İQTİSADİYYAT


Azərbaycan-Misir iqtisadi əlaqələri genişlənir

Misirdə səfərdə olan Azərbaycan nümayəndə heyəti bu ölkənin Baş naziri və Qəlubiyyə vilayətinin qubernatoru ilə görüşüb

Qəlubiyyə, 22 fevral, AZƏRTAC

Azərbaycanın iqtisadiyyat naziri, Azərbaycan Respublikası ilə Misir Ərəb Respublikası arasında Hökumətlərarası İqtisadi, Texniki və Elmi əməkdaşlıq üzrə Müştərək Komissiyanın həmsədri Şahin Mustafayevin rəhbərlik etdiyi nümayəndə heyəti Misirdə səfərdədir.

AZƏRTAC xəbər verir ki, səfərin ilk günü Azərbaycan nümayəndə heyəti Azərbaycan parkına gələrək ulu öndər Heydər Əliyevin burada ucaldılan abidəsini ziyarət edib, önünə gül dəstələri düzüb.

Nümayəndə heyəti Azərbaycan parkı və parkda fəaliyyət göstərən kitabxana ilə tanış olub, kitabxanaya ölkəmiz haqqında kitab bağışlayıb.

Sonra nazir Şahin Mustafayev və nümayəndə heyətinin üzvləri Qəlubiyyə vilayətinin qubernatoru Məhəmməd əl Əşməui ilə görüşüblər. Görüşdə Azərbaycan-Misir əlaqələrinin uğurla davam etdiyi, əməkdaşlığın inkişafı üçün geniş imkanların olduğu vurğulanıb, ölkələrimizin regionları arasında əlaqələrin genişləndirilməsinin önəmi diqqətə çatdırılıb, regionlararası əməkdaşlıq məsələləri müzakirə edilib. Qeyd edək ki, Misirin Qəlubiyyə vilayəti ilə Azərbaycanın Abşeron rayonu qardaşlaşmış rayonlardır.

Daha sonra nümayəndə heyətinin Misirin Baş naziri Şərif İsmayıl ilə görüşü olub. Görüş zamanı ölkələrimiz arasında əlaqələrin inkişaf etdiyi, yüksək səviyyəli qarşılıqlı səfərlərin əməkdaşlığın genişlənməsində xüsusi əhəmiyyəti vurğulanıb. İndiyədək 50-dək qarşılıqlı səfərin həyata keçirildiyini qeyd edən Şahin Mustafayev Azərbaycan nümayəndə heyətinin Misirə bu səfərinin də əlaqələrin inkişafına töhfə verəcəyinə əminliyini bildirib. Diqqətə çatdırılıb ki, ölkələrimiz arasında müxtəlif sahələrdə imzalanmış 50-yə yaxın sənəd iqtisadi sahədə əlaqələrin inkişafına geniş imkanlar açır. Ölkələrimizin ticarət, investisiya, enerji, turizm, sosial və sair sahələrdə əməkdaşlıq etdiyini diqqətə çatdıran nazir Şahin Mustafayev əlaqələrin genişləndirilməsi perspektivlərinə dair fikirlərini bölüşüb. Vurğulanıb ki, ticarət əlaqələri, xüsusilə də Azərbaycan məhsullarının Misirə ixracını genişləndirmək mümkündür. Həmçinin Misir şirkətləri yükdaşımalarında Azərbaycanın tranzit potensialından - Bakı-Tbilisi-Qars dəmir yolu, Bakı Beynəlxalq Dəniz Ticarət Limanı və Transxəzər marşrutundan yararlana bilərlər.

Baş nazir Şərif İsmayıl Azərbaycan nümayəndə heyətinin Misirə səfərindən məmnunluğunu ifadə edib, ölkəsinin Azərbaycanla əlaqələrin genişləndirilməsində maraqlı olduğunu vurğulayıb, əməkdaşlığın genişləndirilməsi istiqamətlərinə dair fikirlərini bildirib.

Rabil Kətanov

AZƏRTAC-ın xüsusi müxbiri

Qəlubiyyə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.