Avroqrup Xorvatiyanın gələn ildən Avrozonaya daxil olmasını təsdiqləyib

Zaqreb, 17 iyun, AZƏRTAC

Avroqrup (Avrozonanın Maliyyə Nazirləri Şurası) Xorvatiyanın 2023-cü il yanvarın 1-dən Avrozonaya daxil olmasını təsdiqləyib.

AZƏRTAC xəbər verir ki, bu barədə Avroqrupun bəyanatında deyilir.

“Bu gün Avroqrup Avrozonaya daxil olan üzv ölkələrinin Aİ Şurasına tövsiyəsini təsdiqləyib. Tövsiyə Xorvatiyanı 2023-cü il yanvarın 1-dən avronu tətbiq etməyə dəvət edir", - sənəddə deyilir. Sənəddə qeyd edilib ki, Aİ-nin maliyyə nazirləri Lüksemburqda keçirilən görüşdə Avropa Komissiyası və Xorvatiyanın Avropa Mərkəzi Bankının avro zonasına daxil olmaq üçün meyarlarını yerinə yetirməsinin müsbət qiymətləndirilməsi ilə razılaşıblar.

Yekun prosedur iyunun 23-24-də Brüsseldə keçiriləcək Aİ sammitində tamamlanmalıdır. Xorvatiya Avrozonaya daxil olan 20-ci üzv ölkə olacaq.

İqbal Hacıyev

AZƏRTAC-ın xüsusi müxbiri

Zaqreb