ELM VƏ TƏHSİL


Azərbaycan İlahiyyat İnstitutunda imtahanlar ictimaiyyətə açıq keçirilir

Bakı, 7 yanvar, AZƏRTAC

Bu gündən Azərbaycan İlahiyyat İnstitutunda imtahanlara başlanılıb.

İnstitutdan AZƏRTAC-a bildirilib ki, Aİİ-nin rektoru Ceyhun Məmmədov tələbələrə və onların valideynlərinə müraciət ünvanlayıb.

Müraciətdə bildirilir ki, 2018-2019-cu tədris ilinin payız semestrinin imtahan sessiyasının mövcud qaydalara uyğun təşkil edilməsində, tələbələrin biliyinin qiymətləndirilməsində şəffaflığın və obyektivliyin təmin edilməsi, imtahan sessiyasının mövcud normativ sənədlər əsasında keçirilməsi məqsədilə təhsil müəssisəsində imtahan qərargahının yaradılması, bu qərargaha daxil olan hər bir şikayətin qısa müddətdə operativ şəkildə araşdırılması üçün lazımi tədbirlər görülüb. Eyni zamanda, imtahanlarda şəffaflığın təmin edilməsi üçün ictimaiyyət nümayəndələrinin və tələbələrin valideynlərinin iştirakına şərait yaradılması məqsədilə müvafiq tədbirlər həyata keçirilib.

Müraciətdə qeyd olunur ki, sessiya başlamazdan öncə imtahanların şəffaf və obyektiv keçirilməsi məqsədilə fakültə dekanı, kafedra müdirləri qarşısında konkret vəzifələr müəyyənləşdirilib. Sessiyanın gedişi zamanı imtahanların nəticəsindən yarana biləcək narazılıqların araşdırılması və həll edilməsi məqsədilə qərargah və onun nəzdində “Qaynar xətt” yaradılıb. İnstitutun binasında müraciət və təklif qutuları asılıb. Bununla yanaşı, institut rəhbərliyi imtahan prosesini müşahidə edəcək və tapşırıqlarını verəcək.

Aİİ-də imtahanlar ictimaiyyətə açıq keçirilir. İmtahan sessiyası dövründə valideynlərin, ictimaiyyət və media nümayəndələrinin iştirakı ilə “açıq qapı” günləri keçiriləcək.

C.Məmmədov valideyn, KİV, qeyri-hökumət təşkilatları və digər ictimaiyyət nümayəndələrinin müraciətlərini dinləmək üçün “açıq qapı” günlərində iştirak etməyə və onları imtahan sessiyasını yaxından izləməyə dəvət edib. O bildirib ki, hər bir rəy və təklif bizim üçün çox dəyərlidir.

Müraciətdə daha sonra deyilir ki, şəffaflığın və obyektivliyin təmin edilməsi məqsədilə rektora və prorektorlara, İctimai Nəzarət Şurasına, Aİİ-nin rəsmi “Facebook” səhifəsinə birbaşa müraciət etmək, Tələbə Gənclər Təşkilatının xətti ilə tələbələrin rəylərini öyrənmək, imtahan qərargahına və apellyasiya komissiyasına müraciət imkanları təmin olunub.

İmtahanların ictimaiyyətə açıq təşkil olunduğunu vurğulayan C.Məmmədov sessiyaya nəzarətin aparıcı təhsil ekspertlərindən, qeyri-hökumət təşkilatlarından, media nümayəndələri və tələbədən ibarət İctimai Nəzarət Şurası tərəfindən həyata keçirildiyini bildirib.

Müəllim-tələbə münasibətlərində şəffaflığın hökm sürməsi üçün tələb olunan bütün zəruri addımların atıldığını və bundan sonra da atılacağını qeyd edən rektor tələbələri dinin mahiyyətini və əsaslarını, milli adət-ənənələrimizi, böyük dövlətçilik irsimizi dərindən öyrənməyə çağırıb. Aİİ rəhbərliyi payız imtahan sessiyasında bütün tələbələrə müvəffəqiyyət arzulayıb. Müraciətdə deyilir: “Biliyinizə, potensialınıza güvənərək əlinizdən gələnin ən yaxşısını etməklə bu yolda hər zaman sizə dəstək olan əzizlərinizi və müəllimlərinizi uğurlu nəticələrinizlə sevindirin”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.