Bakı, 20 aprel, AZƏRTAC

Aprelin 20-də Nizami Kino Mərkəzində Mədəniyyət və Turizm Nazirliyinin təşkilatçılığı ilə “Avtoportret” sənədli filminin təqdimatı olub.

AZƏRTAC xəbər verir ki, dövlət sifarişi ilə “Dublyaj” studiyasında istehsal olunan film görkəmli rəssam, Əməkdar İncəsənət Xadimi Eyyub Hüseynovun həyat və yaradıcılıq yoluna həsr edilib.

Tədbirdə mədəniyyət və turizm nazirinin müavini vəzifəsini icra edən Ədalət Vəliyev XX əsr Azərbaycan rəssamlığının inkişafında böyük xidmətləri olan rəssamın həyat və yaradıcılığı haqqında iştirakçılara ətraflı söz açıb, onun əziz xatirəsinin sənətsevərlərin qəlbində daim yaşayacağını söyləyib. Vurğulayıb ki, E.Hüseynovun sənəti tələbələrinin, ən başlıcası, iki oğlunun örnəyində davam etdirilir.

Qeyd edilib ki, Azərbaycan rəssamlıq məktəbinin tanınmış nümayəndələrindən olan E.Hüseynov zəngin yaradıcılıq yolu keçməklə yanaşı uzun illər Bakı Rəssamlıq Texnikumunda müəllim, daha sonra isə direktor olub, bir çox rəssamlar nəslinin yetişməsində böyük rol oynayıb.

Tədbirdə Rəssamlar İttifaqının sədri, Xalq Rəssamı Fərhad Xəlilov, Azərbaycan Dövlət Rəssamlıq Akademiyasının prorektor, Xalq Rəssamı Fuad Salayev çıxış edərək E.Hüseynovun müəllim kimi gözəl keyfiyyətlərindən bəhs edib, onunla bağlı xatirələrini bölüşüblər. Bildirdi ki, E.Hüseynov 1956-1965-ci illərdə Ə.Əzimzadə adına Azərbaycan Dövlət Rəssamlıq Məktəbinin direktoru işləyib. Həmin dövr onun həmkarlarının və tələbələrinin yaddaşında xoş xatirələrlə, yaradıcılıq uğurları ilə qalıb. E.Hüseynov sənətkarlıqdan öncə səmimi insan, təvazökar ziyalı idi.

Qeyd edilib ki, Eyyub Hüseynov müxtəlif janrlarda əsərlər yaratsa da, ömrünün sonunadək realizm üslubuna sadiq qalıb, onun bütün imkanlarından istifadə edərək həyat gerçəklərini uğurlu sənət əsərlərinə çevirə bilib.

Sora filmin yaradıcı heyəti səhnəyə dəvət olunub. Sözügedən filmin ssenari müəllifi və rejissoru Əməkdar İncəsənət Xadimi Yavər Rzayev, operatoru Rövşən Quliyev, prodüseri Qafar Məcidovdur.

Ekran əsəri maraqla qarşılanıb.