Bakı, 4 iyul (AZƏRTAC, Ceyhun Rüstəmov). “Azərbaycan Hava Yolları - AZAL” Qapalı Səhmdar Cəmiyyətinin (QSC) növbəti uçuş məntəqəsi Rusiya Federasiyasının Krasnoyarsk şəhəri olmuşdur. İyulun 4-dən etibarən “Azərbaycan Hava Yolları” Bakı-Krasnoyarsk-Bakı reysi üzrə müntəzəm uçuşlara başlamışdır.

Heydər Əliyev Beynəlxalq Aeroportundan yerli vaxtla saat 04.45-də havaya qalxan “Boeing-757” tipli müasir təyyarə özünün yüksək komfortluğu və sərnişinlərə göstərilən xidmət səviyyəsi ilə seçilirdi. Yeni reysin ilk sərnişinləri arasında “Azərbaycan Hava Yolları” QSC prezidentinin köməkçisi, xidmət rəisi Məhərrəm Səfərlinin rəhbərliyi ilə bir qrup yerli media işçisi də var idi.

Təyyarənin ilk sərnişinlərindən olan Tovuz rayon sakini Lətif Saatov təəssüratlarını AZƏRTAC-la bölüşərək “Azərbaycan Hava Yolları”nın Krasnoyarska müntəzəm reys açmasını sevinclə qarşıladıqlarını bildirmişdir. Dövlətimizin başçısı İlham Əliyevin diqqət və qayğısı nəticəsində milli aviaşirkətimizin inkişafından qürur hissi keçirdiyini deyən L.Saatov Krasnoyarska birbaşa uçuşların bu diyarda yaşayan azərbaycanlıların işini asanlaşdırdığını vurğulamışdır.

Sərnişinlər Kamilə Həsənova, Elsevər Səmədov, İntiqam Hüseynov da bu fikirlərə qoşularaq, “Azərbaycan Hava Yolları”nda xidmətin yüksək səviyyədə təşkil olunduğunu xüsusi qeyd etmişlər.

Təyyarə 4 saat 50 dəqiqədən sonra Rusiyanın Krasnoyarsk şəhərinin “Yemelyanova” Beynəlxalq Aeroportunda yerə enmişdir. Sərnişinləri və media işçilərini milli aviaşirkətimizin Rusiya nümayəndəliyinin, eləcə də Azərbaycan diasporunun təmsilçiləri, aeroportun rəsmiləri qarşılamışlar.

“Azərbaycan Hava Yolları” QSC prezidentinin köməkçisi, xidmət rəisi Məhərrəm Səfərli jurnalistlərə müsahibəsində dövlətimizin başçısı İlham Əliyevin diqqət və qayğısı nəticəsində milli aviaşirkətimizin inkişaf edərək uçuş coğrafiyasını ildən-ilə genişləndirdiyini vurğulamışdır. O bildirmişdir ki, Krasnoyarsk diyarında yaşayan azərbaycanlılar həftədə bir dəfə - cümə günləri reallaşacaq bu aviareys vasitəsilə doğma Vətənimizə, eləcə də geriyə birbaşa uça biləcəklər. Krasnoyarsk şəhərinə uçuşlar “Boeing-757” tipli təyyarələrlə həyata keçiriləcəkdir. ABŞ istehsalı olan bu hava gəmiləri istər təhlükəsizliyi, istərsə də komfortu ilə seçilir.

Aviaşirkətin bu il bir sıra reyslər açdığını deyən M.Səfərli qeyd etmişdir ki, “Azərbaycan Hava Yolları” mayın 20-dən başlayaraq beynəlxalq uçuşlarının sayını artırmışdır. Belə ki, artıq Minsk, Perm, Nijni-Novqorod və Kazan şəhərlərinə yeni aviareyslər açılmışdır. Eyni zamanda, Rusiyanın Rostov şəhərinə mövsümi uçuşlar bərpa olunmuşdur. Bundan başqa, bir aydan çoxdur ki, Antalya, İzmir, Bodrum, Dalaman, Lvov marşrutları üzrə birbaşa mövsümi reyslər də bərpa edilmişdir.

“Yeni aviareyslərin açılması ikitərəfli əməkdaşlıq münasibətlərinin, xalqlar arasında dostluq əlaqələrinin möhkəmləndirilməsinə təkan verməklə yanaşı, iqtisadi əlaqələrin genişlənməsinə xidmət edəcək, iş adamlarının qarşılıqlı səfərlərinin çoxalmasına, ölkələrimizin tarixi və səfalı guşələrinə turist səfərlərinin artmasına da səbəb olacaqdır”, - deyə M.Səfərli vurğulamışdır.

Media işçilərinin Sibirin qədim, ən böyük mədəni, iqtisadi və elm mərkəzi olan Krasnoyarsk şəhəri ilə tanışlığından sonra təyyarə geriyə - paytaxt Bakıya qayıtmışdır.

Qeyd edək ki, Krasnoyarsk milli aviaşirkətimizin sayca 36-cı uçuş məntəqəsidir. “Azərbaycan Hava Yolları”nın təyyarə parkı əsasən “Boeing-757”, “Boeing-767”, “Airbus-319”, “Airbus-320”, “Airbus-340” və “Embraer” tipli avialaynerlərdən ibarətdir. Nəhəng aviaşirkətə çevrilmiş “Azərbaycan Hava Yolları” həm regionda, həm də MDB məkanında yeni avialaynerlərin sayına görə liderlərdən biridir.