Bakı, 25 iyun, AZƏRTAC

Yarandığı gündən ilk dəfədir ki, Azərbaycan Silahlı Qüvvələri ildönümünü qalib ordu kimi qeyd edir. Bu şanlı qələbənin qazanılmasında Prezident, Müzəffər Ali Baş Komandan İlham Əliyevin rəhbərliyi ilə güclü dövlət və ordu quruculuğu strategiyasının uğurla reallaşdırılması çox mühüm rol oynayıb. Hər il dövlətimiz müdafiə və təhlükəsizlik xərclərinə xeyli vəsait ayırır. Artıq Azərbaycanın sürətlə inkişaf edən müdafiə sənayesi yaradılıb. Azərbaycan tərəfdaşlıq etdiyi ölkələrlə hərbi-texniki və hərbi təhsil sahələrində sıx əməkdaşlıq edir. Silahlı Qüvvələrimiz ən müasir silah və texnika ilə təchiz edilib.

Bunu hərbi ekspert Ədalət Verdiyev AZƏRTAC-a müsahibəsində deyib.

Azərbaycan Silahlı Qüvvələrinin yaradılmasının 103-cü ildönümü ilə bağlı danışan hərbi ekspert bildirib: “Ordu quruculuğunda atılan uğurlu addımlar və Vətən müharibəsində ən mürəkkəb ərazidə və çətin relyef şəraitində həyata keçirilən döyüş əməliyyatları Azərbaycan Silahlı Qüvvələrinin dünyada ən güclü ilk 50 ordu sırasında yer almasının növbəti göstəricisi oldu. İkinci Qarabağ müharibəsi zamanı Azərbaycan xalqının Silahlı Qüvvələrə inamı da bu Qələbənin qazanılmasında mühüm əhəmiyyət daşıyıb. Qələbənin qazanılması üçün hər bir vətəndaşımız əlindən gələni etməyə çalışdı. Həmin dövrdə on minlərlə vətəndaşımız müqəddəs mübarizədə iştirak etmək üçün Səfərbərlik və Hərbi Xidmətə Çağırış üzrə Dövlət Xidmətinin yerli idarə və şöbələrinə müraciət edərək ordu sıralarına yazıldı. Bu və digər səbəblərdən orduya cəlb edilməyənlər təminat və təchizat məsələlərində əsgərlərimizə dəstək olmaq üçün cəbhə bölgələrinə axışdılar. Hər bir kəndin, qəsəbənin, rayonun, şəhərin azad edilməsi xalqımız üçün əsl bayrama çevrildi. Ötən ilin payızından indiyədək Silahlı Qüvvələrimiz hər gün hədəflərinə doğru inamla irəliləməkdə davam edir”.

Vətən müharibəsində Azərbaycan Ordusunun üzərinə düşən bütün vəzifələri şərəflə, yüksək dəqiqliklə və vaxtında yerinə yetirdiyini vurğulayan Ədalət Verdiyev qeyd edib ki, Silahlı Qüvvələrimizin şəxsi heyəti Vətən uğrunda apardığımız haqlı mübarizədə böyük qəhrəmanlıqlar göstərməklə özünün qalib döyüşçü obrazını dünya ictimaiyyətinə qəbul etdirdi. Bu Qələbənin əldə olunmasında şəhid və qazilərimiz müstəsna xidmətlər göstəriblər. Vətən torpağı uğrunda canını, qanını əsirgəməyən əsgərimiz ən müasir Azərbaycan tarixində yeni bir şanlı səhifə yazdı. Bu səhifədə Azərbaycan xalqının adı çox böyük hərflərlə şəhidlərimizin qanı ilə yazıldı. Şəhidlərimizin keçdiyi döyüş yolu bütün vətəndaşlarımız, xüsusilə də gənc nəsil üçün ciddi nümunədir. Şəhidlərin dəfn mərasimlərində onların valideynlərinin “Vətən sağ olsun!” ifadəsi isə erməni işğalçılarına daha sarsıdıcı zərbə oldu.

“Prezident, Müzəffər Ali Baş Komandan İlham Əliyevin rəhbərliyi ilə Silahlı Qüvvələrimiz və xalqımız “Dəmir yumruq” kimi vahid Qarabağ azadlıq konsepsiyası ətrafında birləşərək ordumuzun tarixi missiyasını uğurla həyata keçirməsinə şərait yaratdı. Son nəticədə Azərbaycanın ərazi bütövlüyü təmin olundu. ABŞ, Almaniya, Yaponiya, Rusiya, Böyük Britaniya və İtaliya kimi böyük ölkələrin hərbi dairələri və ekspertləri, nüfuzlu beyin mərkəzləri XXI əsrdə reallaşdırdığı yeni nəsil müharibənin əsas qəhrəmanı olan Azərbaycan Ordusunun yüksək döyüş potensialını hələ də müzakirə edir. Vətən müharibəsi zamanı ordumuz bir çox yeniliklərə imza atmaqla mövcud hərbi əməliyyatlar konsepsiyasını ciddi dəyişikliklərə məruz qoydu. İllər keçəcək, tarix dəyişəcək, amma Azərbaycan Ordusunun Vətən müharibəsindəki döyüş təcrübəsi uzun müddət hərbi beyin mərkəzlərinin əsas müzakirə mövzularından biri olacaq”, - deyə hərbi ekspert bildirib.