ELM VƏ TƏHSİL
Azərbaycan Xalq Cümhuriyyəti xalqımızın azadlıq və istiqlal duyğularının güclənməsində mühüm rol oynayıb
Bakı, 26 may, AZƏRTAC
Azərbaycan Dövlət Pedaqoji Universitetində (ADPU) tarix və coğrafiya fakültəsinin təşəbbüsü və təşkilatçılığı ilə Azərbaycan Xalq Cümhuriyyətinin (AXC) yaradılmasının 100 illiyinə həsr olunmuş tədbir keçirilib.
ADPU-dan AZƏRTAC-a bildirilib ki, tədbirdə çıxış edən rektor Cəfər Cəfərov Prezident İlham Əliyevin Azərbaycan Xalq Cümhuriyyətinin 100 illik yubileyi haqqında və 2018-ci ilin ölkəmizdə “Azərbaycan Xalq Cümhuriyyəti İli” elan edilməsi haqqında imzaladığı sərəncamları xatırladıb. Rektor bildirib ki, AXC qədim və zəngin dövlətçilik tariximizdə, xalqımızın azadlıq və istiqlal duyğularının güclənməsində mühüm rol oynayıb. Azərbaycan Xalq Cümhuriyyəti həyatımızın bir çox sahələrində, o cümlədən elm və təhsil sahəsində mühüm tədbirlər həyata keçirib. Azərbaycan Xalq Cümhuriyyəti bizim qürur mənbəyimizdir. Müstəqil Azərbaycan Respublikası Azərbaycan Xalq Cümhuriyyətinin varisidir.
“Azərbaycan Xalq Cümhuriyyətinin yaranması və süqutu” mövzusunda məruzə ilə çıxış edən ABŞ-ın Prinston Universitetinin professoru Maykl Reynolds Qafqaz və Yaxın Şərq ölkələrinin tarixinin tədqiqi sahəsində apardığı elmi-tədqiqatlar barədə ətraflı məlumat verib. Professor M.Reynolds vurğulayıb ki, Azərbaycan Xalq Cümhuriyyətinin fəaliyyətinin araşdırılması onun apardığı elmi tədqiqatlarda xüsusi yer tutur.
Məhəmməd Əmin Rəsulzadə irsinin tədqiqatçısı, yazıçı-publisist, Azərbaycan Radiosunun “Gecə düşüncə” proqramının müəllifi və aparıcısı Nəcibə Bağırzadə “Məhəmməd Əmin Rəsulzadə və Azərbaycan Cümhuriyyəti” mövzusunda məruzə ilə çıxış edib. O, konkret tarixi faktlar əsasında Məhəmməd Əmin Rəsulzadənin həyat və fəaliyyəti, xalqımızın azadlığı uğrunda apardığı prinsipial mübarizədən danışıb.
Tədbirdə tarix və coğrafiya fakültəsinin Azərbaycan tarixi kafedrasının baş müəllimi Elman Mirzəyev “Şərqdə ilk demokratik dövlət” mövzusunda məruzəsi dinlənilib. Həmin fakültənin tələbəsi Aytək Rəhimli isə təqdimatla çıxış edib.
Beynəlxalq əlaqələr üzrə prorektor Nigar Abbaszadə, tarix və coğrafiya fakültəsinin dekanı, dosent Şahin Pənahov, türk və Şərqi Avropa xalqları tarixi və tarixin tədrisi metodikası kafedrasının baş müəllimi Taleh Cəfərov və başqaları çıxış edərək Azərbaycan Xalq Cümhuriyyətinin fəaliyyəti və onun dövlətçilik tariximizdəki mövqeyi ilə bağlı fikir və mülahizələrini bölüşüblər.