Bakı, 16 avqust, AZƏRTAC

Prezident İlham Əliyev “CNN Türk” telekanalına müsahibəsində Ermənistana və onu silahlandıranlara xəbərdarlıq etməklə Azərbaycanın qətiyyətli mövqeyini nümayiş etdirdi.

Prezident İlham Əliyevin müsahibəsində səsləndirdiyi fikirləri regional proseslərə təmkinlə, uzaqgörən və olduqca peşəkar siyasi Liderin baxış bucağı kimi səciyyələndirmək olar. 44 günlük Vətən müharibəsində Zəfər qazanan müzəffər Ordunun Ali Baş Komandanı olan dövlətimizin başçısı bölgədə sülhün və təhlükəsizliyin təmin edilməsində təşəbbüskar və ardıcıl səylərini əsirgəməyən Lider kimi Qarabağda yeni siyasi reallıqlara uyğun addımların atılmasında qətiyyətli mövqe nümayiş etdirdi. Bununla yanaşı, regionda sülhün pozulmasına yönələn təhrikedici hərəkətlərə qarşı qətiyyətli və sərt tədbirlər görmək qətiyyətini də göstərdi.

Bunu AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov deyib.

Deputatın sözlərinə görə, Prezident İlham Əliyev müsahibəsində 2020-ci il 10 noyabr razılaşmasından sonra regionda baş verən bəzi xoşagəlməz hallara münasibət bildirərək, kövrək sülh və yenicə formalaşmaqda olan birgə əməkdaşlıq mühitinə zərər verən tendensiyalardan narahatlığını ifadə etdi. Ermənistanın son zamanlar qeyri-konstruktiv hərəkətlərinə, bu ölkəni silahlandıraraq Qarabağda və Azərbaycanla sərhəd zonasında təxribatlar törətməyə, atəşkəsi pozmağa təhrik edən qüvvələrə də açıq və aydın şəkildə mesajlar verdi. Prezident İlham Əliyev, eyni zamanda, Rusiyanın Ermənistanı silahlandırması, Rusiya sülhməramlılarının üçtərəfli Bəyanatının prinsiplərinə tam riayət etməməsi, Azərbaycanın müharibə istəmədiyi, lakin zərurət yaranacağı halda yenidən müharibəyə başlaya biləcəyinə dair fikirləri ilə siyasi auditoriyaya açıq mesajlar ünvanladı. Qarabağda sülhün qorunmasını təmin etməli olan Rusiya sülhməramlılarına xəbərdarlıq ünvanladı. “Rusiyadan gözləntimiz odur ki, üçtərəfli Bəyanatla onun üzərinə düşən bütün müddəaları yerinə yetirsin. Ümid edirik ki, Rusiya bundan sonra da bu bölgənin təhlükəsizliyi üçün öz səylərini əsirgəməyərək, uzunmüddətli sülhü təmin etmək üçün addımlar atacaq. Eyni zamanda, bizim gözləntimiz odur ki, Rusiya Ermənistanı silahlandırmasın”, - deyə konkret və aydın bəyanat verən Prezident İlham Əliyev Azərbaycanın Qələbəsindən, müharibənin başa çatmasından və Ermənistan rəhbərliyinin də məğlubiyyətlə barışmasından sonra bölgədə hərbi manevrlərin, silahlanmanın anlaşılmaz və yolverilməz olduğunu səsləndirdi. Qeyd etdi ki, Ermənistanda keçirilmiş son parlament seçkilərində erməni xalqı məğlub edilmiş rəhbərliyə yenidən səs verməklə müharibə istəmədiyini təsdiqlədi. Belə olan halda Ermənistanı silahlandırmaq heç bir məntiqə sığmır. Ermənistanda revanş istəyənlərin isə keçmişdən dərs alması lazımdır. İkinci Qarabağ savaşı hələ ki, hər kəs üçün dərs olmadı. Əgər belədirsə, biz Ermənistanın dərsini yenidən verməyə hazırıq. Ona görə biz ümid edirik ki, Rusiya Ermənistanı silahlandırmayacaq. Çünki buna ehtiyac yoxdur. Eyni zamanda, Azərbaycan Qarabağda baş verən bütün proseslərə nəzarət edir, izləyir. Laçın dəhlizi bizim gözümüzün önündədir. Ordumuz Laçın dəhlizi ilə Rusiya sülhməramlı qüvvələrinin nəzarətində olan bölgələrdə baş verən hadisələri də izləyir. Xankəndiyə gedən avtomobillərin sayını dəqiqliyi ilə bilir. Kim Qarabağa hansı mal-materialı, silahı daşıyır, Azərbaycan onu çox aydın şəkildə görür. Ona görə də, Prezident İlham Əliyev müsahibəsində bu məsələyə toxunarkən bütün dövlətləri xəbərdar etdi ki, bu hərəkətləri yığışdırsınlar. Bu, olduqca qətiyyətli və çox açıq bir bəyanatdır və hər kəs öz məsuliyyətini dərk etməlidir”.

