ELM VƏ TƏHSİL
AzTU ilə AMEA-nın Yüksək Texnologiyalar Parkının əməkdaşlığı tədqiqatçılar üçün böyük perspektiv vəd edir
Bakı, 26 oktyabr, AZƏRTAC
Azərbaycan Milli Elmlər Akademiyasının (AMEA) Yüksək Texnologiyalar Parkı (YT Park) və Azərbaycan Texniki Universiteti (AzTU) arasında imzalanmış niyyət sazişi AMEA-nın ümumi yığıncağı və Təhsil Nazirliyinin kollegiyasının 2016-cı il 21 dekabr tarixli birgə qərarına əsaslanır. Həmin qərara əsasən bu günədək bir sıra birgə tədbirlər həyata keçirilib. Elmi-tədqiqatların, elmi proqramların və layihələrin həyata keçirilməsi şərtlərini tənzimləyən bu sazişin imzalanması da həmin birgə tədbirlərin, əməkdaşlığın davamıdır.
Bu barədə AZƏRTAC-a AzTU-nun prorektoru, professor İlham Pirməmmədov məlumat verib.
Qeyd olunub ki, kadr hazırlığı üçün çox halda maddi-texniki vəsait lazım olur. Məsələn, texniki ali məktəbdə qabaqcıl laboratoriyaların olması çox vacibdir. Ali məktəb bəzən tələbələri bu cür laboratoriyalarla yetərincə təmin edə bilmir. Lakin AMEA-nın maddi-texniki bazası çox güclüdür. Dünyanın ən qabaqcıl laboratoriyaları AMEA-nın institutları, elmi-tədqiqat mərkəzlərinin nəzdində mövcuddur. Ona görə də tələbələrin praktik əhəmiyyətli elmi-tədqiqat işlərinə cəlb edilməsi, innovasiyayönümlü tədqiqatların aparılması baxımından bu əlaqələr böyük əhəmiyyətə malikdir.
“Xüsusən Azərbaycan Texniki Universiteti ilə AMEA-nın Yüksək Texnologiyalar Parkı arasında əməkdaşlığın olması müstəsna əhəmiyyət kəsb edir. Bizim universitet adından göründüyü kimi, texniki sahələri əhatə edir. Burada texniki yönümdə araşdırmalar, tədqiqatlar aparılır, ixtiralar edilir. AMEA-nın Yüksək Texnologiyalar Parkının işinin demək olar ki, böyük hissəsi də məhz bu istiqamətdədir. Ona görə də bu iki qurum arasında əməkdaşlıq böyük nəticələrin əldə olunacağından xəbər verir. Universitetlərdə bəzən çox böyük ixtiralar edilir. Lakin bunun sənayeyə tətbiqi təəssüflər olsun ki, çox vaxt reallaşmır. Universitet idarəediciləri olaraq biz bunun səbəbini alimlərin daha çox tədqiqata vaxt ayırması, marketinq işi ilə ya məşğul olmaması, ya da marketinq işinin xüsusiyyətlərini bilməməsi ilə bağlayırıq. AMEA-nın Yüksək Texnologiyalar Parkında isə təqdimat bacarığı, ixtiraların realizə olunması, istehsala tətbiqi ilə bağlı böyük təcrübə, özünü doğrultmuş mexanizm mövcuddur. Bu baxımdan hesab edirəm ki, əməkdaşlığımız ölkəmizə, sənayemizə, elmimizə, o cümlədən universitetimizə çox faydalı olacaq”, - deyə prorektor bildirib.
AzTU-da ixtiraların sayının qaneedici olduğunu deyən professor qeyd edib ki, ötən il universitet üçün 12 patent alınıb. Bunların hər biri böyük ixtiradır. Əgər bunların realizə mexanizmi olsa, yəni reallaşdırılması üçün lazım olan vəsait cəlb oluna bilsə, bu ixtiralar böyük bir müəssisənin təməli ola bilər.