SİYASƏT
Azərbaycan Xalq Cümhuriyyətinin yaradılmasının 97-ci ildönümü İsrail Dövlətində qeyd edilib
Bakı, 29 may, AZƏRTAC
İsrailin Netaniya şəhərindəki Mədəniyyət evi mayın 28-də əslən Azərbaycandan olanların həqiqi azərbaycançılıq və həmrəylik ocağına çevrilib. Mədəniyyət evində Azərbaycanda doğulub boya-başa çatan insanlar üçün əsl bayram əhval-ruhiyyəsi hökm sürüb. Bu yaxınlarda yaradılmış “Odlar Yurdu” İsrail-Azərbaycan teatr truppasının kollektivi tamaşaçılara Azərbaycan Xalq Cümhuriyyətinin yaradılmasının 97-ci ildönümünə həsr olunmuş təntənəli bayram proqramı təqdim edib.
Əvvəlcə Azərbaycanın və İsrailin dövlət himnləri səslənib. “Odlar Yurdu” İsrail-Azərbaycan teatr truppasının bədii rəhbəri, rejissor Səadət Şükürova ilk demokratik Cümhuriyyətin bütün müsəlman Şərqində və müasir müstəqil Azərbaycanın tarixində böyük tarixi əhəmiyyətindən danışıb.
İsrailin beynəlxalq münasibətlər sahəsində tanınmış eksperti, “Cəmiyyət üçün beynəlxalq layihələr” qeyri-hökumət təşkilatının başçısı Arye Qut müsəlman dünyası ölkələri arasında demokratik hakimiyyət təsisatları olan ilk parlamentli respublika kimi Azərbaycan Xalq Cümhuriyyətinin yaranmasının tarixi üzərində ətraflı dayanaraq deyib: “Müsəlman Şərqində ilk parlamentli respublika – Azərbaycan Xalq Cümhuriyyəti Azərbaycanın qədim dövlətçilik ənənələrini qoruyub saxlayaraq, müasir dövrə xas dövlət təsisatları yaratmağa nail olub. Milli parlamentarizmin təşəkkülü tarixi Azərbaycan parlamentinin 1918-ci il dekabrın 7-də keçirilən birinci iclasından başlayır. Birinci qərarı ilə milliyyətindən, dini etiqadından, sosial vəziyyətindən və cinsindən asılı olmayaraq Azərbaycanın bütün vətəndaşlarına bərabər hüquqlar verən Cümhuriyyətin yaradılması son dərəcə mürəkkəb vəziyyətdə elan edilib. Cəmi 23 ay yaşayan Azərbaycan Xalq Cümhuriyyəti tarixinin hər bir səhifəsi bütün azərbaycanlılara və İsraildə yaşayan Azərbaycandan gəlmələrə çox əzizdir. Bu gün Azərbaycan əsl sivilizasiyalararası dialoq örnəyidir. Mənə istər müsəlman, istərsə də xristian olsun, daha bir ölkə göstərin ki, orada Prezidentin və birinci xanımın himayəsi ilə iki sinaqoq və Cənubi Qafqazda ən böyük yəhudi mərkəzi inşa edilsin. Zənnimcə, siz sadəcə onu tapmayacaqsınız”.
Türkiyənin İsraildəki müvəqqəti işlər vəkili Doğan İşıq İsraildəki Azərbaycan icmasını təbrik edərək deyib: “Mən çox fəxr edirəm ki, bu gün burada - İsraildə, Respublika Günü münasibətilə bu təntənəli mərasimdəyəm. Türkiyə Respublikası ilə Azərbaycan Respublikası arasında dostluq, qardaşlıq əlaqələrinin və geniş əməkdaşlığın böyük tarixi var. Lakin bu münasibətlərin ən əhəmiyyətli hissəsi Azərbaycanın dövlət müstəqilliyini əldə etməsi dövrünə təsadüf edir. Türkiyə ordusu məhz Azərbaycan Xalq Cümhuriyyətinin yarandığı dövrdə Azərbaycan paytaxtını daşnaklardan və bolşeviklərdən azad edib. Azərbaycanın XX əsrin sonunda dövlət müstəqilliyi uğrunda mübarizə aparmasına ən güclü dəstək Türkiyədən gəlib. Azərbaycan dövlət müstəqilliyini elan edəndən sonra onu müstəqil dövlət kimi tanıyan ilk dövlət Türkiyə olub”.
