İDMAN


Azərbaycan atçılığının zəngin tarixi Vindzora qayıdır

Bakı, 12 may, AZƏRTAC

Böyük Britaniya və Şimali İrlandiyanın Kraliçası Ülyahəzrət II Elizabet dünyanın ən məşhur mahir atçılarından biridir. İlk atı ona dörd yaşında hədiyyə ediblər. Altı yaşında isə miniciliyə başlayıb. Beləliklə, Kraliçanın 87 il misilsiz minicilik təcrübəsi var. O, Cins At Yetişdirənlər Assosiasiyasına himayəlik edir.

Dünyada atların əhilləşdirildiyi ilk regionlardan biri də Azərbaycandır. Azərbaycan xalqının dünya atçılığına bəxş etdiyi, xüsusi cins olan Qarabağ atları yaxşı xasiyyəti, sədaqəti, gücü və sürəti ilə tanınır. Bu növ atlardan qədim Azərbaycan oyunu olan, polodan əvvəl yaranmış, çövkən oyununda da istifadə olunur. Bu oyun UNESCO-nun bəşəriyyətin qeyri-maddi mədəni irsi siyahısına daxil edilib. Kraliça II Elizabetə 1956-cı ildə hədiyyə edilən “Zaman” ləqəbli Qarabağ atı London qəsrinə gətirilmiş ilk Azərbaycan cinsi kimi tarixə düşüb. Təəssüf ki, Dağlıq Qarabağ münaqişəsi nəticəsində onun vətəni işğal edilmişdir. Hazırda atlar Ağdam At Zavodunda yetişdirilir. Qarabağ atları təhlükə altında olan at cinsi sayılır.

Artıq altıncı ildir ki, Avropa Azərbaycan Cəmiyyəti (TEAS) Britaniya monarxlarının şəhər kənarındakı iqamətgahı sayılan Vindzor qəsrində keçirilən ənənəvi Kral Vindzor At Şousuna dəstək verir. 2016-cı ildə Avropa Azərbaycan Cəmiyyətinin (TEAS) təşkilatçılığı ilə Azərbaycan xalqının dünya atçılığına bəxş etdiyi, xüsusi cins olan Qarabağ atları Britaniya Kraliçası II Elizabetin 90 illik yubiley tədbirlərində möhtəşəm şou proqramla təmsil olunmuşdur. Builki tədbir mayın 10–14-də keçirilir.

Avropa Azərbaycan Cəmiyyətinin direktoru Lionel Zetter deyib: “Kral tədbiri ilə əlaqəli olmaq hər zaman qürurverici haldır. Vindzor At Şousu Kral Ailəsi və Britaniya ictimaiyyətinin ən çox sevdiyi tədbirlərdəndir. Böyük Britaniyada atçılıq ənənələri Azərbaycandakı qədər qədimdir və hər il keçirilən bu tədbir həmin ortaq məhəbbəti nümayiş etdirməyə imkan yaradır.”

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.