Bakı, 27 yanvar (AZƏRTAC). Azərbaycanın nəqliyyat sektorunda daşımaların həcminə görə ən böyük paya malik olan avtomobil nəqliyyatı ilə ötən il 118,1 milyon ton yük, 1,4 milyard sərnişin daşınmış və əvvəlki illə müqayisədə müvafiq olaraq 7,6 faiz və 8,7 faiz artım qeydə alınmışdır. Sərnişinlərin 96,4 faizi avtobus, 3,6 faizi isə minik taksilərinin xidmətlərindən istifadə etmişlər. Yük dövriyyəsi 7,7 faiz, sərnişin dövriyyəsi isə 9,7 faiz artmışdır.

Dövlət Statistika Komitəsindən AZƏRTAC-a bildirmişlər ki, metro nəqliyyatının xidmətlərindən istifadə etmiş sərnişinlərin sayı isə 7,1 faiz artaraq 195,6 milyon nəfər olmuşdur.