İDMAN


Azərbaycan çempionatının ikinci mərhələsinin qalibləri müəyyənləşib

Bakı, 7 oktyabr, AZƏRTAC

Gənclər və İdman Nazirliyi və Azərbaycan Velosiped Federasiyasının təşkilatçılığı ilə Gəncə şəhərində keçirilən çoxgünlük ötüşmələr üzrə ölkə çempionatının ikinci mərhələsinin qalibləri müəyyənləşib.

AZƏRTAC xəbər verir ki, oktyabrın 7-də keçirilən ikinci mərhələdə idmançılar şose velosipedinin qrup ötüşməsi növündə mübarizə aparıblar.

Bütün yaş kateqoriyalarında velosipedçilərin iştirak etdiyi yarışa Gəncə şəhərindəki Heydər Əliyev Parkının önündən start verilib. Ümumilikdə 39 peşəkar və 9 həvəskar velosipedçinin qatıldığı bu mərhələdə qadınlar 42 kilometr, kişilər isə 62 kilometr məsafə qət edərək Göygöl Milli Parkında finişə çatıblar.

Qeyd edək ki, Göygöl Milli Parkı zonasında ilk dəfədir belə böyük və möhtəşəm idman tədbiri keçirilib. Bu yarış yerli əhalinin də böyük marağına səbəb olub.

İkinci mərhələnin nəticələrinə əsasən, qadınlar arasında mübarizədə Radha Şabanova bütün rəqiblərini qabaqlayaraq birinci, onun ən yaxın izləyicisi Viktoriya Sidorenko ikinci, İradə Əbdürəhmanova isə üçüncü yerdə qərarlaşıb.

Kişilər arasında yarışda isə Elçin Əsədov qızıl, Musa Mikayılzadə gümüş, Kamran Mirzəxanov bürünc medal qazanıb.

Qeyd edək ki, oktyabrın 8-də Azərbaycan çempionatının üçüncü mərhələsində təşkil ediləcək dairəvi yarışa şəhər meydanından start veriləcək. Yarışda qadın idmançılar 40 kilometr (10 dairə), kişi velosipedçilər isə 64 kilometr (16 dairə) məsafədə mübarizə aparacaqlar.

Dördüncü mərhələdə (oktyabrın 9-da) Bakı - Ələt - Qazax - Gürcüstan yolundan R-19 istiqamətinə start götürməklə həm qadın, həm də kişi velosipedçilər 10 kilometr məsafədə fərdi ötüşmə növündə güclərini sınayacaqlar.

Xatırladaq ki, Beynəlxalq Velosipedçilər İttifaqının mövcud qaydalarına əsasən keçirilən dörd mərhələli Azərbaycan çempionatının birinci mərhələsində idmançılar dairəvi yarışda mübarizə aparıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.