SİYASƏT
Azərbaycan Xalq Cümhuriyyətinin 100 illiyi Kanberra şəhərində qeyd olunub
Kanberra, 24 may, AZƏRTAC
Azərbaycanın Avstraliya İttifaqındakı səfirliyinin təşkilatçılığı və ölkəmizin Avstraliyadakı Fəxri Konsulluğunun dəstəyi ilə Kanberrada Azərbaycan Xalq Cümhuriyyətinin 100 illiyi münasibətilə rəsmi qəbul təşkil edilib.
AZƏRTAC xəbər verir ki, tədbirdə Avstraliya-Azərbaycan parlamentlərarası dostluq qrupunun üzvləri, Xarici İşlər və Ticarət Departamentinin məsul işçiləri, işgüzar dairələrin nümayəndələri, Avstraliya Milli Universiteti nəzdində fəaliyyət göstərən tədqiqat mərkəzlərinin rəhbərləri, Kanberrada akkreditə olunmuş diplomatik missiyaların başçıları, eləcə də bu ölkədə yaşayan soydaşlarımız iştirak ediblər.
Tədbir Azərbaycan və Avstraliyanın dövlət himnlərinin səsləndirilməsi ilə başlayıb.
Azərbaycanın Avstraliya İttifaqındakı müvəqqəti işlər vəkili Elcan Həbibzadə çıxış edərək, müsəlman Şərqində ilk parlamentli respublika olan Azərbaycan Xalq Cümhuriyyətinin yaranma tarixi və fəaliyyəti barədə məlumat verib. O, Cümhuriyyətin yaranmasının Azərbaycanın tarixində mühüm hadisə olduğunu qeyd edib, həmin dövrdə əldə edilən çoxsaylı uğur və nailiyyətlərdən bəhs edib, o cümlədən Azərbaycanın bir sıra Avropa ölkələrindən qabaq qadınlara seçmək və seçilmək hüququ verən ölkə olduğunu və 1919-cu ildə Azərbaycanın ilk universitetinin təsis edildiyini xüsusi vurğulayıb. Diplomat mövcud olduğu qısa müddət ərzində Azərbaycan Xalq Cümhuriyyətinin dövlət quruculuğunda, habelə müasir Azərbaycanın formalaşmasında oynadığı mühüm rol barədə qonaqlara məlumat verib.
1991-ci ildə Azərbaycanın öz dövlət müstəqilliyini bərpa etdiyini qeyd edən E.Həbibzadə müstəqilliyin ilk illərində ölkəmizin iqtisadi böhran, Ermənistanın Azərbaycana qarşı hərbi təcavüzü və bir sıra digər çətinliklərlə üzləşdiyini bildirib. Qeyd edib ki, bütün bu çətinliklərə baxmayaraq, Azərbaycanın ümummilli lideri Heydər Əliyevin qətiyyətli addımları və həyata keçirdiyi düşünülmüş siyasət sayəsində həmin çətinliklər uğurla aradan qaldırılıb və ölkəmiz davamlı inkişaf yoluna qədəm qoyub. Azərbaycanlı diplomat ulu öndər Heydər Əliyevin müəyyən etdiyi inkişaf strategiyasının hazırda Prezident İlham Əliyev tərəfindən uğurla davam etdirildiyini vurğulayıb. Müasir Azərbaycanın multikulturalizm dəyərlərinə söykənən dünyəvi dövlət olduğunu bildirib.
Azərbaycan-Avstraliya əlaqələrinə toxunan diplomat ölkəmizin Avstraliya ilə münasibətlərin inkişafına böyük əhəmiyyət verdiyini qeyd edib. O, Avstraliyanın Azərbaycanın dövlət müstəqilliyini tanıyan ilk ölkələrdən biri olduğunu vurğulayaraq, Avstraliya tərəfinə ölkəmizin suverenliyi və ərazi bütövlüyünə verilən ardıcıl dəstəyə görə təşəkkürünü ifadə edib.
Tədbirdə əsas qonaq qismində iştirak edən Xarici İşlər və Ticarət Departamentinin protokol xidmətinin rəhbəri xanım Lindal Saks (Lyndall Sachs) Avstraliya hökuməti adından Azərbaycan Prezidentini və xalqını bayram münasibətilə təbrik edib.
Tədbirdə çıxış edən Azərbaycanın Avstraliyadakı fəxri konsulu Aydan Rzayeva son illər ərzində iki ölkə arasında əməkdaşlıq əlaqələrinin uğurla inkişaf etdiyini qeyd edib. Azərbaycan-Avstraliya əlaqələrinin inkişafında parlamentlərarası əməkdaşlığın vacib rol oynadığını vurğulayıb. Eyni zamanda, o, son dövrlərdə iqtisadi-ticari sahədə əməkdaşlıq əlaqələrinin genişləndirilməsi istiqamətində də mühüm addımların atıldığını, o cümlədən 2017-ci ilin oktyabrında avstraliyalı iş adamlarından ibarət geniş tərkibli nümayəndə heyətinin Azərbaycana səfər etdiyini xatırladıb.
Avstraliya-Azərbaycan parlamentlərarası dostluq qrupunun sədri Kreq Kelli ötən illər ərzində Avstraliya parlamenti nümayəndə heyətinin tərkibində ölkəmizə həyata keçirdiyi səfərlər ilə bağlı xatirələrini bölüşüb. O, həmin səfərlər zamanı Azərbaycanın son illərdə əldə etdiyi böyük iqtisadi nailiyyətlərin şahidi olduğunu vurğulayıb. K.Kelli qeyd edib ki, ölkəmizin müxtəlif sahələrdə əldə etdiyi uğurlar regiondakı bəzi qonşu dövlətlər üçün nümunə olmalıdır. Eyni zamanda, o, ölkələrimiz arasında dostluq və əməkdaşlıq əlaqələrini bundan sonra da dəstəkləyəcəyini vəd edib.
Azərbaycanın Əməkdar Artisti Sevinc Hüseynlinin ifa etdiyi milli rəqslərimiz tədbir iştirakçıları tərəfindən alqışlarla qarşılanıb.
Tədbirdə Heydər Əliyev Fondu tərəfindən hazırlanmış və Azərbaycanın tarixini, mədəniyyətini, incəsənətini və turizm imkanlarını özündə əks etdirən “Azərbaycan ruhu” (The Spirit of Azerbaijan) və Bakı şəhərinin “Ekspo 2025” Ümumdünya sərgisinə ev sahibliyinə namizədliyini irəli sürməsi ilə bağlı videoçarxlar nümayiş etdirilib, eləcə də iştirakçılara müxtəlif nəşrlər paylanıb.
Sonda qonaqlara Azərbaycanın milli mətbəx nümunələri təqdim edilib.
Vüqar Ağayev
AZƏRTAC-ın xüsusi müxbiri
Kanberra