SİYASƏT


Azərbaycan Ordusu istənilən döyüş tapşırığını yerinə yetirməyə qadirdir

Bakı, 12 oktyabr, AZƏRTAC

“Əsgər oğul, ürəyini aç mənə” aksiyası çərçivəsində Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru, siyasi elmlər doktoru, professor, Milli Məclisin deputatı Elman Nəsirov ölkəmizin qərb bölgəsində, Azərbaycan-Ermənistan dövlət sərhədində torpaqlarımızın müdafiəsində dayanan Vətən əsgərlərinin qonağı olub.

Müdafiə Nazirliyinin mətbuat xidmətindən AZƏRTAC-a bildiriblər ki, səmimiyyətlə qarşılanan E.Nəsirov və digər qonaqlar hərbi qulluqçular üçün yaradılan sosial-məişət, xidmət şəraiti, eləcə də silah və hərbi texnikalarla tanış olub, əsgərlərlə görüşüb, onların qayğı və problemləri ilə maraqlanıblar.

Layihənin müəllifi, Müdafiə Nazirliyinin zabiti, Əməkdar İncəsənət Xadimi, Prezidentin fərdi təqaüdçüsü Abdulla Qurbani bir aydan da artıq davam edən bu aksiyanın şəxsi heyətin döyüş ruhunun mənəvi-psixoloji hazırlığının və vətənpərvərlik hissinin daha da yüksəlməsində əhəmiyyətli rol oynadığını nəzərə çatdırıb. Qeyd olunub ki, aksiyaya qoşulan elm, mədəniyyət, ədəbiyyat xadimləri, deputatlar, ictimaiyyət nümayəndələri tez-tez birlik, birləşmə və hərbi hissələrdə olur, şəxsi heyətlə fərdi və kompleks söhbətlər aparır, görüşlər keçirir və hərbçilərimizi qələbəyə ruhlandırırlar.

Deputat E.Nəsirov bir ay ərzində üç dəfə müxtəlif bölgələrdə olduğunu bildirib və hər dəfə bir yeniliklə qarşılaşdığını fərəh hissi ilə vurğulayıb. Qeyd edib ki, güclü Azərbaycan Ordusu istənilən döyüş tapşırığını, hücum əməliyyatını yerinə yetirməyə qadirdir, şəxsi heyətin döyüş ruhu yüksəkdir. Ordumuz ən müasir silah və sursatlarla, zirehli texnikalarla, zenit-raket qurğuları, hərbi hava qüvvələri və s. vasitələrlə təchiz olunub.

“Bütün bunlar Azərbaycan Prezidenti, Ali Baş Komandanın ordu quruculuğuna göstərdiyi diqqət və qayğının, Müdafiə Nazirliyi rəhbərliyinin qarşıya qoyulmuş vəzifələri uğurla həyata keçirməsinin nəticəsində mümkün olub. Həqiqətən də Azərbaycan Ordusu istənilən anda aprel döyüşlərini təkrarlamağa hazır və qadirdir. Biz hamımız bu gün buna bir daha əmin olduq”, - deyə E.Nəsirov bildirib.

Sonra qonaqlar əsgərlərlə birlikdə nahar edib, ön səngərlərdə olub və fəxri döyüş növbəsində dayanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.