Azərbaycan Prezidenti buradan Ankaranın “Əsri məzarlıq” qəbiristanına yola düşdü. Xalqımızın görkəmli oğlu Məmməd Əmin Rəsulzadə həmin qəbiristanda dəfn olunmuşdur. Heydər Əliyev M.Ə.Rəsulzadənin məzarı üstünə gül dəstəsi qoydu, onun xatirəsini birdəqiqəlik sükutla yad etdi.

“Anıtkabır” məqbərəsinin və “Əsri məzarlıq” qəbiristanının ziyarət edilməsində Azərbaycanın xarici işlər naziri H.Həsənov və digər rəsmi şəxslər iştirak edirdilər.

Fevralın 8-də günortadan sonra Türkiyə Cümhuriyyəti Prezidentinin iqamətgahı “Çankaya” köşkündə Azərbaycan Respublikasının Prezidenti Heydər Əliyevin rəsmi qarşılanma mərasimi keçirildi. “Çankaya” köşkü Azərbaycanın və Türkiyənin dövlət bayraqları ilə bəzədilmişdi. Azərbaycan dövləti başçısının şərəfinə fəxri qarovul dəstəsi düzülmüşdü. Heydər Əliyevi gətirən avtomobil iqamətgahın ərazisinə daxil olan kimi onu Süleyman Dəmirəl və həyat yoldaşı qarşıladılar. Sonra hər iki Prezident fəxri kürsüyə qalxdı. Toplardan atılan yaylım atəşlərinin sədaları altında Azərbaycanın və Türkiyənin dövlət himnləri ifa olundu. Fəxri qarovulun rəisi prezidentlərə raport verdi.

Hər iki ölkənin prezidentləri fəxri qarovulun qarşısından keçərkən Azərbaycanın və Türkiyənin dövlət bayraqları önündə bir anlıq ayaq saxladılar və təzim etdilər. Heydər Əliyev fəxri qarovulu “Mərhəba, türk əsgəri!” sözləri ilə salamladı.

Rəsmi qarşılanma mərasimi başa çatdıqdan sonra H.Əliyev və S.Dəmirəl mətbuat işçiləri üçün bəyanat verdilər.

S.Dəmirəl dedi: Azərbaycan Respublikasının Prezidenti, əziz dostum və qardaşım, hörmətli Heydər Əliyevi Türkiyədə qarşılamağı özümə böyük şərəf bilirəm. Azərbaycan müstəqillik əldə etdikdən sonra ölkələrimiz arasında ikitərəfli qarşılıqlı münasibətləri inkişaf etdirmək üçün hər cür şərait yaranmışdır. Ermənistanın zor gücünə Azərbaycan torpaqlarını qəsb etməsi bizdə böyük narahatlıq doğurur. Türkiyə bütün dövlətlər arasında mübahisəli məsələlərin sülh yolu ilə həll olunmasına tərəfdardır. Ona görə də biz Ermənistanın qəsbkarlıq hərəkətlərini pisləyirik. Azərbaycanın öz ərazi bütövlüyünü qoruyacağına inanırıq.

Biz Azərbaycanla Ermənistan arasında münaqişənin həlli ilə bağlı ATƏM çərçivəsində həyata keçirilən tədbirlərdə Azərbaycanın mövqeyini həmişə müdafiə etmişik və yenə də müdafiə edəcəyik.

Türkiyə dövləti Azərbaycanın ədalətli müharibəsində onun mənafeyini digər beynəlxalq təşkilatlarda da həmişə qoruyub və yenə də qoruyacaqdır.

70 illik həsrətdən sonra Türkiyə Azərbaycana çağdaş demokratik bir dövlət kimi tam imkanları ilə kömək edəcəkdir. Əminəm ki, bu səfər zamanı ölkələrimiz arasında bağlanacaq müqavilələr qardaş xalqlarımızı bir-birinə daha da yaxınlaşdıracaq, əlaqələrimizi bir daha möhkəmləndirəcəkdir.

