Bakı, 12 dekabr (AZƏRTAC). Dekabrın 12-də Heydər Əliyev Mərkəzində Azərbaycan Respublikasının Prezidenti İlham Əliyevin adından Ümummilli Liderin vəfatı günü ilə əlaqədar ehsan verilmişdir.

Prezident İlham Əliyev, xanımı Mehriban Əliyeva, ölkəmizin bütün şəhər və rayonlarından ictimaiyyətin nümayəndələri mərasimdə iştirak etmişlər.

Ehsan mərasimi Qurani-Kərimdən ayələrin oxunması ilə başladı.

Dövlətimizin başçısı mərasimdə çıxış etdi.

Prezident İlham Əliyevin

çıxışı

- Bu gün ulu öndər Heydər Əliyevin anım günüdür. On il bundan əvvəl Vətən öz böyük oğlunu itirmişdir. Ancaq bu on ilin hər bir ili Heydər Əliyev siyasətinin təntənəsi ili olmuşdur. Çünki bu on ildə Heydər Əliyev siyasəti davam etdirilmiş, Azərbaycan uğurla inkişaf etmişdir.

Heydər Əliyev böyük tarixi şəxsiyyətdir. Müstəqil Azərbaycanın qurucusudur, onun banisidir. Azərbaycan 1991-ci ildə Sovet İttifaqının dağılması nəticəsində dövlət müstəqilliyinə qovuşmuşdur. Ancaq 1993-cü ilə qədər Azərbaycanı müstəqil dövlət saymaq düzgün olmazdı. Müstəqil dövlətin bir neçə əlaməti vardır ki, onların heç biri Azərbaycanda yox idi. Azərbaycan müstəqil xarici siyasət apara bilmirdi, başqa dövlətlərin təsiri altında idi. Müstəqil iqtisadiyyat, demək olar ki, yox idi, ümumiyyətlə, iqtisadiyyat dağılmış vəziyyətdə idi. Dövlətçiliyin əsasları yaradılmamışdı. Belə olan halda Azərbaycanı 1993-cü ilə qədər müstəqil dövlət saymaq düzgün olmazdı.

Məhz Heydər Əliyevin müdrikliyi, siyasəti nəticəsində Azərbaycan, sözün əsl mənasında, müstəqil dövlətə çevrilmişdir. Ona görə biz hamımız haqlı olaraq Heydər Əliyevi Azərbaycan dövlət müstəqilliyinin qurucusu kimi qəbul edirik və Heydər Əliyevin tarix, xalq qarşısında gördüyü işlər içərisində bu, ən böyük xidmətdir.

1993-cü ildə Azərbaycan xalqı böyük müdriklik göstərmiş, ölkəmiz, xalqımız üçün ən ağır anlarda Heydər Əliyevə müraciət etmiş, onu hakimiyyətə dəvət etmişdir. Nə üçün? Bir neçə səbəb var idi. İlk növbədə, Heydər Əliyevin 1970-1980-ci illərdə gördüyü işlər xalqın yaddaşında yaşayırdı. Azərbaycan 1970-ci ilə qədər sovet məkanında ən geridə qalmış respublika idi. Heydər Əliyevin fəaliyyəti nəticəsində 1980-ci illərin əvvəllərində sovet miqyasında ən qabaqcıl respublikaya çevrilmişdi. O illər xalqın yaddaşında yaşayırdı. Eyni zamanda, xalqımız üçün ən ağır anlarda Heydər Əliyev daim xalqın yanında idi. 20 Yanvar faciəsi zamanı da o, öz haqq səsini ucaltmışdır. O vaxt Sovet İttifaqının süqutuna hələ iki il vaxt qalmışdı. Ancaq Heydər Əliyev öz cəsarətli səsini ucaltmışdır, sovet rəhbərliyinin bu cinayətini pisləmişdir, onu qınamışdır. Sovet rəhbərliyini ittiham etmişdir, Kommunist Partiyasından imtina etmişdir, onun sıralarını tərk etmişdir və əsl liderlik keyfiyyətləri nümayiş etdirmişdir. Məhz Heydər Əliyevin qərarı ilə Azərbaycanın milli bayrağı - Azərbaycan Xalq Cümhuriyyətinin üçrəngli bayrağı Naxçıvanda dövlət bayrağı kimi elan edilmişdir.

