REGİONLAR


Avstriyalı mütəxəssislərin iştirakı ilə FHN-in xilasediciləri üçün təlim keçirilir - FOTO VİDEO

Qəbələ, 2 fevral, Rəşad Türkoğlu, AZƏRTAC

Qəbələdə avstriyalı mütəxəssislərin iştirakı ilə Fövqəladə Hallar Nazirliyinin (FHN) xilasediciləri üçün təlim keçirilir.

AZƏRTAC xəbər verir ki, təlimlər Fövqəladə Hallar Nazirliyi və Avstriya Respublikası Federal Daxili İşlər Nazirliyinin qarşılıqlı əməkdaşlığı çərçivəsində Qəbələ rayonu Tufandağ xizək sürmə mərkəzində təşkil olunub. 29 yanvar-4 fevral tarixlərini əhatə edən təlimlər xizəksürmə və qar uçqunlarında axtarış-xilasetmə üzrə keçirilir.

FHN-in müvafiq qurumlarının şəxsi heyət və texnikaları, xüsusi təlim görmüş itlər təlimə cəlb edilib.

Nəzəri və praktiki hissədən ibarət olan təlimin gedişində avstriyalı mütəxəssislər tərəfindən şəxsi heyətə qar uçqunları zamanı istifadə olunan müasir axtarış-xilasetmə texnika və avadanlıqları, onların taktiki-texniki xüsusiyyətləri və istifadə qaydaları, qar uçqunu altında qalan zərərçəkmişlərin xilas edilməsi və təxliyəsi, müvafiq təhlükəsizlik qaydaları üzrə məşğələlər keçirilir.

Təlimin praktiki hissəsində avstriyalı mütəxəssislərin təlimatları əsasında xilasedicilər mürəkkəb relyefli dağlıq ərazilərdə əlverişsiz hava şəraitində axtarış-xilasetmə işlərinin təşkili, qar uçqunu altında qalmış zərərçəkmişlərin xilasetmə avadanlıqlarından istifadə etməklə axtarışı, xilas olunması, ilkin yardımın göstərilməsi üzrə praktiki tapşırıqları yerinə yetirirlər.

Təlimi keçən FHN-in xilasedicilərinə Avstriya Daxili İşlər Nazirliyinin müvafiq sertifikatları təqdim olunur.

Qeyd edək ki, bu tədbir iki nazirlik arasındakı əməkdaşlıq çərçivəsində həyata keçirilən sayca altıncı təlimdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.