Pekin, 7 aprel, AZƏRTAC

Azərbaycan Respublikası ilə Çin Xalq Respublikası (ÇXR) arasında diplomatik əlaqələrin qurulmasından 25 il ötür. Bu münasibətlə Çinin Xarici Ölkələrlə Dostluq Cəmiyyəti Pekində tədbir keçirib.

Çin parlamenti üzvlərinin, müxtəlif dövlət qurumları nümayəndələrinin, Azərbaycanın bu ölkədəki səfirliyinin əməkdaşlarının iştirak etdikləri tədbirdə Çinin Xarici Ölkələrlə Dostluq Cəmiyyətinin sədr müavini Sun Cinvu ötən 25 ildə ölkələrimiz arasında münasibətlərin müxtəlif istiqamətlərdə sürətlə və sağlam əsaslarla inkişaf etdiyini deyib.

Dövlət başçıları İlham Əliyevin və Si Cinpinin ölkələrimiz arasında münasibətlərin daha da inkişafı ilə bağlı göstərişlərinə uyğun olaraq, iki ölkənin müxtəlif qurumlarının fəal iş gördüklərini diqqətə çatdıran Sun Cinvu deyib ki, ötən müddətdə yüksək səviyyədə əlaqələrin və qarşılıqlı siyasi etimadın güclənməsi müşahidə olunub.

Mərasimdə çıxış edən Azərbaycanın Çindəki müvəqqəti işlər vəkili Mətin Mirzə bildirib ki, Azərbaycan müstəqilliyini bərpa edəndən sonra ilk diplomatik əlaqələr qurduğu ölkələrdən biri olan Çin ilə münasibətlər qarşılıqlı hörmət və dostluq prinsipləri əsasında inkişaf edib. Ulu öndər Heydər Əliyevin 1994-cü ildə Çinə səfəri ölkələrimiz arasında əlaqələrin inkişafında təməl rolunu oynayıb. Səfər zamanı əməkdaşlığın hüquqi bazası yaradılıb. Azərbaycan Prezidenti İlham Əliyevin müxtəlif vaxtlarda Çinə səfərləri, xüsusən də 2015-ci ilin dekabrında dövlət səfəri əlaqələrimizin inkişafına böyük töhfə verib.

M.Mirzə hazırda ölkələrimizin siyasi, iqtisadi, humanitar və digər sahələrdə uğurla əməkdaşlıq etdiyini, Çinin Azərbaycanın ərazi bütövlüyünü və suverenliyini, Azərbaycanın isə “Vahid Çin” siyasətini dəstəklədiyini diqqətə çatdırıb.

Azərbaycanın əlverişli coğrafi mövqeyi və nəqliyyat-tranzit potensialı ilə Çinin “Bir yol, bir kəmər” strategiyası üçün əhəmiyyətli ölkə olduğunu diqqətə çatdıran diplomat deyib ki, Avropa ilə Asiya arasında ən qısa dəmir yolu əlaqəsini təmin edəcək Bakı-Tbilisi-Qars dəmir yolu işə düşəndən sonra yüklərin Çindən Avropaya və əks istiqamətdə daşınmasında vaxt itkisi və maliyyə xərcləri xeyli azalacaq.

Sonra iki ölkə arasında diplomatik əlaqələrin 25 illiyi münasibətilə buraxılan yubiley zərfinin təqdimatı olub. Üzərində Çin səddinin və Qız qalasının, habelə iki xalqın milli musiqi alətləri - yançinin və tarın təsviri olan zərf 60 min nüsxədə Çin Milli Filateliya Korporasiyasında buraxılıb.

Mərasimdə Azərbaycan Prezidenti İlham Əliyevin 2015-ci ildə Çinə dövlət səfərini əks etdirən videoçarx nümayiş etdirilib.

Ümumçin Siyasi Məşvərət Şurasının sədr müavini Ma Biaona ulu öndər Heydər Əliyev haqqında Çin dilində çap olunan kitab hədiyyə edilib.

Xatırladaq ki, 1991-ci il dekabrın 27-də Çin Azərbaycan Respublikasının müstəqilliyini tanıyıb, 1992-ci il aprelin 2-də isə Azərbaycan ilə Çin arasında diplomatik münasibətlər qurulub.

Şahin Cəfərov

AZƏRTAC-ın xüsusi müxbiri

Pekin