MƏDƏNİYYƏT
Azərbaycan “XVII Arxeoloji turizm üzrə Aralıq dənizi yarmarkası”nda xüsusi qonaq qismində iştirak edir VİDEO
Oktyabrın 30-da İtaliyanın Paestum şəhərində “XVII Arxeoloji turizm üzrə Aralıq dənizi yarmarkası” işə başlayıb. Əhatə dairəsinə, mövzu və konsepsiyasına görə dünyada yeganə layihə hesab edilən, UNESCO, IKKROM, ICOMOS və Dünya Ticarət Təşkilatı kimi beynəlxalq qurumların tərəfdaşlıq etdiyi yarmarkada bu il Azərbaycan xüsusi qonaq ölkə qismində iştirak edir.
Açılış konfransının moderatoru, yarmarkanın təsisçisi və icraçı direktoru Uqo Pikarellini çıxış edərək bildirib ki, tədbirin məqsədi mədəni irs, inkişaf və inteqrasiya sahələrində əməkdaşlığı təşviq etməkdir. İyirmidən artıq ölkə yarmarka vasitəsilə turizm imkanlarını və adət-ənənələrini təbliğ edir.
Paestumun meri İtalo Voza bildirib ki, tədbir dünyanın müxtəlif şəhərlərinin arxeoloji xüsusiyyətlərini, tarixini və turizm potensialını daha yaxından tanımaq imkanı yaradır. Belə bir tədbirin Poestumda keçirilməsi heç də təsadüfi deyil. Məlum olduğu kimi, bu şəhər qədim tarixi və özünəməxsus arxeoloji özəllikləri ilə məşhurdur.
Azərbaycanın mədəniyyət və turizm nazirinin birinci müavini Vaqif Əliyev ölkəmizin yarmarkada xüsusi qonaq qismində iştirak etməsini əlamətdar hadisə kimi qiymətləndirib. Bildirib ki, böyük tarixi keçmişə malik Azərbaycan irsin insan həyatında, eləcə də dünyada sülhün inkişafındakı rolunu dərk edir. Azərbaycan memarlıq, arxeoloji, qeyri-maddi irsin qorunması və təşviq edilməsi işlərini təkcə ölkəmizdə deyil, eyni zamanda, dünyanın müxtəlif bölgələrində də həyata keçirməkdə maraqlıdır.
Nazir müavini vurğulayıb ki, 1991-ci ildə Azərbaycan dövlət müstəqilliyini bərpa etdikdən sonra zəngin irsini müvəffəqiyyətlə təbliğ etməyə önəm verir. Bu istiqamətdə görülən işlər müsbət nəticələrini verməkdədir. Dünyanın bir çox ölkələrində müxtəlif beynəlxalq təşkilatların əməkdaşlığı ilə irsimizə həsr edilən çoxsaylı tədbirlə keçirilir. Maddi və qeyri-maddi irsimiz UNESCO-nun müvafiq siyahılarına daxil edilib. Azərbaycan öz hüdudlarından kənarda yerləşən əhəmiyyətli irs nümunələrinin bərpasında da fəal iştirak edir. Belə ki, son illərdə ölkəmiz tərəfindən Vatikan katakombalarının və Romanın Kapitolini muzeyinin “Filosoflar zalı”nın bərpasına, eyni zamanda, “Mercati di Traiano” muzeyinin yerləşdiyi ərazidə arxeoloji qazıntı işlərinin aparılmasına dəstək verilib.
V.Əliyev diqqətə çatdırıb ki, Azərbaycanda arxeoloji tədqiqatların aparıldığı 40-dan artıq ərazidə turizm sahəsinin inkişaf etdirilməsi müəyyən olunmuş prioritetlərdən biri hesab edilir. Ölkəmizdə yaradılan arxeoloji park və qoruqların, mədəni landşaftların sayı ilbəil artır. Qeyd edilən işlərin aparılmasında xarici tədqiqatçılarla əməkdaşlıq edilir və bu cür ekspedisiyaların tərkibində çalışan çoxsaylı italyan arxeoloqları da var. Ümumilikdə gənc arxeoloqlar nəslinin yetişdirilməsində və arxeoloji turizmin təşviq edilməsində italiyalı həmkarlarımız bizə kifayət qədər dəstək verir. Azərbaycanın ötən illərdə olduğu kimi, bu il də “Arxeoloji turizm üzrə Aralıq dənizi yarmarkası”nda iştirakı onun turizm imkanlarının təşviqi və bu sahədə əməkdaşlıq əlaqələrinin daha da gücləndirilməsinə xidmət edəcək.
Salerno vilayətinin prezidenti Antonio İannone, bu bölgə üzrə ticarət palatasının prezidenti Guido Arzano, UNESCO-nun baş direktorunun xüsusi müşaviri Munir Buşenaki və başqaları yarmarkanın əsas iş prinsipinin mədəniyyətlərarası dialoqun, sosial inteqrasiyanın və iqtisadi inkişafın əsas faktoru kimi mədəni irs məfhumunun vacibliyini ön plana çıxarmaq olduğunu diqqətə çatdırıblar. Vurğulanıb ki, tədbirdə Azərbaycanın xüsusi qonaq qismində iştirak etməsi bu ölkənin malik olduğu zəngin mədəni irsə, qədim tarixə və dünya mədəniyyətinə verdiyi töhfələrə əsaslanır.
Sonra tədbir iştirakçıları Azərbaycana məxsus stendlə tanış olublar. Ölkəmiz tədbirdə xüsusi qonaq qismində iştirak etdiyi üçün yarmarkanın pavilyonunda qurulan ən böyük stend məhz Azərbaycana məxsus olub. Burada ölkəmizdə aparılan arxeoloji tədqiqatlarla bağlı məlumatlar, o cümlədən “Orta əsr Ağsu şəhəri”, “Orta əsr Şəmkir şəhəri”, “Göytəpə neolit kəndi” və “Qədim Qəbələ” arxeoloji ərazilərinə, eləcə də Qarabağ bölgəsinin arxeoloji irsinə və burada aparılmış tədqiqatlara həsr edilən virtual turların daxil olduğu multimedia məhsulları, “Azərbaycanda arxeoloji tədqiqatlar” mövzusunda ingilis və italyan dillərində kitablar, “Azərbaycan” fotoalbomu və turizm potensialımızın əks edildiyi digər materiallar nümayiş olunub.
Azərbaycan stendini ziyarət edənlər mətbəximizin ləziz şirniyyatlarına qonaq ediliblər. Azərbaycanın milli rəqslərini maraqla izləyən qonaqlar mədəniyyətimizə heyran qaldıqlarını bildiriblər.
Maqsud Dadaşov
AZƏRTAC-ın xüsusi müxbiri
Paestum