ELM VƏ TƏHSİL
Azərbaycan alimlərindən ibarət nümayəndə heyəti Belqrad Universitetinin rəhbərliyi ilə görüşlər keçirib VİDEO
Belqrad, 18 iyun, AZƏRTAC
Azərbaycan Respublikasının Prezidenti İlham Əliyevin “Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” Sərəncamının həyata keçirilməsi çərçivəsində Serbiyanın paytaxtında silsilə tədbirlərə start verilib.
AZƏRTAC xəbər verir ki, Azərbaycan Dillər Universitetinin (ADU) rektoru, akademik Kamal Abdullanın başçılıq etdiyi Azərbaycan alimlərindən ibarət nümayəndə heyəti bu tədbirlər proqramı çərçivəsində iyunun 17-də Belqrad Universitetinin (BU) rəhbərliyi ilə bir sıra görüşlər keçirib.
Universitetin rektoru professor İvanka Popoviç Azərbaycan nümayəndə heyətini qəbul edib. Görüşdə iki ali məktəb arasında əməkdaşlığın geniş spektri, o cümlədən Serbiya və Azərbaycan alimlərinin iştirakı ilə müştərək elmi layihələr hazırlanması, professor-müəllim heyəti üzvlərinin qarşılıqlı səfərləri barədə məsələlər müzakirə edilib. Azərbaycan nümayəndə heyətinin rəhbəri Belqrad Universitetinin rektorunu Azərbaycana səfər dəvət edib.
Sonra Azərbaycandan gəlmiş qonaqlar 2018-ci ilin aprel ayında akademik Kamal Abdullanın təşəbbüsü ilə Belqrad Universiteti nəzdində açılmış Azərbaycan Dili və Mədəniyyəti Mərkəzinin fəaliyyəti ilə tanış olublar.
Qeyd edək ki, həmin ilin may ayında ADU yanında Serb Dili və Mədəniyyəti Mərkəzi açılıb. Bu mərkəzin açılış mərasimində Serbiya Prezidenti, ADU-nun fəxri doktoru Aleksandr Vuçiç iştirak edib.
Elə həmin gün Azərbaycan nümayəndə heyətinin üzvləri Belqrad Universitetinin filologiya fakültəsinin dekanı, professor Lilyana Markoviç ilə də görüşüblər. Görüşdə hər iki Mərkəzin fəaliyyətindən məmnunluq bildirilib, əməkdaşlığı daha da genişləndirməyin zəruri olması qeyd edilib.
Görüşlərdə nümayəndə heyətinin üzvləri – Bakı Dövlət Universitetinin Dünya ədəbiyyatı kafedrasının müdiri professor Cəlil Nağıyev, “Azərnəşr” Azərbaycan Dövlət Nəşriyyatının baş redaktoru, Azərbaycan Yazıçılar Birliyinin üzvü, Əməkdar jurnalist Əlövsət Ağalarov, Belqrad Universiteti nəzdində Azərbaycan Dili və Mədəniyyəti Mərkəzinin rəhbəri, dosent Lalə Məcidova və Serbiyada fəaliyyət göstərən Azərbaycan Mədəniyyəti Mərkəzinin direktoru professor Zərifə Əlizadə iştirak ediblər.
İyunun 18-də və 19-da səfər proqramı çərçivəsində nəzərdə tutulan bir sıra tədbirlər həyata keçiriləcək.
Pərvanə Qarayeva
AZƏRTAC-ın xüsusi müxbiri
Belqrad