - deyə məqalədə qeyd olunub.