ELM VƏ TƏHSİL
Azərbaycan Dövlət Neft və Sənaye Universiteti beynəlxalq konfransa ev sahibliyi edəcək
Bakı, 26 dekabr, AZƏRTAC
Dekabrın 26-da Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı Türkiyənin Sakarya Universitetinin nümayəndəsi professor Əhməd Tutar ilə görüşüb.
ADNSU-dan AZƏRTAC-a bildiriblər ki, görüşdə M.Babanlı rəhbərlik etdiyi ali məktəb ilə Sakarya Universiteti arasında əlaqələrə böyük önəm verdiyini söyləyib.
ADNSU-nun fəaliyyəti, təhsil müəssisəsində qazanılan uğurlardan danışan rektor 2016-cı ildə universitetin müəllimlərinin “Thomson Reuters”də 46 məqaləsinin dərc olunduğunu diqqətə çatdırıb.
Ə.Tutar təmsil etdiyi universitet ilə ADNSU arasında əməkdaşlığın əhəmiyyətini vurğulayıb.
Görüşdə 2017-ci ildə Beynəlxalq türk dünyası kimya elmləri və texnologiyaları konfransına ADNSU-nun ev sahibliyi etməsi məsələsi müzakirə olunub.