CƏMİYYƏT
Azərbaycan Beynəlxalq Miqrasiya İcmalı Forumu çərçivəsində keçirilən dəyirmi masaya həmsədrlik edib
Bakı, 19 may, AZƏRTAC
Birləşmiş Millətlər Təşkilatının Nyu-Yorkdakı Baş Qərargahında təşkil edilən ilk Beynəlxalq Miqrasiya İcmalı Forumu çərçivəsində Miqrasiya üzrə Qlobal Paktın 23 məqsədinə həsr olunan və həmin paktın icrası istiqamətində bütün səviyyələrdə əldə olunan təcrübəni nəzərdən keçirmək məqsədilə dörd interaktiv çoxtərəfli dəyirmi masa təşkil edilib.
Dövlət Miqrasiya Xidmətindən AZƏRTAC-a bildiriblər ki, hər masaya BMT Baş Assambleyasının prezidenti tərəfindən müəyyənləşdirilmiş iki üzv dövlətin nümayəndələri tərəfindən həmsədrlik edilib, habelə hər dəyirmi masada interaktiv müzakirəyə rəhbərlik etmək üçün əsas panelçilər təyin olunub. Azərbaycan Forum çərçivəsində təşkil olunan dörd dəyirmi masaya həmsədrlik edən səkkiz ölkə sırasındadır.
Forumun ikinci günündə keçirilən dördüncü dəyirmi masaya ölkəmiz adından Dövlət Miqrasiya Xidmətinin rəisi Vüsal Hüseynovla yanaşı, Mərakeş Krallığının BMT yanında daimi nümayəndəsi Omar Hilal həmsədrlik edib. Qeyd olunan dəyirmi masa “Təhlükəsiz, nizamlı və qanuni miqrasiya üzrə Qlobal Pakt”ın 1-ci (statistik məlumatlar), 3-cü (məlumat təminatı), 7-ci (həssaslığın azaldılması), 17-ci (ayrı-seçkiliyin aradan qaldırılması) və 23-cü (beynəlxalq əməkdaşlıq) məqsədlərinə həsr olunub. Azərbaycan tərəfindən həmsədrlik edilən dəyirmi masanın təşkilinə BMT-nin İnsan Hüquqları üzrə Ali Komissarlığı və BMT-nin İqtisadi və Sosial Məsələlər üzrə Departamenti dəstək göstərib.
Dördüncü dəyirmi masada əsas çıxışçı qismində BMT Baş katibinin İqtisadi və sosial məsələlər üzrə müavini Liu Zhenmin çıxış edib. Eyni zamanda, qeyd olunan dəyirmi masada Banqladeş Xalq Respublikasının xarici işlər naziri Şahriar Alam, Əhali Tədqiqatları Mərkəzinin direktoru xanım Marcela Cerrutti, Mərakeş Krallığının Milli Hüquq Mühafizə Agentliyinin prezidenti xanım Amina Bouayaç, Qarışıq Miqrasiya Mərkəzinin Asiya regional meneceri Temba Levis, habelə Miqrasiyada qadınlar şəbəkəsinin təsisçisi xanım Katerin Tactaquin və BMT-nin İnsan Hüquqları üzrə Ali Komissarının Nyu-York ofisinin rəhbəri Kraiq Mokhiber çıxış ediblər. Panelçilər dəyirmi masanın diqqət mərkəzində olan Miqrasiya üzrə Qlobal Paktın məqsədləri barədə fikir mübadiləsi aparıb, habelə iştirakçıların suallarını cavablandırıblar.
Dəyirmi masaların yekununda Beynəlxalq Miqrasiya Təşkilatının baş direktoru Antonio Vitorinonun rəhbərliyi ilə keçirilən siyasi dialoq çərçivəsində dördüncü dəyirmi masanın xülasəsi Dövlət Miqrasiya Xidmətinin rəisi Vüsal Hüseynov və Mərakeş Krallığının nümayəndəsi tərəfindən təqdim olunub.
Forum işini BMT Baş Assambleyası prezidentinin rəhbərliyi ilə plenar sessiya ilə davam etdirəcək.