İQTİSADİYYAT
Azərbaycan “İnformasiya Cəmiyyəti üzrə Ümumdünya Sammiti 2017”də təmsil olunur
Bakı, 14 iyun, AZƏRTAC
Xəbər verildiyi kimi, Azərbaycan Beynəlxalq Telekommunikasiya İttifaqının (BTİ) Cenevrə şəhərində keçirilən “İnformasiya Cəmiyyəti üzrə Ümumdünya Sammiti 2017” (WSIS) forumunda təmsil olunur.
Nəqliyyat, Rabitə və Yüksək Texnologiyalar Nazirliyindən (NRYTN) AZƏRTAC-a bildirilib ki, həmin tədbirdə nazir müavini Elmir Vəlizadənin rəhbərlik etdiyi Azərbaycan nümayəndə heyəti iştirak edir. Nümayəndə heyətinə Azərbaycan Respublikası Prezidenti Administrasiyasının, Nəqliyyat, Rabitə və Yüksək Texnologiyalar, Əmək və Əhalinin Sosial Müdafiəsi nazirliklərinin, Azərbaycan İnternet Cəmiyyətinin və Azərbaycan Respublikasının BMT-nin Cenevrə şəhərindəki bölməsində və digər beynəlxalq təşkilatlar yanında daimi nümayəndəliyinin təmsilçiləri daxildir.
NRYTN-dən AZƏRTAC-a bildirilib ki, forum informasiya cəmiyyətinin inkişafı üzrə müsbət təcrübələrin bölüşdürülməsinə, biliklərin yayılmasına, əməkdaşlığın genişlənməsinə, qabaqcıl inkişaf meyillərinin müəyyənləşdirilməsinə xidmət edir.
İyunun 13-də forumun rəsmi açılışı olub. Plenar hissədə Beynəlxalq Telekommunikasiya İttifaqının baş katibi Haolin Zao, BMT-nin digər sahəvi təşkilatlarının rəsmiləri çıxış ediblər.
Yüksək səviyyəli müzakirələrdə Azərbaycan nümayəndə heyəti də iştirak edib.
Sammit çərçivəsində “İnformasiya Cəmiyyəti üzrə Ümumdünya Sammiti - 2017 Mükafatları” müsabiqəsinin qalibləri də mükafatlandırılıb. Belə ki, BTİ tərəfindən cari ilin 30 mart -30 aprel tarixlərində elan edilən müsabiqəyə müxtəlif ölkələrin, o cümlədən Azərbaycanın ayrı-ayrı hökumət və qeyri-hökumət qurumları tərəfindən elektron sistemlərə dair layihələr təqdim olunub. Müsabiqədə iştirak edən 345 layihədən 143-ü dövlət sektoruna, 77-si biznes sektoruna, 56-sı vətəndaş cəmiyyətinə və s. aid olub.
Ümumilikdə, 18 nominasiya üzrə onlayn səsvermə əsasında keçirilən müsabiqə 90 “Çempion layihə” seçilib. Azərbaycandan təqdim olunan layihələrdən Əmək Müqaviləsi Bildirişi üzrə Elektron İnformasiya Sistemi də “İKT Proqramları: E-Məşğulluq” nominasiyası üzrə ən çox səs toplayan ilk 5 layihədən biri olub və “Çempion layihə”lər sırasında yer alıb.
Mükafat Azərbaycan Respublikasının Əmək və Əhalinin Sosial Müdafiəsi Nazirliyinin nümayəndəsinə təqdim olunub.
Bununla da, Azərbaycan İKT-nin uğurlu tətbiqi sahəsində ilk dəfə olaraq BTİ-nin mükafatına layiq görülüb.
Üç ilə yaxındır ki, tətbiq edilən, Əmək Müqaviləsi Bildirişi üzrə Elektron İnformasiya Sistemi Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin operatoru olduğu “Elektron hökumət” portalı üzərindən təqdim olunur. Hazırda xidmət portalda ən çox istifadə olunan xidmətlərdən biridir. Belə ki, 450 elektron xidməti özündə əhatə edən “E-hökumət” portalına ötən dövrdə 47,2 milyona yaxın müraciət qeydə alınıb ki, onlardan 7 milyona yaxını və ya 14,6 faizi məhz Əmək Müqaviləsi Bildirişi üzrə Elektron İnformasiya Sisteminə aid olub.
Qeyd edək ki, forum işini iyunun 16-dək davam etdirəcək. Beynəlxalq tədbirdə Nazirlər toplantısının, çoxsaylı yüksək səviyyəli müzakirələrin və təqdimatların keçirilməsi planlaşdırılır. Azərbaycan nümayəndə heyətinin bu tədbirlərdə fəal iştirakı nəzərdə tutulur.