İQTİSADİYYAT


“AzerTelecom” və “Kazakhtelecom” Transxəzər layihəsi üzrə strateji tərəfdaşlıq haqqında memorandum imzalayıb

Bakı, 28 sentyabr, AZƏRTAC

Astana şəhərində baş tutan “Digital Bridge” beynəlxalq texnoloji forum çərçivəsində Azərbaycanın və Qazaxıstanın aparıcı telekommunikasiya şirkətləri “AzerTelecom” MMC və “Kazakhtelecom” Xəzər dənizinin dibi ilə Fiber-Optik Rabitə Xəttinin çəkilməsi layihəsi üzrə strateji tərəfdaşlıq haqqında memorandum imzalayıblar.

“AzerTelecom”dan AZƏRTAC-a bildirilib ki, tərəflər sənədin hər iki ölkənin rəqəmsal infrastrukturunun inkişafı sahəsində gələcək əməkdaşlıq üçün stimul rolunu oynayacağından, əlçatanlıq baxımından yeni bazar imkanlarının, eləcə də iki ölkədə şəbəkələrin ötürmə imkanlarının artırılmasına töhfə verəcəyindən əmindirlər.

Sənəd Azərbaycan-Qazaxıstan marşrutu üzrə Transxəzər Fiber-Optik Rabitə Xətti layihəsi çərçivəsində iki operator arasında strateji tərəfdaşlığı nəzərdə tutur.

Transxəzər Fiber-Optik Rabitə Xətti layihəsi Avropa və Asiya arasında rəqəmsal telekommunikasiya dəhlizinin yaradılmasını nəzərdə tutan irimiqyaslı “Rəqəmsal İpək Yolu” (Digital Silk Way) layihəsinin tərkib hissəsidir.

Telekommunikasiya operatorlarının nümayəndələri beynəlxalq telekommunikasiya xidmətlərinin göstərilməsi sahəsində ikitərəfli biznesin gələcək inkişafında, hər iki ölkənin rəqəmsal transformasiyası və rəqəmsal infrastrukturunun daha da inkişaf etdirilməsində ikitərəfli əməkdaşlığın stimullaşdırılması imkanlarında maraqlı olduqlarını bildiriblər.

“Rəqəmsal infrastruktur layihəsi - “Rəqəmsal İpək Yolu”nun tərkib hissəsi olan Transxəzər Fiber-Optik Rabitə Xətti çərçivəsində şirkətlərimiz arasında əməkdaşlıq bizə tranzit imkanlarımızı genişləndirməklə yeni satış bazarlarına çıxmaq üçün imkanlar açacaq. Həmçinin bu əməkdaşlığın köməyi ilə biz ölkələrimizdə istehlakçılara telekommunikasiya xidmətlərinin göstərilməsinin etibarlılığını daha da artıra biləcəyik”, - deyə “AzerTelecom” şirkətinin əməliyyatlar üzrə baş direktoru Sergey Nazarenko qeyd edib.

“Bu gün bizim üçün birgə vəzifələrin və maraqların həlli istiqamətində ən optimal düstur birbaşa münasibətlər qurmaqdır. “AzerTelecom” ilə birgə fəaliyyət məlumat, qabaqcıl təcrübə mübadiləsini və birgə layihələrin təşviqini nəzərdə tutur. Bütün bunlar, öz növbəsində, hər iki ölkədə internet şəbəkələrinin əlçatanlığı və ötürmə qabiliyyətinin artırılması baxımından yeni bazar imkanlarının inkişafına töhfə verəcək”, - deyə “Kazakhtelekom” SC-nin İdarə Heyətinin sədri Kuanışbek Yesekeyev vurğulayıb.

“NEQSOL Holding”in tərkibinə daxil olan “AzerTelecom” Azərbaycanın aparıcı rabitə operatorudur və ölkənin beynəlxalq internet şəbəkəsinə qoşulmasını təmin edir.

“Kazakhtelecom” Qazaxıstanın ən böyük telekommunikasiya şirkətidir və milli rabitə operatoru statusuna malikdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.