Budapeşt, 7 may (AZƏRTAC). Rusiyalı siyasi ekspert Sergey Markedonov Macarıstan Xarici İşlər Nazirliyinin nəzdində fəaliyyət göstərən Beynəlxalq Əlaqələr İnstitutunda “Rusiyanın Cənubi Qafqaz ölkələrinə dair xarici siyasəti” mövzusunda məruzə ilə çıxış etmişdir.

Çıxışı zamanı Cənubi Qafqazla bərabər Şimali Qafqazdan da danışan Sergey Markedonov cənubda etnik münaqişələrin, şimalda isə terrorçu qruplaşmaların olduğunu və rəsmi Moskvanın region siyasətini məhz bu iki amil əsasında müəyyənləşdirdiyini bildirmişdir. Rusiyanın Cənubi Qafqaz ölkələrinin hər biri ilə münasibətlərinə toxunan ekspert Ermənistanın Rusiyanın müttəfiqi, Azərbaycanın isə tərəfdaşı olduğunu və bunların fərqinin daim nəzərə alınmasının vacibliyini qeyd etmişdir. Ermənistanın Rusiyanın Azərbaycan və Türkiyə ilə tərəfdaşlıq etməsindən narazı qalmasını iki müttəfiq arasındakı problem olduğunu qeyd edən S.Markedonov ermənilərin Azərbaycanın müstəqil mövqe formalaşdırmasının qarşısını almaq üçün Qərb ilə əməkdaşlıqda da maraqlı olduğunu söyləmişdir. Son dövrlərdə Rusiya ilə Gürcüstan arasında yaxınlaşmanın müşahidə edildiyini, bunun hər iki dövlətin marağına uyğun olduğunu deyən ekspert Rusiyanın Azərbaycan və Türkiyənin regionda iqtisadi monopoliyasının qarşısını almaq niyyətində olduğunu söyləmişdir.

S.Markedonov Gürcüstan və Ermənistandan fərqli olaraq Azərbaycanın Qərb ilə Rusiya arasında daha balanslaşdırılmış siyasət yürütdüyünü, Azərbaycanın Dağıstan ilə 200 kilometrə qədər sərhədinin, hər iki ölkənin Xəzər dənizində ümumi maraqlarının olduğunu və Rusiyanın Ermənistanın narazı qalmasına baxmayaraq, Azərbaycana silah satışını davam etdirdiyini demişdir.

Ekspert Rusiyanın həm müttəfiqini, həm də tərəfdaşını narazı salmamaq üçün Ermənistan-Azərbaycan, Dağlıq Qarabağ münaqişəsi ilə bağlı status-kvonun saxlanılmasında maraqlı olduğunu diqqətə çatdırmışdır.

Məruzə başa çatandan sonra Azərbaycanın Macarıstandakı səfirliyinin III katibi Süleyman Rüstəmov ekspertin çıxışında qeyd etdiyi “bütün dövlətlər terrorizmə qarşı əlaqəli şəkildə mübarizə aparmalıdır və hər bir terror təşkilatı bütün ölkələr üçün real təhlükədir” fikrinə istinad edərək, Azərbaycanın işğal edilmiş və hazırda nəzarətsiz qalmış Dağlıq Qarabağ ərazilərində terror qruplaşmalarının fəaliyyət göstərdiyini, status-kvonun saxlanmasının yolverilməz olduğunu, beynəlxalq hüququn əsas prinsiplərindən olan ərazi bütövlüyünün pozulması məsələsinə göz yumulduğunu, Azərbaycanın 1 milyondan artıq qaçqın və məcburi köçkününün hüquqlarının nəzərə alınmadığını, bunun ümumbəşəri humanizm və ədalət prinsiplərinə zidd olduğunu məruzəçinin diqqətinə çatdırmışdır.

Diplomatın xatırlatması və ölkəmiz barədə söylənilən fikirlərə şərh verməsini istəməsi Dağlıq Qarabağa səfərinə görə Azərbaycan tərəfindən adı “Qara siyahıya” daxil edilmiş rusiyalı eksperti əsəbiləşdirmiş və o, onda bu barədə məlumatların olmadığını söyləmişdir.

Səfirlik əməkdaşının təkidini görən macar moderator tədbirin sona çatdığını elan etmişdir.

Pərvanə Qarayeva

AZƏRTAC-ın xüsusi müxbiri

Budapeşt