Süleyman Dəmirəl axırda dedi:

- Sayın Cümhurbaşqanı, hörmətli qonaqlar! Sizləri Türkiyədə salamlamaqdan hədsiz məmnunam və bundan çox böyük həzz alıram, bəxtəvərlik duyuram.

Heydər Əliyev öz bəyanatında dedi:

- Hörmətli Prezident! Əziz dostum və qardaşım Süleyman Dəmirəl!

Hörmətli türkiyəli dostlarımız və qardaşlarımız!

Mən bu gün Türkiyə torpağında, Türkiyədə olduğum üçün özümü çox xoşbəxt hesab edirəm. Dostum və qardaşım Süleyman Dəmirələ məni Türkiyəyə rəsmi səfərə dəvət etdiyinə görə təşəkkürümü bildirirəm.

Bizim ölkələrimiz – Türkiyə və Azərbaycan dost və qardaş ölkələrdir. Xalqlarımız arasındakı birlik, dostluq və qardaşlıq əlaqələri əsrlərdən-əsrlərə keçərək formalaşmış və bu gün özünün yeni mərhələsinə çatmışdır.

Azərbaycan Respublikası indi müstəqil bir dövlətdir və öz ölkəsinin, xalqının, sərvətlərinin sahibidir. Azərbaycanın müstəqilliyini dünya ölkələri sırasında ilk dəfə Türkiyə tanımışdır. Bu da Azərbaycanın dünya birliyi, dünya dövlətləri tərəfindən tanınmasında mühüm rol oynamışdır.

Türkiyə ilə Azərbaycan arasında son illər yaranmış mehriban münasibətlərdən bəhs edən H.Əliyev dedi ki, bu əlaqələr son vaxtlar daha da inkişaf edir, yeni yaranmış müstəqil respublikamız Türkiyənin yardımını, köməyini daim hiss edir. Bu fürsətdən istifadə edib xalqımız, respublikamız adından və öz adımdan türk xalqına, Türkiyə Cümhuriyyətinə, Türkiyədəki dostlarımıza, qardaşlarımıza, Prezident Süleyman Dəmirələ minnətdarlığımızı və təşəkkürümüzü bildirirəm.

Azərbaycan müstəqil dövlət kimi öz ilk addımlarını atır. Respublikamızın qarşısında çoxlu problemlər var. Azərbaycan öz müstəqilliyini çətin yollarla qurur, yaradır. Azərbaycanda demokratik dövlət, hüquqi demokratik cəmiyyət qurmaq prosesi çox əzmlə inkişaf edir.

Heydər Əliyev daha sonra dedi:

- İndi qarşıda duran ən mühüm problem Azərbaycanı Ermənistanın təcavüzündən xilas etməkdir. Bu təcavüz altı ildir ki, davam edir və Azərbaycan torpaqlarının bir qismi Ermənistan Silahlı Qüvvələri tərəfindən işğal olunmuşdur. Bunun bir sıra obyektiv və subyektiv səbəbləri vardır. Ancaq xalqımız yaxşı bilir ki, Azərbaycanı müdafiə etmək üçün Türkiyənin səsi həmişə gur gəlib. Türkiyənin köməyi Azərbaycan üçün həmişə mənəvi dayaq olub və biz bu gün də bu mənəvi dayaqdan, yardımdan istifadə edirik.

Azərbaycan sülh tərəfdarıdır və sülhsevər siyasət aparır. Biz müharibəyə də sülh yolu ilə son qoymaq, xalqımızı bu müharibədən xilas etmək istəyirik. Heydər Əliyev bir daha bildirdi ki, həmin yolda çox addımlar atmışıq, bu gün də atırıq. Beynəlxalq təşkilatların köməyinə ümid bəsləmişik, yenə də ümid bəsləyirik. Böyük dövlətlərin təşəbbüsünə həmişə inanmışıq, bu gün də inanırıq. Bir neçə vaxt öncə ABŞ, Rusiya və Türkiyə müharibənin, süni surətdə yaradılmış bu problemin həlli ilə əlaqədar təşəbbüs irəli sürmüşdülər. Biz bu təşəbbüsü də bəyənmişik, alqışlamışıq, onun həyata keçməsinə çalışırıq.

