ELM VƏ TƏHSİL
AzMİU-da respublika elmi-praktik konfransı keçirilib
Bakı, 19 dekabr, AZƏRTAC
Dekabrın 19-da Azərbaycan Memarlıq və İnşaat Universitetində (AzMİU) “Azərbaycanda iqtisadi islahatların həyata keçirilməsinin aktual problemləri” mövzusunda respublika elmi-praktik konfransı öz işinə başlayıb.
AzMİU-dan AZƏRTAC-a bildirilib ki, konfransda Milli Məclisin deputatları, aparıcı ali təhsil müəssisələrindən, elmi mərkəzlərdən, müxtəlif təşkilatlardan nümayəndələr, görkəmli alimlər iştirak ediblər.
Tədbiri açan universitetin rektoru, professor Gülçöhrə Məmmədova rəhbərlik etdiyi ali məktəbdə 2018-ci il ərzində keçirilmiş müxtəlifyönümlü beynəlxalq və respublika miqyaslı elmi konfranslar barədə məlumat verib. Rektor bildirib ki, bugünkü konfransın keçirilməsində məqsəd elmi mühitin milli iqtisadiyyatın inkişafının aktual problemlərinin tədqiqinə cəlb olunması, qazanılmış elmi nəticələrin paylaşılması və müzakirəsi üçün platforma təqdim etməkdir.
Rektorun geniş və əhatəli çıxışından sonra konfrans plenar iclasda davam etdirilib.
Milli Məclisin aqrar siyasət komitəsinin sədri Eldar İbrahimov “İqtisadi islahatlar inkişafın əsasıdır” mövzusunda məruzə ilə çıxış edib. Komitə sədri Azərbaycan iqtisadiyyatının rəqabətqabiliyyətinin artırılması sahəsində görülən işlər haqqında danışıb.
“Azərbaycanın yeni iqtisadi inkişaf modeli” mövzusunda məruzə ilə çıxış edən Milli Məclisin deputatı Əli Məsimli qeyd edib ki, ölkənin sosial, iqtisadi inkişafını xarakterizə edən statistik məlumatların təhlili bu gün Azərbaycanda yeni, mükəmməl milli iqtisadi inkişaf modelinin formalaşdırıldığını göstərir.
AMEA-nın aqrar məsələlər üzrə müşaviri Qərib Məmmədovun “Müasir şəraitdə aqrar islahatların respublikamızın tərəqqisində rolu” mövzusunda məruzəsində regionların iqtisadiyyatının əsasını təşkil edən kənd təsərrüfatının daha da inkişaf etdirilməsi üçün görülən işlərdən və son illərdə bu sahədə əldə olunan yüksək nailiyyətlərdən bəhs edib.
Konfrans öz işini bölmə iclaslarında davam etdirib. Konfransa təqdim olunan 76 məqalə toplu şəklində çap olunub və qeydiyyat zamanı iştirakçılara təqdim edilib.
Qeyd edək ki, konfrans texniki təmayüllü universitetlər arasında iqtisadi mövzuda keçirilən ilk elmi konfransdır.