ELM VƏ TƏHSİL


Avropa Azərbaycan Məktəbi: Natiqlik müsabiqəsinin qalibləri elan olunub

Bakı, 12 noyabr, AZƏRTAC

Avropa Azərbaycan Məktəbinin (AAM) təşkilatçılığı ilə məktəblərarası “AAM-2019 Bakı natiqlik müsabiqəsi” keçirilib.

AAM-dən AZƏRTAC-a bildirilib ki, müsabiqədə Bakının müxtəlif məktəblərinin 11-18 yaşlı şagirdləri yaradıcı natiqlik, bədahətən natiqlik və şifahi şərh olmaqla üç istiqamətdə bacarıqlarını sınayıblar. Şagirdlər “Dəyişən dünya” mövzusunda öz yaşlarına uyğun qlobal məsələlərə münasibət bildirərək, müxtəlif məktəblərdən olan həmyaşıdları ilə akademik yazı və natiqlik üzrə bilik və bacarıqlarını nümayiş etdiriblər.

Tədbirdə Bakının 6 məktəbi üzrə 54 şagird iştirak edib. Müsabiqə iştirakçıları iki yaş kateqoriyasında, 11-15 yaş və 15-18 yaş qrupları üzrə yarışıblar və hər məktəb iki komanda ilə təmsil olunub.

“Yaradıcı natiqlik” kateqoriyası üzrə şagirdlər seçdikləri mövzu üzrə nitq hazırlayıblar. Bu kateqoriya üzrə iqlim dəyişikliyi, ailə dəyərləri, uşaq əməyi, nəsillərarası münasibətlər mövzusunda çıxışlar dinlənilib. Müsabiqədə bütün yaş qrupları üzrə şagirdlər iştirak ediblər.

“Bədahətən natiqlik” kateqoriyası üzrə aşağı sinif şagirdləri iştirak ediblər. Onların təhliletmə qabiliyyətini yoxlamaq üçün münsiflərin tərtib etdiyi siyahıdan bir ideya verilir və şagirdlər 90 saniyə ərzində onu təhlil edərək, üç dəqiqəlik bir nitq söyləyirlər. İdeyalar müasir gənclər arasında geniş müzakirə olunan mövzular arasından seçilərək, təşkilatçılar tərəfindən əvvəlcədən müəyyənləşdirilib.

“Şifahi şərh” kateqoriyası üzrə müsabiqədə yuxarı sinif şagirdləri iştirak ediblər. Bu kateqoriyada yarışan şagirdlərə 5 dəqiqəlik yazılı nitq hazırlamaq tapşırılıb. Nitqi hazırlamaq üçün 20 dəqiqə vaxt verilib.

Müsabiqədə Avropa Azərbaycan Məktəbinin, “Dünya” məktəbinin, TİSA (The İnternational School of Azerbaijan), Bakı Oksford Məktəbinin, “British School in Baku” və T.Həsənov adına 23 nömrəli tam orta məktəbin şagirdləri iştirak ediblər.

Sonra qaliblər elan olunub. Birinci yerə TİSA, ikinci yerə Baku Oksford Məktəbi, üçüncü yerə isə “British School in Baku” məktəbləri layiq görülüb.

Müsabiqənin yekununda qaliblərin mükafatlandırma mərasimi keçirilib.

Avropa Azərbaycan Məktəbinin direktoru, Əməkdar müəllim Asif Cahangirov qalibləri təbrik edib. O, belə müsabiqələrin şagirdlərin dünyagörüşünün formalaşmasında, bilik və bacarıq mübadiləsində əvəzsiz rolundan danışıb.

Sonda qaliblərə medallar və sertifikatlar təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.