CƏMİYYƏT


Azərbaycan Silahlı Qüvvələri bütün dünya azərbaycanlılarının qürur və güvənc yerinə çevrilib

Bakı, 26 iyun, AZƏRTAC

Azərbaycan Respublikasının müstəqilliyinin və ərazi bütövlüyünün keşiyində dayanan Ordumuz Azərbaycan Xalq Cümhuriyyətinin varisidir. Müsəlman Şərqində ilk demokratik respublika olan Azərbaycan Xalq Cümhuriyyəti Hökumətinin 1918-ci il 26 iyun tarixli qərarı ilə Müsəlman Korpusunun adı dəyişdirilərək Əlahiddə Azərbaycan Korpusu adlandırıldı və bununla da Silahlı Qüvvələrin yaradılmasına başlandı. Həmin tarixdən artıq 104 il ötür.

Azərbaycan Respublikası 1991-ci ildə öz müstəqilliyini yenidən bərpa etdikdən sonra, məlum olduğu kimi, Ermənistanın ərazi iddiaları və silahlı təcavüzü ilə üz-üzə qaldı. Azərbaycan dövlətçiliyinin mövcudluğu və müstəqil inkişafına qarşı ən böyük maneə qonşu Ermənistanın Qarabağ və ətraf rayonları ələ keçirmək niyyəti oldu. Ölkədə güclü ordu, vahid komandanlıq, nizam-intizam olmadığına görə, 90-cı illərdə düşmən havadarlarının hərbi-siyasi dəstəyi ilə torpaqlarımızın bir qismini işğal etdi.

Ümummilli lider Heydər Əliyev hakimiyyətə qayıtdıqdan sonra həyatımızın bütün sahələrini əhatə etmiş böhran aradan qaldırıldı, Silahlı Qüvvələrdə intizamsızlığın, başıpozuqluğun qarşısı alındı, elmi əsaslarla və vahid komandanlıq prinsipi ilə idarə edilən intizamlı ordu quruculuğu prosesi başlandı.

Eyni zamanda, böyük iqtisadi layihələrin gerçəkləşdirilməsi, “Əsrin kontraktı” adlandırılan neft müqaviləsinin imzalanması ölkəyə investisiya axınına səbəb oldu və ordu quruculuğuna da yetərincə diqqət yetirilməsinə imkan yaratdı.

AZƏRTAC xəbər verir ki, bunu Azərbaycan Hərb Tarixi Muzeyinin rəisi, polkovnik Əzizağa Qənizadə deyib.

Polkovnikin sözlərinə görə, Prezident İlham Əliyevin hakimiyyəti illərində isə ümumiyyətlə, ordu quruculuğu prioritet sahə elan edildi. Azərbaycan Silahlı Qüvvələrinin maddi-texniki təchizatı baxımından böyük işlər görüldü, Ordumuz dünyanın ən müasir silah və texnikası ilə təchiz edildi. Hərbi hissələr peşəkarlıq prinsipi ilə komplektləşdirilməyə başladı, təlim və məşqlər nəticəsində döyüş hazırlığı sahəsində yüksək keyfiyyət dəyişiklikləri baş verdi. Silahlı Qüvvələrimiz qısa zaman kəsiyində dünyanın güclü 50 qüdrətli hərbi strukturu sırasına daxil oldu, Cənubi Qafqazda isə ən güclü orduya çevrildi. 2016-cı ilin Aprel döyüşlərində, eləcə də 44 günlük Vətən müharibəsi dövründə Azərbaycan Ordusu nəyə qadir olduğunu düşmənə göstərdi və işğal edilmiş torpaqlarımızı azad etməyi bacardı. Müharibə günlərində Ordumuzun hərb sənətinə gətirdiyi taktiki yeniliklər bu gün dünyanın güc mərkəzlərində diqqətlə öyrənilir. Bu gün fəxrlə deyə bilərik ki, Azərbaycan Silahlı Qüvvələri bütün dünya azərbaycanlılarının qürur və güvənc yerinə çevrilib.

Muzeyin rəisi diqqətə çatdırıb ki, Azərbaycanın Silahlı Qüvvələrinin ölkəmizdə şanlı tarixini öyrənən, Ordumuzun zəfər salnaməsini yaradan təşkilatlar arasında Azərbaycan Hərb Tarixi Muzeyinin özünəməxsus yeri və rolu var: "Muzeyin daxili ekspozisiyasında “Azərbaycan hərb sənəti qədim dövrdən-1918-ci ilədək”, “Azərbaycan Xalq Cümhuriyyəti”, “Azərbaycan hərb sənəti 1920-1939-cu illər”, “İkinci Dünya müharibəsi” “Azərbaycan hərb sənəti 1946-1991-ci illər”, Azərbaycan hərb sənəti müstəqillik dövründə”, “Heydər Əliyev və ordu quruculuğu”, “Azərbaycanın müasir hərbi qüvvələri” adlı zalları fəaliyyət göstərir.

Muzeyin ərazisində açıq səma altında böyük eksponatlar - tanklar, piyada döyüş maşınları, təyyarələr, artilleriya silahları, hava hücumundan müdafiə, hərbi dəniz sistemləri və digər silahlar ekskursantlara nümayiş etdirilir. Muzeyimizdə tez-tez məktəblilər, gənclər, eləcə də qonaqlar üçün ekskursiyalar keçirilir, bundan başqa, xalqımızın hərb tarixinə, əlamətdar günlərə həsr olunmuş konfranslar, dəyirmi masalar, seminarlar və digər tədbirlər təşkil edilir. Azərbaycan Hərb Tarixi Muzeyinin kollektivi xalqımızın hərb tarixini və müasir ordumuzun fəaliyyətini yorulmadan təbliğ edir və Vətənimiz üçün son dərəcə əhəmiyyətli, şərəfli vəzifəni uğurla yerinə yetirməyə çalışır.

Hazırda muzeyimizdə Azərbaycan Ordusunun 44 günlük tarixi zəfərinə həsr edilmiş sərgi hazırlanıb. Burada rəşadətli Azərbaycan əsgərinin döyüş meydanında göstərdiyi şücaət, şəhid və qəhrəmanlarımızın xatirə eksponatları, həmçinin işğalçı Ermənistan ordusunun Qarabağ cəbhələrində atıb qaçdığı silah və hərbi əşyaları qonaqlara nümayiş olunur”.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.