Bakı, 28 oktyabr, AZƏRTAC

Azərbaycanın Qoşulmama Hərəkatına üzv olduqdan 8 il sonra təşkilatın Zirvə Görüşünə ev sahibliyi etməsi ölkəmizin beynəlxalq aləmdə artan nüfuzunun real göstəricisidir.

Bu fikri AZƏRTAC-a açıqlamasında Milli Məclisin deputatı, Yeni Azərbaycan Partiyasının Qaradağ rayon təşkilatının sədri Aydın Hüseynov söyləyib. Deputat qeyd edib ki, təşkilatın beynəlxalq siyasətə təsir imkanlarını və dünyadakı mövqeyini nəzərə alsaq, o zaman Bakı toplantısının bəşəriyyət üçün mühüm əhəmiyyət kəsb etdiyini görərik. Bu, eyni zamanda, Avropa qitəsində 30 ildən sonra təkrarlanan bir hadisədir. Dünya əhalisinin yarıdan çoxunun - təxminən 55 faizinin Qoşulmama Hərəkatına üzv olan ölkələrdə yaşadığını, Yer kürəsində neft ehtiyatlarının 75 faizindən və qaz ehtiyatlarının 50 faizindən çoxunun bu dövlətlərin ərazisində yerləşdiyini nəzərə alaraq tədbirin Bakıda təşkili iqtisadi, siyasi və beynəlxalq baxımdan mühüm əhəmiyyət kəsb etməklə Azərbaycanın dünyaya açıq ölkə olduğunu və humanizm dəyərlərinə sadiq qaldığını təsdiqləyir. Çünki artıq hər kəsə yaxşı məlumdur ki, Prezident İlham Əliyevin rəhbərliyi ilə Azərbaycan dinamik surətdə inkişaf edərək dünya birliyində qüdrətini durmadan artırır. Zirvə Görüşündə iştirak edən ölkələrin və beynəlxalq təşkilatların rəhbərləri ölkəmizin sosial ədalət prinsiplərinə sadiq qalaraq son dərəcə sürətlə inkişaf etdiyini gördülər.

Təşkilata sədrliyin Azərbaycana keçməsinə gəldikdə, Milli Məclisin deputatı bildirib ki, bu, Azərbaycanın dünya birliyində rolunun gücləndiyinin və bunun xarici ölkələr tərəfindən də dəyərləndirildiyinin təsdiqidir.

A.Hüseynov əlavə edib ki, Azərbaycan Qoşulmama Hərəkatına sədrlik müddətində təşkilatın prinsiplərinə sadiq qalaraq, qurumun beynəlxalq münasibətlər sistemində rolunun daha da artması, o cümlədən Azərbaycanla üzv ölkələr arasında əlaqələrin daha da inkişaf etdirilməsi, milli maraqlarının təmin olunması istiqamətində ciddi addımlar atacaq: “Əminəm ki, Azərbaycanın BMT-dən sonra dünyanın ən böyük ikinci beynəlxalq təşkilatına sədrlik etməsi ölkəmizin beynəlxalq münasibətlər sistemindəki mövqeyinin möhkəmlənməsinə xidmət edəcək”.

Milli Məclisin deputatı vurğulayıb ki, Azərbaycan Prezidenti İlham Əliyev Zirvə Görüşündə söylədiyi nitqdə Ermənistanın əzəli Azərbaycan torpaqlarını işğal etməsi və həyata keçirdiyi etnik təmizləmə siyasəti, Xocalı soyqırımı haqqında dünya ictimaiyyətini bir daha məlumatlandırdı. Həmçinin ölkəmizin son 15 ildə siyasi, iqtisadi, sosial, humanitar, idman və digər sahələrdə qazandığı uğurlar barədə ətraflı məlumat verdi. Bundan başqa, ölkəmizin Qoşulmama Hərəkatının beynəlxalq münasibətlər sistemindəki rolunu və nüfuzunu daha da yüksəltmək, dünyada sülhü və təhlükəsizliyi möhkəmləndirmək, dayanıqlı inkişafın və ədalətin təmin olunması üçün var gücü ilə çalışacağını qeyd etdi.