Akko şəhərinin (İsraildə ən çoxsaylı Azərbaycandan gəlmə yəhudi icması burada yaşayır) Azərbaycandan olan dağ yəhudiləri icmasının başçısı Şirin Nexamiya Mixaeli bildirib ki, İsrail Dövləti 20 minlik yəhudi icmasına səmimi və mehriban münasibət bəslənməsində Azərbaycan rəhbərliyinin rolunu yüksək qiymətləndirir. O deyib: “Azərbaycanda antisemitizm yoxdur və heç vaxt da olmayıb. Biz, əslən Azərbaycandan olanlar bu tolerantlıq və multikulturalizm amili ilə həmişə fəxr etmişik. Burada Qırmızı Qəsəbəni xatırlamaq yerinə düşər. Qırmızı Qəsəbə dünyada İsraildən sonra bəlkə də yeganə yerdir ki, burada 5 min yəhudi yığcam yaşayır, Azərbaycan xalqının tolerantlığına gözəl nümunədir və Azərbaycandan gəlmə yəhudilər üçün qürur mənbəyidir”. Şirin Nexamiya Mixaeli Akko şəhərinin meri Şimon Lankri və Dağ Yəhudilərinin Beynəlxalq Xeyriyyə Fondunun (STMEQİ) prezidenti German Zaxaryayevin adından Azərbaycan rəhbərliyini və xalqını bu əlamətdar tarixi bayram – Respublika Günü münasibəti ilə təbrik edib.
Rejissor Səadət Şükürova Azərbaycan xalqının tolerantlığı barədə fikri dəstəkləyərək, Şuşanın müdafiəsi zamanı qəhrəmancaslına həlak olmuş Azərbaycanın Milli Qəhrəmanı Albert Aqarunov haqqında sənədli kadrlar təqdim edib. Tədbir iştirakçıları Azərbaycanın müstəqilliyi və ərazi bütövlüyü uğrunda canlarından keçən qəhrəman şəhidlərin xatirəsini anıblar.
Albert Aqarunovun qardaşı Rantik Aqarunov qardaşının xatirəsinin əziz tutulmasına görə təşəkkür edərək deyib ki, Albert Qarabağdakı qanlı hadisələri öz dərdi və faciəsi kimi qəbul edib. R.Aqarunov vurğulayıb: “Bu, onun torpağı idi. O, həmişə mənə deyirdi: “Bu, mənim milli borcumdur. Mən Vətənimi müdafiə etməyə gedirəm”. Öz Vətəni isə yalnız Azərbaycanı sayırdı”.
İsrail və Azərbaycan yaziçılar ittifaqlarının üzvü, şair Vaqif Əliyev İsraildə Respublika Gününün bayram edilməsinin əhəmiyyətini vurğulayaraq deyib: “Respublika Günü dərin məna və məzmunu ilə seçilir, Azərbaycan dövlətçiliyinin tarixi əhəmiyyətini əks etdirir. Məhz buna görə biz bu gün bu böyük bayramı açıq ürəklə, müstəqil Azərbaycan Respublikasının gələcəyi naminə ümdə arzu və diləklərlə qeyd edirik. Bu gün bura gəlib bu günlərdə yaradılmış “Odlar Yurdu” İsrail-Azərbaycan teatr truppasını, onun gənc aktyorlarını - Sara, Sadıq və Fuad Mirzəyevləri, Aynur, İlkin, Nurlan və Vüsalə Hidayətovları, Könül Əliyevanı, Araz Mirzəyevi, Əli Əliyevi, Eldar və Nuranə Babayevləri, Rəşid Vəliyevi, habelə yorulmaz səylərinə və təşkilatçılıq istedadına görə bədii rəhbər Səadət Şükürovanı dəstəkləyən hər kəsə “Çox sağ ol” demək istəyirəm. Əminəm ki, Azərbaycan xalqı həqiqi oğul və qızlarını tanımalıdır. Siz həqiqi vətənpərvərsiniz, çünki Azərbaycan Xalq Cümhuriyyətinin 97 illiyinə həsr olunmuş bu gecə ən yüksək milli səviyyədə, Azərbaycana layiq şəkildə keçirilib”. Şair V.Əliyev çıxışını Azərbaycan bayrağı haqqında şeiri ilə bitirib.
Çıxışlardan sonra təntənəli gecənin iştirakçılarına birinci Avropa Oyunları haqqında məlumat verilib, Avropa Oyunları haqqında videoklip nümayiş etdirilib. Tədbir Azərbaycan tarixini və mədəniyyətini, müstəqilliyi bərpa olunan vaxtdan əldə olunmuş uğurları əks etdirən filmin nümayişi ilə davam edib.
Qonaqlar “Odlar Yurdu” teatr truppasının ifasında Azərbaycan xalq musiqisini dinləyib, rəqslərə tamaşa ediblər. Onlar zəngin Azərbaycan mətbəxinin yeməklərinin dadına baxıblar. Bayram gecəsindən ayrılan qonaqlar bildiriblər ki, Respublika Günü münasibətilə bayram tədbiri yüksək səviyyədə keçib və onlara elə gəlib ki, doğma və sevimli Azərbaycandadırlar.