İDMAN
Avropa və dünya çempionu Vüqar Əzimov: Qazandığım uğurlar məni yeni qələbələrə həvəsləndirir
Bakı, 2 avqust, AZƏRTAC
İdmana gəlişimdə atamın böyük rolu olub. Dörd yaşımdan idmanla məşğul oluram. Qazandığım nailiyyətləri atama borcluyam. İdmanı sevməyimdə onun rolu danılmazdır.
Bu sözləri qarışıq döyüş növləri (MMA) üzrə dəfələrlə Avropa və dünya çempionu Vüqar Əzimov AZƏRTAC-a məxsusi müsahibəsində deyib.
Bir müddət əvvəl Antalyada təşkil olunan dünya çempionatında çıxışından danışan V.Əzimov bildirib ki, mundialda dünyanın ən güclü idmançıları mübarizə aparıb. Rəqiblərim çox güclü idilər. İlk görüşümü qazaxıstanlı idmançıya qarşı keçirdim. Növbəti mərhələdə Rusiya təmsilçisi ilə üz-üzə gəlməli idim. Ancaq rusiyalı idmançı zədələndiyi üçün görüşə çıxmaqdan imtina etdi və texniki qələbə qazandım. Final görüşündə özbəkistanlı rəqibimlə döyüş çox gərgin keçdi. Xal hesabı ilə qalib gələrək növbəti dəfə dünya çempionu adına sahib oldum.
“Oktyabrda Polşada peşəkarlar arasında beynəlxalq turnirdə iştirak edəcəyəm. Artıq yarışın hazırlığına start vermişəm. Turnirə Azərbaycan Savat və Şaolin Döyüş Sənətləri Federasiyasının prezidenti, Əməkdar məşqçisi Rafiq Əliyevin rəhbərliyi ilə hazırlaşıram. R.Əliyevin dəstəyini həmişə hiss etmişəm. “Kapital Bank”ın rəhbərliyi isə bu yarışda iştirakıma kömək edəcək. Bunun üçün onlara öz təşəkkürümü bildirirəm. Daha sonra ABŞ-da təşkil olunacaq digər irimiqyaslı yarışda gücümü sınayacağam. Qarşıda məni ciddi yarışlar gözləyir. Hazırlığımı intensivləşdirib yeni uğurlar qazanaraq xalqımızı sevindirmək istəyirəm. Çünki bundan xüsusi zövq alır və yeni qələbələrə həvəslənirəm”, - deyə V.Əzimov əlavə edib.
Peşəkar idmançı olmaq istəyən hər bir kəsə səbir, əziyyət və mütəmadi məşq lazım olduğunu vurğulayan V.Əzimov deyib: “Həmişə gərgin hazırlıq öz bəhrəsini verir. Vətənini sevən bir gənc idmançı kimi həmişə dövlətin qayğısını hiss edirəm. Bütün idmançılar kimi mən də bu etimadı doğrultmaq istəyir və ölkəmizi beynəlxalq arenada layiqincə təmsil etməyə çalışıram. Azərbaycan Prezidenti İlham Əliyev ölkədə idman infrastrukturunun təkmilləşdirilməsi, idmançılarımızın sosial vəziyyətinin yaxşılaşdırılması istiqamətində həmişə mütərəqqi addımlar atır. Biz idmançılar da yaradılan bu şəraitdən istifadə edərək yeni uğurlar qazanmalıyıq”.
Gələcəkdə tələbələr hazırlamağı çox istədiyini bildirən V.Əzimov deyib ki, hazırda karyeram və yeni qələbələr haqqında düşünürəm. İdmanın bu növü üzrə dünya çempionu Zabit Səmədovun azarkeşiyəm. O, dünyada öz sözünü demiş idmançıdır. Azərbaycanı idman aləmində layiqincə təmsil edən Z.Səmədov böyük idman uğurlarına imza atıb.
“Ölkəmiz irimiqyaslı yarışlara yüksək səviyyədə ev sahibliyi edir. Ötən ay Bakıda təşkil edilən XV Avropa Gənclər Olimpiya Festivalı ölkəmizin yüksək təşkilatçılığının növbəti dəfə bariz nümunəsi oldu. Avropanın 48 ölkəsindən güclü atletlər Bakıda güclərini nümayiş etdirdilər. Gələn il Azərbaycan Savat və Şaolin Döyüş Sənətləri Federasiyasının təşkilatçılığı ilə ölkəmizdə beynəlxalq turnir keçiriləcək. Yarışda mən də iştirak edəcəyəm. Doğma azarkeşlər önündə çıxış etmək həm qürurverici, həm də məsuliyyətlidir. Həmin vaxt azarkeşləri məyus etməməyə çalışıram. Bu, çox önəmlidir”, - deyə dünya çempionu əlavə edib.
Ən unudulmaz döyüşünə toxunan V.Əzimov həmin qarşılaşmanın Gürcüstanda Zaqafqaziya çempionatında baş tutduğunu deyib: “Ermənistandan olan rəqibimlə rinqə çıxanda ancaq qələbə haqqında düşünürdüm. Etiraf etməliyəm ki, həyəcan da var idi. Döyüş zamanı bütün fikrimi görüşə yönəltdim. Erməni idmançı həm boy, həm də çəkidə məndən üstün idi. Buna baxmayaraq rəqibimi iki dəfə nokdauna salaraq məğlub etdim. Bir Azərbaycan gənci kimi işğal altında olan torpaqlarımızı yağı düşməndən azad etməyə hazıram. Bunun üçün Ali Baş Komandanın əmrini gözləyirik”.