CƏMİYYƏT


Azərbaycan Tibb Universitetində qış imtahan sessiyası davam edir

Bakı, 7 yanvar, AZƏRTAC

Azərbaycan Tibb Universitetində (ATU) 2018-2019-cu tədris ilinin qış imtahan sessiyasına start verilib.

Universitetin mətbuat xidmətindən AZƏRTAC-a bildiriblər ki, yanvarın 7-də ATU-nun rektoru, professor Gəray Gəraybəyli imtahanların gedişi ilə maraqlanıb. Rektor tələbələrin imtahanla bağlı fikirlərini öyrənib. G.Gəraybəyli bu imtahanların artıq yeni sistemlə keçirildiyini bildirib: “İndi hər tələbəyə 50 dəqiqə vaxt verilir. Çünki əvvəlki sistem ilk dəfə imtahan verən birinci kurs tələbələri üçün çətin olurdu. İndi isə tələbələr sınaq və aralıq imtahanlarını da bu sistemlə verirlər. Ona görə də hər hansı bir problem yaşanmır. Tələbələrin müraciəti əsasında bəzi fənlər üzrə sualların tərtibatına diqqət artırılacaq. Bununla yanaşı, gələcəkdə nəzarətçilərin videokameralarla əvəzlənməsi məsələsi də müzakirəyə çıxarılacaq”.

Rektor, həmçinin imtahanın təşkilinin texniki tərəfləri ilə də tanış olub. O, bəzi dəyişikliklərin tətbiqi ilə bağlı öz tövsiyələrini verib.

Bu sessiyanın özəlliyi ondan ibarətdir ki, imtahan üçün fakültələrə konkret gün ayrılmayıb. Yəni tələbələr istənilən gün imtahan verə bilirlər.

Qeyd edək ki, dekabrın 29-da başlayan qış imtahan sessiyası fevralın 5-dək davam edəcək. Bu müddət ərzində 7 minə yaxın tələbə imtahan verəcək. Təkcə dekabrın 29-da 4 minə yaxın tələbə imtahanda iştirak edib. Sessiya dövründə üzrlü səbəbdən imtahanda iştirak edə bilməyən tələbələrin sınağa girməsi üçün şərait yaradılacaq. Tələbə kəsildiyi fənnin kreditinin 25 faizini ödəmək şərtilə təkrar imtahan vermək hüququna malikdir. Bu güzəşt hər semestrdə yalnız 2 fənnə aid edilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.