MƏDƏNİYYƏT


Azərbaycan, İtaliya və Avropa İttifaqının birgə Tvinninq layihəsinin ictimaiyyət üçün hesabat toplantısı keçirilib

Bakı, 15 noyabr, AZƏRTAC

Noyabrın 15-də Azərbaycan Milli İncəsənət Muzeyində növbəti Tvinninq layihəsinin hesabatına həsr olunan tədbir keçirilib.

AZƏRTAS xəbər verir ki, tədbirdə mədəniyyət və turizm naziri Əbülfəs Qarayev çıxış edərək mədəniyyət sektorunun idarə olunmasında Tvinninq layihəsinin əhəmiyyətindən danışıb. Bildirib ki, layihənin məqsədi Avropa İttifaqı ölkələrinin təcrübəsinə və hüquq mexanizmlərinə əsaslanaraq Azərbaycanın mədəniyyət sektorunda islahatlar prosesinə töhfə verməkdir. Layihənin bu günə kimi əldə etdiyi əsas nəticələr, mədəni sərvətlərin ərazi üzrə inteqrativ idarəetmə planlaşdırılmasına yönələn cari fəaliyyətlərin tərəfdaş dövlətlərlə paylaşılmasıdır. Tvinninq layihəsinin məqsədi eyni zamanda diqqəti mədəni irslə bağlı ehtiyaclara yönəltmək və Avropa ölkələrinin müvafiq təcrübə və nümunələrini uyğunlaşdırmaqla mədəniyyət sektorunda daha strateji idarəetmə modeli yaratmaqdır.

Layihənin növbəti dəfə həyata keçirildiyini diqqətə çatdıran nazir bildirib ki, ilk Tvininq layihəsi Avropa İttifaqı tərəfindən maliyyələşdirilən, Mədəniyyət və Turizm Nazirliyinin İtaliyanın Mədəni İrs, Fəaliyyətlər və Turizm Nazirliyi ilə birgə icra etdiyi “Mədəniyyət sektorunun siyasəti və idarə olunması sisteminin modernləşdirilməsində Azərbaycan Respublikasının Mədəniyyət və Turizm Nazirliyinə dəstək” adı altında gerçəkləşib: “İlk layihəyə “Milli turizm marketinq strategiyası” və “Xüsusi turizm zonasının mümkün modeli” mövzuları daxil idi. Budəfəki Tvininq isə mədəniyyət sahəsinin idarə edilməsinin təkmilləşdirilməsini əhatə edir. İtaliya bu layihənin aparıcı tərəfi kimi Azərbaycanda mədəniyyət sektorunun idarə edilməsinə yeni metodların tətbiqinə öz töhfəsini verəcək”.

Əbülfəs Qarayev qeyd etdi ki, Tvinninq layihəsi həyata keçirildiyi müddətdə böyük irəliləyişlərə nail olunub. Bu işə cəlb olunan insanlar layihəyə məsuliyyətlə yanaşırlar: “Bu müddət ərzində bizim nümayəndələr İtaliyaya ezam olunublar. Orada muzey və klubların fəaliyyəti, onların iş üslubu ilə yaxından tanış olaraq bu təcrübənin Azərbaycanda tətbiqi imkanlarını araşdırıblar. Bütün bunlar öz müsbət nəticələrini verməkdədir”.

Nazir regional mədəniyyət və turizm idarələrinin yaradılmasının müsbət nəticələr verdiyini diqqətə çatdıraraq bildirib ki, bu idarəetmə işin düzgün təşkil edilməsi, lazımsız xərclərin azaldılması, yerli orqanların işinin daha fəal qurulmasına şərait yaradıb: “Bizim üçün yeni regional idarələrin öz işini müasir yanaşmalarla həyata keçirməsi çox vacibdir. Odur ki, Tvinninq proqramı çərçivəsində yeni bir təcrübə təqdim edilərək təşkilatlanma prosesinin metodologiyası hazırlanıb. İlkin pilot layihə İsmayıllı Regional Mədəniyyət və Turizm İdarəsində tətbiq ediləcək. Gələcəkdə bu layihə Şəmkir və Lənkəranda, tədricən bütün regionlarda icra olunacaq. Komissiyanın üzvləri regionların strukturunu tam təhlil edərək metodologiyanın tətbiqinə dair fikirlərini bildiriblər. İstəyimiz ondan ibarətdir ki, Azərbaycanda mədəniyyətin idarə edilməsi tək dövlət tərəfindən deyil, geniş ictimai xarakter daşısın. Tvinninqin məqsədlərindən biri də yerlərdə yaradıcı mühitin formalaşdırılmasıdır. Bizim yerlərdə mədəniyyətin idarə edilməsi ümumi regionun yaradıcı mühitinə öz müsbət təsirini göstərməlidir. İdarəetmədə və yaradıcılıqda müasir sistem yaradaraq gələcək nəsillərə ötürməliyik”.

