REGİONLAR


Azərbaycan Dövlət Aqrar Universitetində I Beynəlxalq Yay Məktəbi başlayıb

Bakı, 16 iyul, AZƏRTAC 

Azərbaycan Dövlət Aqrar Universitetində (ADAU) Davamlı İnkişaf Hədəfləri adlı I Beynəlxalq Yay Məktəbi başlayıb. Bu münasibətlə universitetin 2 nömrəli Tələbə evinin akt zalında məktəbin açılış mərasimi keçirilib.

Bu barədə AZƏRTAC-a Kənd Təsərrüfatı Nazirliyinin mətbuat xidmətindən açıqlama verilib.

Tədbirdə çıxış edən universitetin rektoru, AMEA-nın müxbir üzvü, professor İbrahim Cəfərov bildirib ki, məktəbin təşkilində məqsəd yerli və xarici ali təhsil müəssisələrinin tələbələrini bir yerə toplamaqla, Davamlı İnkişaf Hədəflərini, onların icra vəziyyətini və qlobal əməkdaşlığı müzakirə etməkdir.

İyulun 28-nə kimi davam edəcək məktəbdə ölkəmizin ali təhsil müəssisələrindən Azərbaycan Dövlət İqtisad Universitetindən 3, ADA Universitetindən 1, Bakı Mühəndislik Universitetindən 1, Azərbaycan Dövlət Aqrar Universitetindən 2, Bakı Dövlət Universitetindən 1, Azərbaycan Texnologiya Universitetindən 1 tələbə seçilib. Xarici ali təhsil müəssisələrindən isə Qazaxıstan Milli Aqrar Universitetindən 2, Gürcüstan Texniki Universitetindən 4, Çin Kənd Təsərrüfatı Universitetindən 2, Çexiyanın Cənubi Bohemia Universitetindən 3, Təbiət Elmləri Universitetindən 2, Türkiyənin Allattin Keykubat Universitetindən 2 və Yıldız Teknik Universitetindən 1, Rusiya Dövlət Aqrar Universitetindən 1, Polşanın Poznan Təbiət Elmləri Universitetindən 3 və Varşava Təbiət Elmləri Universitetindən 2, Özbəkistanın Əndican Maşın Mühəndisliyi İnstitutundan 1, Tehran Universitetindən 1 tələbə qatılıb. Ümumilikdə isə yay məktəbində iştirak edən tələbələrin sayı 34-dür.

Yay məktəbinin iştirakçıları universitetin Tələbə evində yaşayış yeri ilə təmin olunublar. ADAU-nun maddi-texniki bazasının ən müasir tələblərə uyğun yenidən qurulması təhsil müəssisəsinin beynəlxalq səviyyəli tədbirlərin mərkəzinə çevrilməsinə səbəb olur.

Kənd təsərrüfatı naziri İnam Kərimovun təbriklərini çatdıran Kənd Təsərrüfatı Nazirliyinin İnsan Resurslarının İdarəedilməsi şöbəsinin müdiri Elvin Paşayev ölkəmizdə aqrar sahənin, aqrar elm və təhsilinin inkişaf istiqamətlərindən, qarşıda duran prioritet vəzifələrdən danışıb, yay məktəbinin iştirakçılarına uğurlar arzulayıb.

Tədbirdə Azərbaycan Milli Məclisinin deputatı, Yeni Azərbaycan Partiyası Gəncə şəhər təşkilatının sədri Naqif Həmzəyev, Azərbaycan Milli Məclisinin deputatı, Gəncə Dövlət Universitetinin elm və innovasiyalar üzrə prorektoru, dosent Pərvin Kərimzadə, AMEA Gəncə Regional Bölməsinin akademik-katibi, akademik Fuad Əliyev, Gəncə şəhər Gənclər və İdman Baş İdarəsinin rəisi Müşfiq Cəfərov çıxış edərək yay məktəbinin təşkilinin əhəmiyyətindən və ADAU-nun beynəlxalq səviyyədə tanınmasında rolundan danışıblar.

Yay məktəbində davamlı inkişaf hədəflərinə dair məsələlər müzakirə olunmaqla yanaşı, iştirakçılar üçün ölkəmizin füsunkar yerlərinə, regionda yerləşən fermer təsərrüfatlarına, Region Aqroparka, Qəbələ Heyvandarlıq Kompleksinə və digər yerlərə turlar təşkil olunacaq.

Tədbirin təşkilində göstərdikləri dəstəyə görə BMT-nin Ərzaq və Kənd Təsərrüfatı Təşkilatının (FAO) Azərbaycan üzrə Tərəfdaşlıq və Əlaqələndirmə ofisinin, “Aztexnika” və “Grand Motors” şirkətlərinin rəhbərlərinə təşəkkürünü bildirən rektor vurğulayıb ki, bu, ölkədə müəssisə və təşkilatlar tərəfindən ADAU-da rəqabətədavamlı mütəxəssis hazırlığı istiqamətində aparılan işlərə inam və etimadın nəticəsidir.

Sonra məktəbin iştirakçıları məktəbin təşkilinə görə minnətdarlıqlarını bildiriblər və təmsil etdikləri ali təhsil müəssisələrinin ADAU ilə əməkdaşlığa böyük önəm verdiyini diqqətə çatdırıblar. Həmçinin burada müzakirə olunacaq məsələlərdən faydalanacaqlarını və ölkəmizi daha yaxından tanıyacaqlarını qeyd edərək, gələcəkdə də bu kimi tədbirlərin davam etdirilməsinin əhəmiyyətini vurğulayıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.