Bütün bunlar onu göstərir ki, ictimai-siyasi quruluşdan asılı olmayaraq, Heydər Əliyev bütün dövrlərdə əsl lider, əsl öndər idi. Məhz buna görə 1993-cü ildə - xalqımızın ən ağır anlarında xalq ona üz tutmuş, hakimiyyətə dəvət etmiş və ondan sonra Azərbaycanın sabitlik və inkişaf dövrü başlamışdır. Dövlətçiliyin əsasları qoyuldu, müstəqil Azərbaycanın Konstitusiyası qəbul edildi, ciddi islahatlara start verildi. Azərbaycan beynəlxalq aləmdə öz möhkəm yerini tuta bilmişdir. Ölkə daxilində aparılan islahatlar ölkəmizin inkişafını təmin etmişdir. Azərbaycan dövləti çox dərin milli köklər, milli dəyərlər üzərində qurulmuşdur. 1993-2003-cü illərdə Azərbaycanın sürətli inkişafı bugünkü reallıqları da təmin etmişdir. Məhz o illərdə aparılan siyasət nəticəsində Azərbaycan inkişaf yoluna qədəm qoydu, beynəlxalq aləmdə daxili siyasətlə bağlı olan bütün məsələlərdə öz prinsipial mövqeyini nümayiş etdirdi, dünyada böyük hörmətə malik oldu. Ölkə daxilində başlanan islahatlar dövlətimiz üçün həlledici rol oynamışdır.

Ondan sonrakı dövrdə də Heydər Əliyev siyasəti davam etdirilmişdir. 2003-2013-cü illərdə Azərbaycan dünya miqyasında ən sürətlə inkişaf edən ölkə kimi tarixdə qalmışdır. Bu inkişafın təməli məhz Ulu Öndər tərəfindən qoyulmuşdur. Sadəcə olaraq, biz Ulu Öndərin siyasətinə sadiq qalaraq onun siyasətini yaşatmışıq, zənginləşdirmişik və Azərbaycanı inamla irəliyə aparmışıq.

Son on il ərzində istənilən istiqamət üzrə böyük nailiyyətlər, nəticələr, uğurlar vardır. Azərbaycan dünya birliyinin böyük dəstəyi ilə dünyanın ən mötəbər qurumu olan BMT Təhlükəsizlik Şurasına üzv seçilmişdir. Azərbaycan iqtisadi sahədə dünya miqyasında ən sürətlə inkişaf edən ölkə olmuşdur. Bütün istiqamətlər üzrə nəticələr göz qabağındadır. Bakı dünyanın ən gözəl şəhərlərindən birinə çevrilmişdir. Bizim rayonlarımızın abadlaşması proqramı uğurla icra edilmişdir. Regionların sosial-iqtisadi inkişafı Dövlət proqramları uğurla icra edilmişdir. Biz kosmik dövlətə çevrilmişik. Artıq Azərbaycan peyki fəzaya qaldırılmışdır. Biz energetika, nəqliyyat sahələrində ölkəmiz üçün, dünya üçün vacib olan layihələri icra etmişik ki, bu layihələr xalqımızın, ölkəmizin uğurlu yaşaması üçün bundan sonra onilliklər ərzində xidmət göstərəcəkdir.

Bütün bu nailiyyətlərin əldə edilməsində başlıca şərt Heydər Əliyev siyasətinə olan sədaqətimizdir. On il bundan əvvəl Azərbaycan xalqına söz vermişdim ki, əgər mənə etimad göstərilərsə, mən bu siyasətə sadiq qalacağam, bu yoldan dönməyəcəyəm. Şadam ki, verilən bütün sözlər həyatda öz əksini tapmışdır. On il ərzində Heydər Əliyev siyasəti yaşadı, inkişaf etdi, Heydər Əliyevin əziz xatirəsi Azərbaycan xalqının qəlbində yaşadı.

Son 20 il ərzində Azərbaycanın əldə etdiyi uğurlar bu gün dünyada öyrənilir, tədqiq edilir, müxtəlif məqalələr, elmi əsərlər yaradılır və Azərbaycanın uğurlu inkişafının sirləri araşdırılır. Mənə dəfələrlə bu məsələlərlə bağlı suallar verilir ki, Azərbaycan son illər ərzində belə böyük inkişafa necə nail ola bilmişdir?!

