İQTİSADİYYAT
Azərbaycan “Şərq Tərəfdaşlığı ölkələri üzrə innovasiya siyasəti indeksi”nə dair görüşdə təmsil olunub
Bakı, 7 mart, AZƏRTAC
Azərbaycan “Şərq Tərəfdaşlığı ölkələri üzrə innovasiya siyasəti indeksi”nə dair əlaqələndirici şəxslərin görüşündə təmsil edilib.
Nəqliyyat, Rabitə və Yüksək Texnologiyalar Nazirliyindən (NRYTN) AZƏRTAC-a bildirilib ki, martın 5-6-da Minskdə Birləşmiş Millətlər Təşkilatının Avropa İqtisadi Komissiyasının (UNECE) təşkilatçılığı ilə “Şərqi Avropada və Qafqazda yenilikçi, yüksək artımlı müəssisələrin təşviqi” mövzusunda seminar keçirilib. Eyni zamanda, UNECE-nin təşkilatçılığı ilə “Şərq Tərəfdaşlığı (Eastern Partnership) ölkələri üzrə innovasiya siyasəti indeksi”nə dair əlaqələndirici şəxslərin (Focal Point) görüşü keçirilib.
Belarus Respublikasının Prezidenti yanında Dövlət İdarəçilik Akademiyasının ev sahibliyi etdiyi görüşdə Şərq Tərəfdaşlığı ölkələri üçün innovasiya siyasəti indeksinin əhatə etdiyi Azərbaycan da daxil olmaqla 6 dövləti təmsil edən Milli Əlaqələndiricilər iştirak ediblər.
Görüşdə Milli Əlaqələndirici qismində iştirak edən Nəqliyyat, Rabitə və Yüksək Texnologiyalar Nazirliyinin informasiya cəmiyyətinin və elektron idarəçiliyin innovativ inkişafı şöbəsinin müdiri Rəşad Əzizov çıxışında üzv dövlətlərdə mövcud innovasiya siyasəti, eləcə də innovasiya siyasətinin maraqlı tərəfləri kimi çıxış edən dövlət orqanları arasında koordinasiyasının qiymətləndirilməsi, innovativ ideyaların stimullaşdırılması və dəstəklənməsi sahəsində görülən işlər barədə məlumat verib.
Qeyd edək ki, “Şərq Tərəfdaşlığı” ölkələri üzrə innovasiya siyasəti indeksi” layihəsinin məqsədi Şərqi Avropa və Qafqaz ölkələrindəki innovasiya siyasətinin, innovativ institutlar və proseslərin miqyas və keyfiyyətinin qiymətləndirilməsindən ibarətdir.