Bakı, 10 iyun, AZƏRTAC

İyunun 10-da Ailə, Qadın və Uşaq Problemləri üzrə Dövlət Komitəsinin (AQUPDK) sədri Bahar Muradova Azərbaycanda diplomatik fəaliyyətini başa çatdıran BMT-nin Azərbaycandakı rezident əlaqələndiricisi Qulam İsakzai ilə görüşüb.

AQUPDK-nin mətbuat xidmətindən AZƏRTAC-a bildirilib ki, görüşdə tərəflər arasında ikitərəfli əməkdaşlığın genişləndirilməsi istiqamətində həyata keçirilən uğurlu fəaliyyət və perspektivlər müzakirə edilib.

Bahar Muradova diplomatik fəaliyyəti dövründə səmərəli xidmətinə, eləcə də ikitərəfli əməkdaşlığın inkişafına verdiyi töhfələrə görə BMT rəsmisinə təşəkkürünü bildirib. Qeyd olunub ki, ötən illər ərzində BMT-nin və onun bir sıra qurumlarının Azərbaycan hökuməti, cəmiyyəti və parlamenti ilə işləri intensiv xarakter daşıyıb və müxtəlif səviyyələrdə mütəmadi görüşlər keçirilib. Komitə sədri Q.İsakzainin Azərbaycandakı fəaliyyətini xüsusi qiymətləndirərək, onun mühüm nailiyyətlərin əldə edilməsində rolunu qeyd edib.

Bahar Muradova diqqətə çatdırıb ki, uzun illər Qarabağ problemindən danışarkən BMT-nin qətnamələrini misal gətirmişik. Bildirilib ki, Azərbaycan öz gücünə torpaqlarını işğaldan azad edərək Zəfər qazanıb. Komitə sədri deyib: “Azərbaycanda xidmət göstərən digər BMT nümayəndələrindən fərqli olaraq bu tarixi hadisənin şahidi oldunuz və Vətən müharibəsi dövründə həm BMT-nin rəsmisi, həm də humanist bir insan kimi öz dəstəyinizi göstərməyə çalışdınız”.

Səmimi görüşə və ünvanına səslənən xoş sözlərə görə təşəkkürünü bildirən Qulam İsakzai 5 illik fəaliyyəti dövründə Azərbaycan hökuməti ilə birgə həyata keçirilən vacib tədbirləri xatırladaraq, bu müddət ərzində görülən bütün işlərin mühüm nəticələr verdiyini qeyd edib. O, Azərbaycandakı diplomatik fəaliyyətindən məmnunluq duyduğunu və bu illərin onun həyatına zənginlik gətirən təcrübə olduğunu vurğulayıb.

Q.İsakzai fəaliyyətinin Azərbaycanın torpaqlarını geri qaytardığı vacib bir məqama təsadüf etməsini, bu tarixi anı yaşamasını xüsusilə diqqətə çatdırıb. Ən uzun müddətli fəaliyyət göstərdiyi ölkənin Azərbaycan olduğuna diqqət çəkən BMT-nin rəsmisi bunun ölkəmizə olan xüsusi bağlılığı və marağından irəli gəldiyini qeyd edib.

BMT-nin Azərbaycandakı rezident əlaqələndiricisi Ailə, Qadın və Uşaq Problemləri üzrə Dövlət Komitəsi ilə əməkdaşlıq çərçivəsində həyata keçirilən genişmiqyaslı layihələr haqqında danışaraq, gender bərabərliyi sahəsində əldə edilən uğurlara toxunub. O, komitənin BMT-nin dəyərli və yaxın tərəfdaşı olduğunu vurğulayıb. Azərbaycan hökuməti ilə imzalanan proqram xarakterli əməkdaşlıq çərçivə sənədində gender bərabərliyi məsələsinin ayrıca əks olunduğunu qeyd edən Q.İsakzai bildirib ki, bu baxımdan həmin sənəd region üçün unikal hesab edilməlidir.

O, Birinci vitse-prezident Mehriban xanım Əliyevanın timsalında Azərbaycanda güclü qadın liderlərin olduğunu və qadınların ölkənin ictimai-siyasi həyatında fəal iştirak etdiyini qeyd edib. Eyni zamanda, Azərbaycanın əldə etdiyi uğurlar nəticəsində beynəlxalq səviyyədə 6 ölkədən biri kimi seçildiyini və BMT-nin daxilində aparılan islahatlara qiymət verən ölkələr sırasına daxil edildiyini diqqətə çatdırıb.

B.Muradova Ailə, Qadın və Uşaq Problemləri üzrə Dövlət Komitəsinin hər zaman olduğu kimi gələcək layihələrdə də BMT ilə əməkdaşlığa xüsusi əhəmiyyət verəcəyini və bu əməkdaşlığın davamlı olacağını qeyd edib. O, bir daha Q.İsakzainin Azərbaycandakı fəaliyyətini yüksək qiymətləndirərək, gələcək fəaliyyətində uğurlar arzu edib.