Əlbəttə ki, bu barədə çox danışmaq olar. Bu gün sadəcə olaraq demək istəyirdim ki, öz xalqına bağlı olmaq, xalqı sevmək lazımdır. Dövlətə bağlı olmaq lazımdır. Müstəqilliyi hər şeydən üstün tutmaq lazımdır və Heydər Əliyev kimi lider olmaq, ona oxşamaq lazımdır. O, öz müdrikliyi, cəsarəti ilə Azərbaycan xalqının sevgisini qazanmışdır. Ən ağır məqamlarda Azərbaycan xalqı əmin idi ki, Heydər Əliyev müstəqilliyi, dövlət maraqlarını, xalqımızın, dövlətimizin maraqlarını qoruyacaq və xalqımızın inkişafı ilə bağlı ən düzgün qərar verəcəkdir. Xalqın inamı ona əlavə güc verirdi. Ona imkan verirdi ki, ölkə maraqlarını daha da böyük uğurla müdafiə etsin. Xalqla iqtidar arasındakı birlik bizim uğurlarımızın əsas səbəbidir. Çünki bizim siyasətimizin təməlində Azərbaycan xalqı, Azərbaycan vətəndaşı, onun problemləri, onun qayğıları dayanır. Belə olan halda əlbəttə ki, uğurlar da olacaqdır. Düşünülmüş siyasət aparılmalıdır, xalqla iqtidar arasındakı birlik möhkəm olmalıdır və əlbəttə ki, müasir dünyada, dünya xəritəsində layiqli yer tutmaq üçün cəsarətli siyasət aparılmalıdır.

Bütün bunları biz Heydər Əliyevdən öyrənmişik, öyrənirik, öyrənəcəyik. Gənc nəsil də vətənpərvərlik ruhunda tərbiyə alır. Gənc nəsil də gələcəkdə bu yolla getməlidir. Heydər Əliyev siyasəti davam etdirilməlidir. Ölkəmizin xoşbəxt gələcəyi üçün bu siyasətin alternativi yoxdur. Mən bunu on il bundan əvvəl demişəm, bu gün də deyirəm və həyat bunu təsdiq etdi.

Əgər Azərbaycan 1993-cü ildə, yaxud da ki, 2003-cü ildə başqa yolla getsəydi, ölkəmizi böyük faciələr gözləyərdi. Bizim üstünlüyümüz, xoşbəxtliyimiz ondan ibarətdir ki, Azərbaycan xalqı həlledici anlarda müdriklik göstərərək düzgün seçim etmişdir və bu seçimə sadiqdir. Bu seçim bizim gələcək uğurlarımızı da təmin edəcəkdir.

Bu gün bu ehsan mərasimi Heydər Əliyevin adını daşıyan bu möhtəşəm mərkəzdə keçirilir. Bu mərkəz dünya miqyasında ən gözəl və ən əzəmətli binalardan biridir. Bu mərkəz Heydər Əliyevin xatirəsinə abidədir. Ancaq Heydər Əliyevin xatirəsinə ən böyük abidə müstəqil Azərbaycan dövlətidir.

Bu gün burada hər bir rayondan nümayəndələr, ziyalılar, ağsaqqallar, tanınmış insanlar əyləşiblər. Bu gün bütün Azərbaycan buradadır. Ölkəmizin hər bir rayonunda bu gün ehsanlar verilir, Ulu Öndər yad edilir. Bu gün kədərli bir gündür. On il bundan əvvəl Azərbaycan öz böyük oğlunu itirmişdir. Eyni zamanda, bu gün milli birlik, milli həmrəylik günüdür. Çünki bu gün Azərbaycan xalqı Heydər Əliyev siyasəti ətrafında, onun ideyaları ətrafında daha da sıx birləşmişdir.

Əminəm ki, gələcəkdə bu siyasət uğurla davam etdiriləcəkdir. Bizim qarşımızda bütün yollar, bütün üfüqlər açıqdır, aydındır. Biz irəliyə gedirik, inkişafa doğru gedirik, bundan sonra da Azərbaycanı Heydər Əliyev siyasəti ilə idarə edəcəyik, Azərbaycan xalqının xoşbəxt gələcəyini bundan sonra da təmin edəcəyik. Allah Ulu Öndərə rəhmət etsin.

X X X

Sonra ehsan süfrəsi açıldı.

X X X

Daha sonra Qafqaz Müsəlmanları İdarəsinin sədri şeyxülislam Allahşükür PAŞAZADƏ çıxış edərək dedi:

- Bismillahir-rəhmanir-rəhim.

Zati-aliləri, möhtərəm Prezident İlham Əliyev həzrətləri.

Möhtərəm Mehriban xanım.

Hörmətli məclis əhli, qonaqlar.

Dünya tarixində elə şəxsiyyətlər vardır ki, o şəxsiyyətlər təkcə öz xalqına, millətinə deyil, bütün bəşəriyyətə mənsub olurlar və bəşəriyyət onlardan örnək alır. Belə şəxsiyyətlərdən biri də ulu öndər Heydər Əliyev həzrətləri idi.

