ELM VƏ TƏHSİL
AzMİU-da müasir inşaatda su, enerji təchizatı və ekologiya problemlərinə dair beynəlxalq elmi konfrans keçirilir VİDEO
Bakı, 27 noyabr, AZƏRTAC
Noyabrın 27-də Azərbaycan Memarlıq və İnşaat Universitetində (AzMİU) "Müasir inşaatda su, enerji təchizatı və ekologiya problemləri" mövzusunda beynəlxalq elmi-praktik konfrans öz işinə başlayıb.
AZƏRTAC xəbər verir ki, AzMİU-nun su təsərrüfatı və mühəndis kommunikasiya sistemləri fakültəsi tərəfindən "UNDP GEF Kura Project" layihəsi və Memarlıq, İnşaat Elminə və Tədrisin İnkişafına Yardım Xeyriyyə Fondunun birgə təşkilatçılığı ilə keçirilən ikigünlük konfransda dünyanın müxtəlif ölkələrinin universitetlərindən, o cümlədən ölkəmizdə fəaliyyət göstərən aparıcı ali təhsil müəssisələrindən, elmi mərkəzlərdən, BMT-nin Azərbaycan nümayəndəliyindən, müxtəlif təşkilatlardan nümayəndələr, görkəmli alimlər iştirak ediblər. Beynəlxalq konfransa 90-dan artıq məruzə təqdim olunub.
Tədbiri giriş sözü ilə açan AzMİU-nun rektoru, professor Gülçöhrə Məmmədova konfrans barədə məlumat verib, mövzunun aktuallığını qeyd edib. Rektor bildirib ki, konfransın keçirilməsində məqsəd respublikamizda ekoloji modelləşdirmənin təkmilləşdirilməsinə kömək edəcək yeni ideya və təkliflərin elmi müzakirəsinə nail olmaq, bu istiqamətdə müxtəlif ölkələrin təcrübələrini paylaşaraq fikir mübadiləsi aparmaqdır.
“Azərsu” ASC-nin sədrinin müşaviri, professor Çingiz Abdullayev konfrans iştirakçılarını təbrik edib, xoş sözlərini bildirib.
Universitetin ekologiya kafedrasının müdiri, professor Fəqan Əliyevin “Xəzər dənizi və Kür çayının tullantılarla çirklənməsinin tədqiqi” mövzusunda məruzəsi dinlənilib.
Türkiyənin İstanbul Su Kanal İdarəsinin çirkab suların təmizlənməsi bölümünün başqanı Ali İncinin təmsil etdiyi qurumun ölkəsində çirkab suların təmizlənməsi ilə bağlı məruzəsi maraqla qarşılanıb.
BMT-nin nümayəndəsi, “UNDP GEF Kura II Project” layihəsinin texniki rəhbəri xanım Meri Matyus plenar iclasda “Dayanıqlı inkişaf məqsədlərini nəzərə almaqla su idarəetmə infrastrukturları üçün təbii amillərə əsaslanan həll yolları” mövzusunda məruzə ilə çıxış edib.
Konfrans öz işini bölmələrdə davam etdirib.