İQTİSADİYYAT


Azərbaycan bundan sonra da etibarlı qaz təchizatçısı olacaq

Bakı, 24 sentyabr, AZƏRTAC

Azərbaycanda neft-qaz sənayesi böyük tarixə malikdir. 19-cu əsrin əvvəllərindən başlayaraq inkişaf edən bu sahə 1994-cü ildən iqtisadiyyatımız üçün prioritet səhələrindən birinə çevrildi. Müstəqilliyimizi bərpa etdikdən sonra “Azəri”, “Çıraq”, “Günəşli” və digər zəngin yataqlardan hasil olunan neft və qazdan əldə olunan gəlirlərin düzgün idarə olunması və istifadəsi yeni yataqların kəşf edilməsi, qeyri-neft sektorunun inkişafı, bütövlükdə iqtisadiyyatımızın şaxələndirilməsi istiqamətində böyük kömək olub.

Bunu AZƏRTAC-a açıqlamasında Milli Məclisin deputatı Məzahir Əfəndiyev bildirib.

O qeyd edib ki, bir neçə gün əvvəl Prezident İlham Əliyevin iştirakı ilə Azərbaycanın neft-qaz tarixində mühüm əhəmiyyət kəsb edəcək Bakı dərin özüllər zavodunda “Abşeron” yatağının dəniz əməliyyatlarının təməlqoyma mərasimi baş tutub. Bu yatağın istifadəyə verilməsi Azərbaycanın bundan sonra da dünya bazarında etibarlı qaz təchizatçısı olacağının göstəricisidir. Eyni zamanda, bu hadisə yerli və xarici investorların cəlb edilməsini, yeni yataqların işlənilməsini, Dövlət Neft Şirkəti ilə əməkdaşlığın daha da dərinləşməsini zəruri edir. Bu gün daxili tələbatın artımını nəzərə alaraq “Abşeron” yatağından çıxarılacaq qaz, ilk növbədə, ölkədaxili tələbatın ödənilməsi istiqamətində istifadə olunacaq. Həmçinin paralel olaraq yataqda kifayət qədər kondensat ehtiyatının olması neft hasilatı və ixracını da sabit saxlayacaqdır.

“Eyni zamanda onu da qeyd etmək istəyirəm ki, yeniləşən dünyamız bu sahədə də yeni çağırışlara və tendensiyalara cavab verən mükəmməl idarəçilik modelinin tətbiq olunmasını labüd edir və hərtərəfli, paralel inkişaf strategiyasının təkmilləşməsini ortaya qoyur.

Bu baxımdan Xəzər dənizində “Azəri-Çıraq-Günəşli” yatağının işlənilməsinin növbəti mərhələsi başlayacaq. Təqribən 7 milyard dollar dəyərində, gündəlik hasilat gücü 100 000 barrel olan yeni “Mərkəzi-Şərqi Azəri” platformasının 2023-cü ildə istifadəyə verilməsi gözlənilir. Bu neft-qaz sənayesi üçün tarixi bir hadisədir. Yeni layihənin başlanması həm “Əsrin müqaviləsi”nin 25-ci ildönümünə təsadüf edir, həm də yeni mənbələrdən hasilatın artacağını təmin edəcəkdir.

Ümumilikdə neft-qaz sahəsində həyata keçirilmiş işlərin nəticəsidir ki, bu gün əldə olunan gəlir qorunur və düzgün idarə olunmaqla inkişafda olan iqtisadiyyatımızın, sənayemizin tələbləri ödənilir, infrastruktur layihələri icra edilir və insanların rifahı yaxşılaşdırılır”, - deyə deputat vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.