İQTİSADİYYAT
Azərbaycan Dövlət Dəniz Akademiyası və Polşanın Şetsin Dənizçilik Universiteti arasında razılaşma əldə edilib
Bakı, 6 oktyabr, AZƏRTAC
Azərbaycan Dövlət Dəniz Akademiyası (ADDA) və Polşanın Şetsin Dənizçilik Universiteti arasında əməkdaşlığa dair razılaşma əldə edilib.
“Azərbaycan Xəzər Dəniz Gəmiçilik” QSC-nin mətbuat katibliyindən AZƏRTAC-a bildirilib ki, bir sıra beynəlxalq dənizçilik qurumlarının üzvü olan və müvafiq sertifikatlara malik Azərbaycan Dövlət Dəniz Akademiyası ötən illərdə olduğu kimi, yeni tədris ilində də xarici əlaqələrini genişləndirir. Tədrisin keyfiyyətinin yüksəldilməsini qarşısına məqsəd qoyan ADDA bir çox dənizçilik universitetləri ilə əməkdaşlıq edir.
ADDA-nın rektoru Çingiz Əliyev Şetsin Dənizçilik Universitetinin rektoru Voyçex Slazkanın dəvəti ilə Polşada olub və Avropanın bu nüfuzlu ali məktəbinin rəhbərliyi ilə danışıqlar aparıb. Danışıqların müzakirə mövzusu ADDA-da ingilis dilində tədrisin təşkili olub. Bununla yanaşı, Şetsin Dənizçilik Universitetindən professor-müəllim heyətinin cəlb olunması, tələbə mübadiləsi, hər iki ali təhsil müəssisəsinin elmi jurnallarında qarşılıqlı şəkildə məqalələrin çap olunması, Şetsin Dənizçilik Universitetinin tədris proqramlarının və kurrikulumlarının ADDA-da müəyyən uyğunlaşmalar aparılmaqla istifadəsi və digər məsələlərlə bağlı əməkdaşlıq perspektivləri ətrafında fikir mübadiləsi aparılıb. Danışıqların nəticəsi kimi, iki ali məktəb arasında qarşılıqlı razılaşma əldə edilib. İlkin mərhələdə ADDA-nın müəyyən olunmuş səviyyədə dil biliklərinə malik tələbələrinə ingilis dilində tədrisin aparılması məqsədilə Şetsin Dənizçilik Universitetindən müəllimlərin cəlb olunması nəzərdə tutulub.
Çingiz Əliyev, həmçinin Polşanın Dəniz İqtisadiyyatı və Təhsil nazirliklərinin rəhbərləri, ali təhsil müəssisələrinin rektorları və digər rəsmi şəxslərlə birlikdə Polşada gəmi qəzalarında həlak olmuş dənizçilərin anım mərasimində, habelə yeni tədris ilinin başlanması münasibətilə Şetsin Universitetində təşkil olunmuş tədbirdə iştirak edib.