Dünya İqtisadi Forumunun Bakıda regional mərkəzinin yaradılması Prezident İlham Əliyevin iradəsi ilə bağlıdır

Bakı, 7 fevral, AZƏRTAC

Hazırda dünya iqtisadiyyatı Dördüncü Sənaye İnqilabına qədəm qoyub. Bu, özündə rəqəmsallaşmanı, texnologiyaların birləşməsini və fiziki, rəqəmsal və bioloji sferalar arasında sərhədlərin aradan qalxmasını səciyyələndirir. Azərbaycan da Dördüncü Sənaye İnqilabına ən yaxşı hazırlaşan ölkələrdən biri olmaq niyyətindədir. Artıq bu istiqamətdə mühüm addımlar atılır. Bu il yanvarın 21-də Prezident İlham Əliyevin Davosda Dünya İqtisadi Forumunun prezidenti Borge Brende ilə görüşündə Forumun ölkəmizdə regional mərkəzinin yaradılması ilə bağlı niyyət protokolu imzalanıb.

Belə mərkəzlər çox məhdud sayda ölkələrdə yaradılır və onların əsas məqsədi isə Dördüncü Sənaye İnqilabının səbəb olduğu çağırış və imkanların həyata keçirilməsidir.

Prezident İlham Əliyev Bakıda regional mərkəzin yaradılmasını əlamətdar hadisə, Azərbaycanın növbəti uğuru kimi səciyyələndirərək deyib: “Ölkəmizin əhəmiyyətini, rolunu və bizə olan münasibəti əks etdirən son hadisə Davos Ümumdünya İqtisadi Forumu çərçivəsində Davos Forumu ilə Azərbaycan arasında Dördüncü Sənaye İnqilabı üzrə Bakıda regional mərkəzin yaradılması hadisəsidir. Bu, çox əlamətdar hadisədir. Çünki Davos Ümumdünya İqtisadi Forumu dünyada birnömrəli Forumdur, bundan yuxarı yoxdur. Bu, həm siyasi, həm iqtisadi sahədə nömrə birdir və bu bölgədə, Cənubi Qafqazda, Orta Asiyada Azərbaycanı mərkəz kimi seçmək, əlbəttə, böyük hadisədir, mən və Forumun prezidenti niyyət protokolunu imzaladıq, indi işlər başlanacaq və Dördüncü Sənaye İnqilabında Azərbaycan lider olmalıdır”.

Azərbaycan Respublikası Prezidentinin köməkçisi Natiq Əmirov AZƏRTAC-a müsahibəsində bu mühüm hadisənin əhəmiyyətini şərh edərkən deyib ki, belə bir mərkəzin Azərbaycanda yaradılması birbaşa Prezident İlham Əliyevin şəxsi iradəsi ilə bağlıdır. Beynəlxalq təşkilatlar Azərbaycanda həyata keçirilən texnologiyayönümlü, innovativ layihələri, ümumilikdə aparılan işləri yüksək qiymətləndirib. Çünki Azərbaycanda insan kapitalının inkişafı üçün çox böyük işlər görülüb. Son dövrlərdə aparılan islahatlar nəticəsində insan kapitalına diqqəti artırmaq, gənc kadrların, yeni düşüncə tərzinə malik insanların, yüksək təhsil almış, eyni zamanda, dünya iqtisadi və siyasi məkanında baş verənləri təhlil etməyə qadir gənclərin irəli çəkilməsinə xüsusi önəm verilir.

Qeyd edək ki, Dünya İqtisadi Forumunun regional mərkəzləri azsaylı ölkələrdə yaradılıb. İsrail, Cənubi Afrika Respublikası, Birləşmiş Ərəb Əmirlikləri, Kolumbiya və Səudiyyə Ərəbistanından sonra Azərbaycan Dünya İqtisadi Forumunun Dördüncü Sənaye İnqilabı Regional Mərkəzinin yaradıldığı altıncı ölkə olacaq. Dünya İqtisadi Forumunun Bakıda yaradılacaq Dördüncü Sənaye İnqilabı Mərkəzi, yeni texnoloji məhsulların implementasiyası, inkişaf etməkdə olan texnologiyalarla əlaqəli problemlərin həlli və sektorlararası əməkdaşlığın sürətləndirməsi üçün tərəfdaşlıq platforması olacaq. Mərkəz həm tərəfdaş dövlətlərə, həm də özəl sektor nümayəndələrinə informasiya texnologiyaları sahəsində çevik həll yolları təklif edib, regionda miqyaslı tətbiqinə dəstək verəcək.

Dördüncü Sənaye İnqilabı miqyası, həcmi və mürəkkəbliyi baxımından bəşəriyyətin bütün əvvəlki təcrübələrinin heç birinə bənzəmir. Qarşıda bizi süni intellekt, robot-avtomobillər, nanotexnologiya, biotexnologiya və sair daxil olmaqla ən geniş sahələrdə heyrətamiz texnoloji sıçrayış gözləyir.