Avropa İttifaqının Azərbaycan nümayəndəliyinin rəhbəri Kestutis Yankauskas bildirdi ki, ittifaqa üzv ölkələrin mədəni irsinin tanıdılması və bu dövlətlərdə mədəniyyətin idarə edilməsində müasir yanaşmaların həyata keçirilməsi təşkilatın qarşısında duran vəzifələrdən biridir: “Bu kontekstdə İslam ölkələrinin mədəni irsinin tanıdılması böyük önəm kəsb edir. Biz çalışırıq ki, bu ölkələrdə yeni metodologiyaları tətbiq və təbliğ edək”.

Azərbaycanın beynəlxalq aləmdə tolerantlıq məkanı kimi tanındığını bildirən K.Yankauskas qeyd etdi ki, ölkənin mədəni irsi çox zəngindir. Mədəniyyət sahəsində idarəetmənin optimallaşdırılması sektorun gəlirlərinin artmasına da şərait yarada bilər.

İtaliyanın ölkəmizdəki səfiri Auqusto Massari diqqətə çatdırıb ki, mədəniyyət fəaliyyətlərin ardıcıllığından ibarətdir. İtaliya dünyada mədəniyyət ölkəsi kimi tanınır: “Biz bu ənənələri yüzilliklər boyu əldə etmişik və mədəniyyətin idarə edilməsi ənənələrini, təcrübəsini paylaşmaqda Avropa Birliyi ilə yaxından əməkdaşlıq edirik. Müasir metodologiyaların tətbiqi ərazi üzrə mövcud resursların daha müasir şəkildə idarə edilməsinə imkan yarada bilər. Tvinninq layihəsinin məqsədlərinə daxil edilmiş mövzularda maliyyə mənbələrinin diversifikasiyası, təhsil sisteminin təkmilləşdirilməsi, mədəni və tarixi abidələrin qorunması, muzey işinin müasirləşdirilməsi məsələləri yer alıb ki, bu da Azərbaycanda mədəniyyət sektorunun idarə edilməsinə öz töhfəsini verəcək”.

Rezident Tvininq müşaviri, İtaliyanın Mədəni İrs, Fəaliyyətlər və Turizm Nazirliyinin nümayəndəsi Alessandro Bianki layihənin benefisiar ölkələr üçün faydalı olduğunu deyib. Bildirib ki, uzun illərin ənənələri müasir tətbiqə çevrilməlidir: “Yeni yaradılan regional idarələr funksional çalışmalıdırlar. Yaradıcı sənayenin inkişafı mütləqdir. Muzey və qalereyalar yenilik axtarışında olmalıdırlar. Artıq vəsaitin əldə edilməsi qabiliyyətini gücləndirmək lazımdır. Tvininqin əsas məqsədi yeni baxış və münasibəti formalaşdırmaqdır”.

Layihənin rəhbəri, Mədəniyyət və Turizm Nazirliyinin beynəlxalq əməkdaşlıq şöbəsinin müdiri Vasif Eyvazzadə bildirib ki, Tvininq layihəsi çərçivəsində 7 təlim səfəri təşkil olunub. Müxtəlif sahələri əhatə edən təlimlər mədəniyyət sistemində dövlət və özəl sektorun tərəfdaşlıq qurumlarının yaradılması, mədəni landşaftın daha güclü mühafizəsi, kitabxana sisteminin təkmilləşdirilməsi və s. məqamlar əhatə edib. Bundan əlavə, layihə çərçivəsində yeni vəsaitlərin cəlb olunması üçün əlverişli fiksal rejimin yaradılması, mədəniyyət və bərpa sahəsində bacarıqların təkmilləşdirilməsi, muzey və mədəniyyət klublarının şəbəkəsinin təkmilləşdirilməsi, qeyri-maddi mədəni irsin mühafizəsinin modernləşdirilməsi mövzuları üzrə işlər həyata keçirilib.

Sonda nazir Əbülfəs Qarayev tədbirdə iştirak edən mədəniyyət sektorunda çalışan məsul əməkdaşlara bir daha layihənin həyata keçirilməsi ilə bağlı tövsiyələrini verdi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.