ELM VƏ TƏHSİL
AzMİU ilə Yıldız Texniki Universiteti arasında anlaşma memorandumu və tələbə mübadilə protokolu imzalanıb
Bakı, 18 iyun, AZƏRTAC
Türkiyənin Yıldız Texniki Universitetinin rektoru, professor Tamer Yılmazın rəhbərlik etdiyi nümayəndə heyəti Azərbaycan Memarlıq və İnşaat Universitetində (AzMİU) olub.
AzMİU-dan AZƏRTAC-a bildirilib ki, nümayəndə heyəti ilə görüşdə rektor Gülçöhrə Məmmədova Azərbaycan-Türkiyə əlaqələrinin bütün sahələrdə olduğu kimi, təhsildə də yüksək səviyyədə olduğunu qeyd edib, Yıldız Texniki Universiteti ilə əməkdaşlığın inkişafından məmnunluğunu dilə gətirib. Rektor, eyni zamanda, 44 günlük Vətən müharibəsi dövründə qardaş ölkənin göstərdiyi siyasi və mənəvi dəstəyini yüksək dəyərləndirib, türk xalqına sonsuz təşəkkürünü bildirib. Rəhbərlik etdiyi təhsil müəssisəsinin beynəlxalq əlaqələrindən danışan G.Məmmədova universitetin imkanlarının daha da genişlənməsində, inkişaf etməsində beynəlxalq əməkdaşlığın vacibliyini vurğulayıb, Türkiyənin qocaman ali təhsil müəssisələrindən biri olan Yıldız Texniki Universiteti ilə faydalı işbirliyinin yaradılmasında maraqlı olduğunu diqqətə çatdırıb.
Görüşdə Tamer Yılmaz 110 illik inkişaf tarixi olan Yıldız Texniki Universitetində həyata keçirilən kadr hazırlığı istiqamətləri barədə ətraflı məlumat verib. O, hazırda universitetdə 37 min tələbənin təhsil aldığını deyib. Bildirib ki, universitetdə 11 fakültə, hər fakültənin tərkibində də bir neçə ixtisas fəaliyyət göstərir. Universitet dünya üzrə 661 ali məktəblə əməkdaşlıq edir ki, bunlardan da 6-sı Azərbaycan universitetidir. Yıldız Texniki Universitetinin Türkiyə universitetləri arasında ən böyük texnoparka malik olduğunu vurğulayan T.Yılmaz sənaye ilə səmərəli işbirliyinin yaradılması sahəsində mövcud olan zəngin təcrübələrindən danışıb. O, akademik və inzibati heyətin bacarıqlarının inkişaf etdirilməsi, gənc əməkdaşların doktorantura səviyyəsində təhsil alması, məsafədən təhsilin yaratdığı imkanlardan fayda əldə edilməsi və digər məsələlərdə AzMİU-ya kömək göstərə biləcəklərini bildirib.
Ətraflı müzakirələrlə davam edən görüşün sonunda universitetlər arasında anlaşma memorandumu və tələbə mübadilə protokolu imzalanıb. Hər iki universitet üçün qarşılıqlı maraq doğuran sahələrdə potensial əməkdaşlığın yaradılmasını nəzərdə tutan protokol tələbə və müəllim mübadiləsini, birgə tədqiqatların aparılmasını, qısamüddətli akademik proqramların həyata keçirilməsini və digər məsələləri əhatə edir.
Görüşdən sonra nümayəndə heyətinin üzvləri AzMİU-nun fakültə və laboratoriyaları ilə tanış olublar.