Bakı, 25 yanvar, AZƏRTAC

Azərbaycan Milli Xalça Muzeyi bu gün dünyanın aparıcı muzeyləri ilə sıx əməkdaşlıq edir. Bu əməkdaşlıq nəticəsində muzeylər arasında imzalanmış Anlaşma memorandumlarına əsasən xarici muzeylərdə Azərbaycan xalçalarından ibarət tematik sərgilər və mühazirələr təşkil olunur, mədəniyyət sahəsində birgə layihələr həyata keçirilir, elmi konfranslar təşkil olunur, xarici kolleksiyalarda qorunan Azərbaycan xalçaları üzərində elmi-tədqiqat işləri aparılır, xalçalarımız kataloqlaşdırılır. Bütün bunlar Azərbaycan Respublikasının Prezidenti İlham Əliyevin xalça sənətinin qorunması, saxlanılması və inkişaf etdirilməsi sahəsində imzalanmış sərəncamlarına əsasən həyata keçirilir.

AZƏRTAC xəbər verir ki, ölkəmizin muzey tarixində ilk dəfə olaraq Azərbaycan Milli Xalça Muzeyi Afrika-Ərəb regionuna daxil olan Mərakeş muzeyləri ilə əməkdaşlıq əlaqələri qurub.

Mərakeş Krallığının ölkəmizdəki səfirliyi və bu ölkənin Milli Muzeylər Fondunun dəstəyi ilə Mərakeşdə səfərdə olan Azərbaycan Milli Xalça Muzeyinin direktoru Şirin Məlikova bir sıra görüşlər keçirib, əməkdaşlıq protokolu imzalayıb.

Mərakeş Krallığının Mədəniyyət, gənclər və idman naziri Əlhəsən Abyaba ilə görüşdə nazir iki ölkənin mədəniyyətini birləşdirən proqramın hazırlanmasını təklif edib. Proqram çərçivəsində ölkələrimizin musiqisi, muzey işi və milli mədəni irsin təbliği sahəsində müxtəlif layihələrin keçirilməsi nəzərdə tutulub.

Görüşdə Ş.Məlikova Azərbaycan Respublikasının Mədəniyyət naziri Əbülfəs Qarayevin salamlarını ona çatdırıb, ölkəmizdə dövlət tərəfindən siyasi-iqtisadi və mədəni sahədə, xüsusilə milli irsin qorunması istiqamətində aparılan uğurlu işlər barədə ətraflı məlumat verib, iki ölkə arasında mədəni əlaqələrin qurulması, birgə layihələrin həyata keçirilməsi məsələlərini müzakirə edib.

Sonda Milli Xalça Muzeyinin 50 illik fəaliyyətinə həsr olunmuş kitab Mərakeş nazirinə hədiyyə olunub.

Səfər zamanı Mərakeş Milli Muzeylər Fondunda da görüş keçirilib. 2011-ci ildə yaranmış Mərakeş Milli Muzeylər Fondunun məqsədləri ölkədə muzey sahəsinin inkişafı, muzey kadrlarının yetişdirilməsi, dünyada tanınmış muzey sərgilərinin Mərakeşdə nümayiş olunması, ölkə incəsənətinin dünyaya təbliğidir. Bu günə qədər təşkilat tərəfindən beş muzey fəaliyyətə başlayıb. Onların sırasında Tarix və Sivilizasiyalar Muzeyi, VI Məhəmməd Müasir İncəsənət Muzeyi və Milli Fotosənəd Muzeyi (Rabat şəhəri), Dar Al Başa Muzeyi və Dar Si Said Xalça və Toxuculuq Muzeyi (Marrakeş şəhəri) qeyd etmək olar. Təqdirəlayiq haldır ki, muzeylər tarixi binalarda yerləşdirilərək onların bərpası və qorunması da həyata keçirilir. Bütün quruculuq və konsepsiya işləri yerli mütəxəssislər tərəfindən reallaşdırılır.

Bu gün Mərakeş Milli Muzeylər Fondu dünyanın Quqqenhaym, Dövlət Ermitajı, Çin Milli Muzeyi, Luvr, Orsey, Jorj Pompidu Mədəniyyət Mərkəzi kimi mədəniyyət ocaqları ilə əməkdaşlıq edir, birgə layihələr həyata keçirir. Sevindirici haldır ki, bu muzeylər sırasında Azərbaycan Milli Xalça Muzeyi də var.