Heydər Əliyev daha sonra dedi ki, biz dünya dövlətlərinin, beynəlxalq təşkilatların, dostumuz və qardaşımız Türkiyənin köməyi ilə bu məsələlərin sülh yolu ilə həll olunmasına tərəfdarıq. Ancaq Azərbaycan ordusu artıq formalaşmaqdadır. Xalqımızda vətənpərvərlik ruhu yüksəlib. Azərbaycan vətəndaşları, ordumuz torpaqlarımızı düşməndən müdafiə etmək üçün indi qanlı döyüşlər aparırlar.

Bizim başqa bir dövlətə, o cümlədən Ermənistana qarşı torpaq iddialarımız yoxdur. Ancaq indi biz BMT tərəfindən qəbul olunmuş, təsdiq edilmiş Azərbaycan Respublikasının ərazilərinin bütövlüyünü təmin etmək istəyirik. İndi müharibə Azərbaycan ərazisində gedir. Ermənistan Silahlı Qüvvələri Azərbaycan torpağındadırlar. Onların Azərbaycan torpaqlarından çıxarılması üçün biz ədalətli müharibə aparırıq. Azərbaycan xalqı, ordumuz özünün cəsarətini və qəhrəmanlığını artıq göstərib. Sizi əmin edirəm ki, bundan sonra da belə cəsarət və qəhrəmanlıq göstərəcəkdir. Biz sülh yolunu əsas tutaraq, həm də ədalətli müharibə aparırıq.

H.Əliyev dedi:

- Bu məsələlərdə bizim türkiyəli qardaşlarla görüşməyə, danışıqlar, məsləhətləşmələr aparmağa həmişə ehtiyacımız olub. Bu səfər, ziyarət vaxtı da hər iki ölkə arasında iqtisadi, ticarət, elmi-texniki, humanitar və başqa məsələlər barədə danışıqlar gedəcəkdir. Biz əlaqələrimizin daha da inkişaf edib dərinləşdirilməsi məsələsini, habelə Ermənistanın Azərbaycan torpaqlarına təcavüzü haqqında məsələni burada müzakirə etmək fikrindəyik. Bu barədə Türkiyə Cümhuriyyəti rəhbərlərinin məsləhətinə bizim ehtiyacımız vardır.

Axırda Heydər Əliyev buraya dəvət olunduğu üçün Türkiyə Prezidentinə bir daha minnətdarlığını bildirdi, türkiyəli dostların hamısına Azərbaycan xalqının səmimi salamı, məhəbbəti və hörməti olduğunu söylədi.

Rəsmi bəyanatlardan sonra prezidentlər təkbətək görüşdülər.

“Çankaya” köşkündə Heydər Əliyevin və Süleyman Dəmirəlin başçılıq etdiyi nümayəndə heyətləri arasında danışıqlar başlandı. Danışıqlarda iki dövlət arasında imzalanacaq sənədlər müzakirə olundu.

Fevralın 8-də Azərbaycan Respublikasının Prezidenti Heydər Əliyev öz iqamətgahında Türkiyənin Baş naziri Tansu Çilləri qəbul etdi.

Həmin axşam H.Əliyev Türkiyənin “Ana Vətən” Partiyasının sədri Məsud Yılmaz, daha sonra isə Alparslan Türkeş ilə görüşdü.

Fevralın 8-də axşam Süleyman Dəmirəl “Çankaya” köşkündə Azərbaycan Respublikasının Prezidenti Heydər Əliyevin şərəfinə böyük ziyafət verdi. Prezidentlər ziyafətdə nitq söylədilər, hər iki xalqın dostluğu və qardaşlığı şərəfinə sağlıq dedilər.