Aydın Hüseynov qeyd edib ki, artıq müharibə bitib, yenidən regionda qarşıdurmaya ehtiyac yoxdur. Bölgənin yenidən siyasi dizaynını Azərbaycan cızır. Regionda yeni dəhlizlər, kommunikasiya xətlərinin yaradılması prosesləri gedir. Bölgədəki kommunikasiya xətlərinin açılmasında maraqlı olan hər bir ölkə diqqətini buna yönəltməli, sülh və əməkdaşlıq üçün təsirli müsbət addımlar atmalıdır.

“Hazırda Azərbaycan Ermənistanın nicat yolu olan, bu ölkəni qaranlıq dalandan çıxara biləcək regional kommunikasiyaların yaradılması istiqamətində ardıcıl və qətiyyətli addımlar atmaqdadır. Çünki bu dəhlizin açılması bir çox məqsədlərə, hədəflərə xidmət göstərir. Əfsuslar olsun ki, Ermənistan bəzi qüvvələrin təhriki ilə buna etiraz edir. Prezident İlham Əliyev müsahibədə bu məsələyə də xüsusi diqqət çəkdi və bildirdi ki, son günlərə qədər Zəngəzur dəhlizinin açılmasına etiraz edənlər olsa da, bu dəhliz yaradılacaq. Zəngəzur dəhlizinin tam fəaliyyəti üçün həm dəmir yolu, həm də avtomobil yolu olmalıdır. Bu, eyni zamanda, bölgə ölkələri üçün də yeni fürsətlər yaradacaq”, - deyən deputat əlavə edib ki, regionda sülhün fəal dəstəklənməsində xüsusi rol oynayan qardaş Türkiyənin Azərbaycanla münasibətlərinin dərinləşməsində prezidentlər İlham Əliyevin və Rəcəb Tayyib Ərdoğanın son vaxtlar intensivləşən dialoqlarının da mühüm rolu olub.

A.Hüseynov, həmçinin vurğulayıb: “Prezident İlham Əliyevin “CNN Türk” telekanalına müsahibəsində bu mövzuya xüsusilə toxunuldu - Şuşa Bəyannaməsindən sonra Azərbaycan-Türkiyə qardaşlığı ən yüksək zirvəyə, strateji pik həddinə çatdı. Türkiyə Azərbaycanın yanındadır və Azərbaycanın haqq işində Türkiyə Azərbaycana siyasi və mənəvi dəstək verir və verəcəkdir. Bunun çox böyük mənası var idi. Prezident İlham Əliyevin bəyan etdiyi kimi, son 18 il ərzində həm Türkiyə, həm də Azərbaycan tərəfindən vahid siyasət formalaşdırılıb. Bu siyasətə qarşı çıxanlar anlamalıdır ki, Türkiyə-Azərbaycan birliyi artıq bölgəsəl amildir və bu güc regionun bütün məsələlərdə taleyini həll edir”.