Azərbaycan Milli Xalça Muzeyinin direktoru Şirin Məlikova Mərakeş Milli Muzeylər Fondunun prezidenti Mehdi Qotbi ilə görüş keçirib. İkitərəfli görüşdə birgə layihələr müzakirə olunub və əməkdaşlıq memorandumu imzalanıb. Qeyd edək ki, muzey sahəsində Azərbaycanda ilk dəfə Mərakeş muzeyləri ilə əməkdaşlıq sazişi imzalanıb. Fondun prezidenti Mehdi Qotbi bildirib ki, dost Azərbaycanın milli mədəni irsi, adət-ənənələri və müasir incəsənəti 44 milyon əhalisi olan Mərakeş Krallığında böyük maraqla qarşılanacaq. Bu gün dünyada xalça sahəsində qabaqcıl muzeylərdən biri olan Azərbaycan Milli Xalça Muzeyi tərəfindən tekstil eksponatlarının qorunması, sərgilənməsi və bərpa təcrübəsinin Mərakeş muzeylərində tanıdılması, Azərbaycan-Mərakeş ənənəvi xalça toxuculuğu üzrə mübadilə proqramları, birgə sərgilərin keçirilməsi məsələləri müzakirə olunub.

Mərakeş Milli Muzeylər Fonduna “Ənənəvi texnologiya” şöbəsində hazırlanan “Malıbəyli” xalçası və muzeyin nəşrləri – “Azərbaycan Xalça Muzeyi 50”, “Azərbaycan Xalça Muzeyinin kolleksiyasından bədii tikmələr” və “Lətif Kərimov” kitabları hədiyyə edilib.

Mərakeş Krallığına səfər zamanı Şirin Məlikova Rabat şəhərində fəaliyyət göstərən muzeylər – Tarix və Sivilizasiyalar Muzeyi, VI Məhəmməd Müasir İncəsənət Muzeyi ilə tanış olub. Müasir İncəsənət Muzeyinin direktoru Abdelaziz El İdrissi ilə görüşdə bu muzeylərdə birgə layihələrin keçirilməsi, iki ölkənin xalça irsinin təbliği məqsədi ilə sərgilərin təşkili haqqında fikir mübadiləsi aparılıb.

Qeyd edək ki, VI Məhəmməd Müasir İncəsənət Muzeyi Mərakeşin aparıcı muzeyidir. Burada Fransanın Luvr və Orsey, Jorj Pompidu Müasir İncəsənət muzeyləri, İspaniyanın Pablo Pikasso Muzeyinin sərgiləri keçirilib, Rabat incəsənət biennaleləri təşkil olunur.

Mərakeş Krallığına səfər çərçivəsində Azərbaycan Milli Xalça Muzeyinin direktoru Şirin Məlikova Marrakeş şəhərinin Dar El Başa Muzeyi, Dar si Said xalça və toxuculuq muzeyi, bərbər tayfalarına həsr olunan muzeyi və İv San Loran muzeyinin ekspozisiyası ilə tanış olub. Dar El Başa Muzeyi və Dar Si Said Xalça və Toxuculuq Muzeyinin direktoru Salima Aitmbareklə görüşdə iki mədəniyyət ocağı arasında gələcək əməkdaşlıq, o cümlədən xalça toxuculuğu üzrə ustad dərsləri və mühazirələrin mübadilə proqramları, bizim və bərbər tayfalarının xalçaçılıq sənəti sahəsində mədəni irsin elmi araşdırılması müzakirə olunub.

Qeyd edək ki, Marrakeş şəhəri ölkənin turist paytaxtı sayılır. Bura il ərzində çoxsaylı qonaqlar gəlir, beynəlxalq musiqi və film festivalları təşkil olunur, bunun nəticəsində muzeyləri ziyarət edən qonaqlar sırasında dünya şöhrətli simalar da var.

Mərakeş Krallığının mədəniyyət ocaqları və Azərbaycan Milli Xalça Muzeyinin əməkdaşlığı iki dost xalq arasında mədəni əlaqələrin inkişafına böyük təkan verəcək.