Heydər Əliyev həzrətləri ictimai-siyasi həyatın bütün sahələrində böyük zirvələr fəth etmişdir. Bu, bizim üçün sirr deyil, yaxın vaxtlarda biz hamımız bunun şahidi olmuşuq ki, Azərbaycanda milli qırğın, aclıq, hətta Azərbaycanın parçalanması gündəlikdə idi. Allahın köməyi, xalqın dəstəyi və çağırışı ilə Heydər Əliyev həzrətləri ikinci dəfə Azərbaycana qayıtdı. Nəinki Azərbaycanı parçalanmaqdan qurtardı, yeni Azərbaycanın tarixini yazdı, yaratdı. Bu gün də bu siyasət onun davamçıları tərəfindən davam etdirilir.

Ulu Öndər on ildir ki, cismən bizdən ayrıdır, amma ruhən bizimlədir. Onun dediyi sözlər, onun arzuları, göstərdiyi yol, bizə öyrətdiyi dövlətçilik məktəbi, həyat verdiyi müstəqillik yaşayır və yaşamaqdadır. Əlbəttə ki, Azərbaycan 20 il əvvəlki Azərbaycan deyildir. Azərbaycan bu gün dünyada tanınmış qüdrətli dövlətlərdən birinə çevrilmişdir. Əlbəttə, biz bu nailiyyətləri dövlətimizin rəhbərinin sayəsində əldə etmişik.

Məni bir məsələ də çox sevindirir ki, dövlətin təməli nə qədər möhkəmlənirsə, nə qədər qüdrətli olursa, dövlətimizin rəhbəri mənəvi həyata da çox böyük önəm verir. Dünən Gürcüstandan, həmçinin Dərbənddən Krasnodara qədər dini liderlər mənə zəng etdilər, Prezident həzrətləri, Sizə və bütün Azərbaycan xalqına başsağlığı verdilər. Onlar bu anım gününü qeyd edirlər, Quran oxunur, dualar edilir. Əlbəttə, tarix budur. Tarixi yaradanlar özləri də sonra tarixə çevrilirlər. Bu gün Heydər Əliyev həzrətlərinin özü bizim üçün bir tarixdir. Bayaq Prezident həzrətləri buyurdu, bu əzəmətli binanın özü də Heydər Əliyev həzrətlərinin adını daşıyır. Əlbəttə, bu, onun xatirəsinin əbədiləşdirilməsi deməkdir.

Dünyada Heydər Əliyevin arzularının gerçəkləşməsində dövlətçiliyimizi, irsimizi, mədəniyyətimizi dünya səviyyəsinə qaldıran Heydər Əliyev Fondunun və Mehriban xanımın böyük zəhmətləri vardır. Allah-Taala ona bu işdə yardımçı olsun.

Mən bir məsələni də demək istəyirəm. Burada həmişə dövlət tədbirləri keçirilir. Dövlət rəhbərləri, prezidentlər burada olur, konfranslar keçirilir. Amma mən bir sirri də sizə açmaq istərdim ki, Prezidentimizlə məsləhətləşəndə Ulu Öndərin xatirəsini anım gününü burada keçirməyi məsləhət gördü. Dedi, mən adi insanlarla, ağsaqqallarla, ağbirçəklərlə, möminlərlə birlikdə süfrə arxasında əyləşmək istəyirəm. Bu, Prezidentimizin dinindən, dilindən, milliyyətindən asılı olmayaraq bütün Azərbaycan xalqının Prezidenti olmasının daha bir dəlilidir.

Bu mənəvi həyatı, Prezident həzrətləri, bizə yaşatdığınıza görə mən bütün buradakı iştirakçılar adından Sizə minnətdarlığımı bildirirəm. Bu, bizim yadımızdan çıxmaz. Bu, bizim üçün böyük bir tarixdir. Allah-Taala Sizin verdiyiniz bu ehsanları qəbul etsin, inşallah! Allah-Taala ulu öndər Heydər Əliyev həzrətlərinə rəhmət etsin! Allah-Taala onun ömür-gün yoldaşı Zərifə xanıma rəhmət etsin! Allah-Taala bütün şəhidlərə rəhmət etsin!

Amma Ulu Öndərin böyük arzularından biri də Qarabağ torpaqlarının azad olunması idi. Allah-Taala bizə Prezidentimizin rəhbərliyi ilə tezliklə o torpaqların azadlığını və oralarda da anım günü keçirməyi nəsib etsin.

Bir daha mən Allah-Taaladan Ulu Öndərə rəhmət diləyirəm. Bütün Azərbaycan xalqına dövlətimizin rəhbəri başda olmaqla xoşbəxtlik arzu edirəm.

X X X

Ehsan mərasimi şeyxülislam Allahşükür Paşazadənin Fatihə surəsini oxuması ilə başa çatdı.