ELM VƏ TƏHSİL


Azərbaycan Milli Elmlər Akademiyasının Naxçıvan Bölməsində ötən il geniş tədqiqatlar aparılıb

Bakı, 14 fevral, AZƏRTAC 

Azərbaycan Milli Elmlər Akademiyası (AMEA) Rəyasət Heyətinin növbəti iclasında AMEA-nın Naxçıvan Bölməsinin sədri, akademik İsmayıl Hacıyev bölmənin 2017-ci ildəki elmi və elmi-təşkilati fəaliyyətinə dair hesabatla çıxış edib.

AZƏRTAC xəbər verir ki, İ.Hacıyev mühüm nəticələrə dair statistik məlumatları diqqətə çatdırıb. Bildirilib ki, bölmə üzrə altı elmi istiqamətdə altı prоblemi əhatə edən yeddi mövzuda 34 iş 79 mərhələdə yerinə yetirilib. 2017-ci ildə bölmə əməkdaşlarının 33 monoqrafiyası, 17 kitabı, iki atlası, iki dərsliyi, bir kitabçası, bir metodik vəsaiti nəşr edilib, həmçinin 515 elmi məqalə, 190 konfrans materialı və 6 tezis olmaqla 767 elmi əsər çapdan çıxıb. Əsərlərdən biri monoqrafiya, biri kitab, 90-ı elmi məqalə, 72-si konfrans materialı, biri tezis olmaqla 165 elmi əsər xaricdə işıq üzü görüb. İmpakt faktorlu jurnallarda dərc olunan elmi məqalələrin sayı isə 45-dir.

Qeyd edilib ki, AMEA Rəyasət Heyəti tərəfindən təsdiqlənən plana uyğun olaraq, tədqiqat işlərinə yeni elmi tələblərlə yanaşılıb, Naxçıvanın tarixi, mədəniyyəti, ədəbiyyatı, folkloru, incəsənəti, təbii sərvətləri, flora və faunası, torpaq örtüyü sistemli şəkildə öyrənilib. Hesabat ilində bölmədə ölkə başçısının 11 fərman və sərəncamı, Azərbaycan Respublikası Nazirlər Kabinetinin 16 qərar və sərəncamı, Naxçıvan Muxtar Respublikasının Ali Məclisi və Nazirlər Kabinetinin 23 fərman, sərəncam və qərarı, AMEA-nın altı sərəncam və qərarı icra edilib.

Akademik İ.Hacıyev bölməyə daxil olan elmi müəssisələrdə həyata keçirilən tətbiqyönümlü işlər haqqında məlumat verib. Bildirilib ki, Darıdağ arsenli suyundan quru qalığın alınması üçün istehsal şəraiti yaradılıb, eyni zamanda, Biləv zəy süxurundan üç birləşmənin alınması istiqamətində geniş tədqiqatlar aparılıb. Naxçıvan Muxtar Respublikası ərazisində yem, dərman, efir yağlı, boyaq əhəmiyyətli, bəzək-bağçılıq üçün yararlı, bal verən, yeyilən yabanı qida bitkiləri, aşı maddəli, lifli, kitrəli, qlükozidli, alkaloidli, saponinli, flavanoidli, vitaminli, kosmetik olmaqla, ümumilikdə 27 faydalı bitki qrupu müəyyənləşdirilib. Bioresurslar İnstitutunun laboratoriyasında steril şəraitdə qurudulmuş dərman bitkilərindən ibarət qarışıqlar hazırlanması üçün sertifikatlar alınıb. Dərman bitkilərindən xüsusi seçilmiş reseptlərə əsasən qarışıqlar hazırlanaraq qablaşdırılıb, bölmənin “Yaşıl aptek”inə, eyni zamanda, muxtar respublikada fəaliyyət göstərən bəzi apteklərə verilib.

Elmlə təhsilin inteqrasiyasından danışan akademik vurğulayıb ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının elm, ali və orta ixtisas təhsili müəssisələri ilə ümumtəhsil məktəbləri arasında əlaqələrin təşkili haqqında” müvafiq sərəncamına uyğun olaraq 54 elmi dərəcəli əməkdaş muxtar respublikanın 38 ümumtəhsil məktəbində təşkil olunan nümunəvi dərslərdə iştirak edib, həmçinin 11 əməkdaş interaktiv dərs keçib.

İ.Hacıyev beynəlxalq əməkdaşlıq və qrantlar haqqında da məlumat verib. Qeyd edilib ki, ötən il Türkiyə, ABŞ, Fransa, Rusiya, Ukrayna, Qazaxıstan, İran və digər ölkələrin elm və təhsil müəssisələri ilə sıx əməkdaşlıq qurulub. İki respublika səviyyəli qrant layihəsinin icrasının başa çatdığını bildirən akademik bir beynəlxalq və üç respublika səviyyəli qrant layihəsinin icrasının davam etdirildiyini söyləyib.

Elektron elmin vəziyyəti haqqında məlumat verən alim bildirib ki, ötən il bölmənin www.ameanb.nakhchcivan.az elektron portalında mühüm hadisələr, maraqlı məlumat, keçirilən tədbirlər və digər informasiyalar yerləşdirilib. İl ərzində bölmənin elmi kitabxanasında müxtəlif elm sahələrinə aid 227 kitabın elektron variantı hazırlanıb.

Akademik kadr hazırlığının hesabat ilində də davam etdirildiyini, bölmə əməkdaşlarından bir nəfərin elmlər doktoru, yeddisinin fəlsəfə doktoru elmi dərəcəsi, ikisinin isə dosent elmi adı aldığını söyləyib. Qeyd edib ki, hazırda bölmədə 23 doktorant və 26 dissertant tədqiqatlarını davam etdirir.

Təltif və mükafatlardan danışan İ.Hacıyev bildirib ki, bölmə əməkdaşları tərəfindən hazırlanan “Naxçıvan tarixi” çoxcildliyi 2017-ci ildə Naxçıvan Muxtar Respublikası Ali Məclisi Sədrinin müvafiq sərəncamına əsasən elm sahəsində Naxçıvan Muxtar Respublikası mükafatına, həmçinin AMEA-nın müxbir üzvü H.Qədirzadənin “Dünya və insan: başlanğıcın sonu, sonun başlanğıcı” kitabı Ali Məclis Sədrinin mükafatına layiq görülüb. Eyni zamanda, bölmənin bəzi əməkdaşları respublika və beynəlxalq səviyyəli mükafatlar alıblar.

Məruzə dinlənidikdən sonra müzakirələr aparılıb, suallar cavablandırılıb.

Rəyasət Heyəti hesabatın təsdiqi və AMEA-nın illik hesabatına salınmasına dair qərar qəbul edib. Bölməyə ölkə başçısının “Naxçıvan şəhərinin İslam mədəniyyətinin paytaxtı” elan olunması haqqında sərəncamı ilə əlaqədar qarşıya qoyulan vəzifələrin icrası istiqamətində müvafiq tədbirlərin həyata keçirilməsi, həmçinin “Azərbaycan Xalq Cümhuriyyətinin 100 illik yubileyi haqqında” və “1918-ci il azərbaycanlıların soyqırımının 100 illiyi haqqında” müvafiq sərəncamların icrası ilə əlaqədar Tədbirlər Planında nəzərdə tutulmuş işlərin yerinə yetirilməsi və digər məsələlərlə bağlı tapşırıqlar verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.