İQTİSADİYYAT
Azərbaycan Mərkəzi Bankı ilə Dünya Bankının əməkdaşlığının perspektivləri müzakirə olunub
Bakı, 3 iyun, AZƏRTAC
Azərbaycan Mərkəzi Bankı (AMB) ilə Dünya Bankı (DB) arasında əməkdaşlığın perspektivləri müzakirə edilib.
Bankdan AZƏRTAC-a bildirilib ki, Azərbaycanda səfərdə olan Dünya Bankının Cənubi Qafqaz üzrə sabiq regional direktoru xanım Mersi Tembon və yeni regional direktoru Sebastian Molenös ilə Mərkəzi Bankın sədri Elman Rüstəmov arasında görüş keçirilib.
M.Tembon regional direktor vəzifəsində çalışdığı zaman DB tərəfindən Azərbaycanda görülmüş işlər barədə məlumat verib. Sonra Dünya Bankının Cənubi Qafqaz ölkələri üzrə yeni regional direktorunu təqdim edərək onun DB-nin fəaliyyətinin müxtəlif istiqamətlərində geniş təcrübəyə malik olduğunu qeyd edib.
Mərkəzi Bankın sədri E.Rüstəmov ölkəmizlə 25 ildən çox olan əməkdaşlığı dövründə inkişafın bütün istiqamətlərində Dünya Bankından Azərbaycana göstərilmiş hərtərəfli maliyyə, təşkilati, texniki və intellektual dəstəyin əhəmiyyətini vurğulayıb. E.Rüstəmov bu istiqamətdə M.Tembonun DB-nin Cənubi Qafqaz ölkələri üzrə rəhbərlik etdiyi dövrdə həyata keçirdiyi fəaliyyəti də yüksək qiymətləndirib.
E.Rüstəmov yeni regional direktor S.Molenösə Azərbaycanda fəaliyyətində uğurlar arzulayıb. O, ölkədəki makroiqtisadi vəziyyət, iqtisadiyyatın şaxələnməsi və qeyri-neft sektorunun inkişafı, ölkənin xarici mövqeyi, Mərkəzi Bankın pul və məzənnə siyasəti məsələləri və bu sahədə həyata keçirilən islahatlar barədə ətraflı məlumat verib. Həmçinin qlobal və regional iqtisadi çağırışlar fonunda Azərbaycanın DB ilə əməkdaşlığının daha da dərinləşəcəyinə və ölkəmizin Dünya Bankının institusional təcrübəsindən faydalanacağına əminliyini ifadə edib.
M.Tembon son illər Azərbaycan Hökuməti tərəfindən dayanıqlı iqtisadi artımın təmin olunmasında özəl sektorun iştirakının genişləndirilməsi ilə ölkə iqtisadiyyatının şaxələndirilməsi istiqamətində mühüm səylərin göstərildiyini deyib. O, Dünya Bankının Azərbaycanda fəaliyyətinin uğurla davam olunmasına, həmçinin keçirdiyi tədbirlərə göstərdiyi dəstəyə görə Mərkəzi Bankın sədrinə təşəkkürünü bildirib. Eyni zamanda, S.Molenös ilə də faydalı əməkdaşlıq həyata keçiriləcəyinə əminliyini bildirib.