CƏMİYYƏT


Azərbaycan əsgəri, zəfər sənindir!

Bakı, 17 oktyabr, AZƏRTAC

Məlum olduğu kimi, sentyabrın 27-dən etibarən Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutmağa başlayıb. Buna cavab olaraq Azərbaycan Ordusunun komandanlığı tərəfindən düşmənin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə qoşunlarımızın bütün cəbhəboyu əks-hücum əməliyyatına başlaması barədə qərar qəbul olunub.

Artıq iki həftədən çoxdur ki, Ordumuz dayanmadan irəliləyir, rəşadətlə düşmənin silahlı qüvvələrinin atəş nöqtələrini susdurur və döyüş fəaliyyətinin qarşısını alır. Baş verən hadisələr fonunda 30 ildir torpağının 20 faizi işğalda olan Azərbaycan xalqının hamısı bir nəfər kimi düşmənlə döyüşmək üçün Ali Baş Komandanın əmrini gözləyir. Dövlət başçısı düşmənin təxribatından sonra xalqa müraciətində deyildiyi kimi: “Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!”.

AZƏRTAC xəbər verir ki, bu sözlər Mədəniyyət Nazirliyi Mədəniyyətşünaslıq üzrə Elmi-Metodiki və İxtisasartırma Mərkəzinin sektor müdiri Aydın Tağıyevin “Azərbaycan əsgəri, zəfər sənindir!” hazırladığı yazıda yer alıb. Yazını təqdim edir.

Bir sıra beynəlxalq təşkilatlar atəşkəsin pozulmasından narahatlığını ifadə edir və tərəfləri sülhə səsləyir. BMT-nin Baş katibi Antoniu Quterreş rəsmi Bakı və İrəvanı döyüşləri dərhal dayandırmağa, gərginliyi azaltmağa və danışıqları bərpa etməyə çağırıb. Hamımız yaxşı bilirik ki, BMT Təhlükəsizlik Şurasının Dağlıq Qarabağ münaqişəsi ilə bağlı qəbul edilmiş dörd qətnaməsi var. Həmin qətnamələrdə deyilir ki, erməni silahlı qüvvələri dərhal, tam və qeyd-şərtsiz işğal edilmiş torpaqlardan çıxarılmalıdır. Otuz ilə yaxındır ki, bu qətnamələr kağız üzərində qalır. Otuz ilə yaxındır ki, Minsk qrupu çərçivəsində danışıqlar aparılır və bunun sonunda Ermənistan müntəzəm olaraq hərbi təxribatlar törətməklə danışıqlar prosesini iflic vəziyyətə salıbdır. İndi bizdən döyüşləri dayandırmamızı istəyən BMT Təhlükəsizlik Şurasına belə bir sual yaranır: Bəs, Ermənistan-Azərbaycan Dağlıq Qarabağ münaqişəsi ilə bağlı qəbul etdiyiniz 4 qətnamənin şərtlərinin yerinə yetirilməsini 27 ildir ki, hansı səbəbdən təcavüzkar Ermənistan dövlətindən tələb etmirdiniz?

Bizim üçün hərbi əməliyyatlar yalnız o zaman dayana bilər ki, düşmən təslim olsun və işğalda saxladığı ərazilərdən çıxsın. Əks təqdirdə, şanlı Azərbaycan Ordusu bütün işğal altında olan əraziləri silah gücünə azad edəcək!

Beynəlxalq təşkilat anlamalı idi ki, status-kvo uzun müddət qala bilməz. İndi Azərbaycan, işğalda olan torpaqlarını azad etmək üçün heç bir beynəlxalq hüquq normalarını pozmadan öz müqəddəratını özü həll edir. Eyni zamanda bu təşkilatlar və erməniləri dəstəkləyən bütün qüvvələr anlamalıdır ki, Prezident İlham Əliyevin də vurğuladığı kimi, Azərbaycan müharibə etmir, sadəcə işğal altında olan ata-baba yurdu Dağlıq Qarabağı və ətraf rayonları terrorçu ölkədən təmizləmək üçün antiterror əməliyyatlarına başlayıb.

“Bir ovuc torpaq da Vətəndir” - bu deyim əbəs yerə deyilməyib və ovuc içi qədər torpağı Vətən sayanlar bu gün Azərbaycana öz dəstəklərini əsirgəmirlər. Hər zaman olduğu kimi ölkəmizə ən böyük dəstək qardaş Türkiyədən gəldi. İstər Türkiyə rəsmiləri, istərsə də sadə vətəndaşları haqq mübarizəmizdə yanımızda olduqlarını dəfələrlə bəyan ediblər.

Ən böyük dəstək mesajını Türkiyə Prezidenti Rəcəb Tayyib Ərdoğan İstanbulda Beynəlxalq Dəniz Qanunu və Şərqi Aralıq dənizi Simpoziumunda çıxışı zamanı bildirib. Çıxışda deyilir: “Minsk qrupu həmsədrləri kimdirlər ki, soruşurlar ki, Türkiyə ordadırmı? Türkiyə Azərbaycana silah yardımı edirmi? Bu insanlar o insanlardır ki, Türkiyənin şərqinə minlərlə tır silah daşıyırlar. Bu insanlar 30 ildir problemi həll etmək bir yana, həll edilməməsi üçün əllərindən gələni edirdilər. İndi durub ağıl verirlər. Qardaşım İlham Əliyev 30 ildir onlara hesab verir, kömək edən idilərsə, həmin vaxt edərdilər. İndi Azərbaycan öz müqəddəratını özü həll edir”. Bu haqlı çıxış nəinki Minsk qrupu, eləcə də bütün dünya üçün ismarıc olsun.

Türkiyə Xarici İşlər naziri Mövlud Çavuşoğlu ermənilərin cəbhədəki təxribatlarından danışarkən Türkiyənin ölkəmizin yanında olduğunu bir daha bəyan edib: “Bu dəfə onlar cavablarını döyüş meydanında almaqdadırlar. Can Azərbaycan ilə döyüş meydanında və danışıqlar masasında birlikdəyik”.

Ermənistanın terrorçuluq fəaliyyətini pisləyən və Azərbaycana tam dəstək verən ölkələrdən biri də Pakistandır. Belə ki, Pakistan Xarici İşlər Nazirliyi törədilən təxribatlarla bağlı bəyanat yayıb və bildirib ki, Pakistan qardaş Azərbaycan xalqının yanındadır və onun ərazi bütövlüyünü dəstəkləyir.

Azərbaycana öz dəstəyini nümayiş etdirən ölkələrdən biri də Ukraynadır. Belə ki, Ukrayna XİN rəhbəri cəbhədəki vəziyyəti azərbaycanlı həmkarı ilə müzakirə edib. Bildirilib ki, Ukrayna beynəlxalq səviyyədə tanınmış sərhədləri daxilində Azərbaycanın suverenliyini və ərazi bütövlüyünü dəstəkləyir.

Dağlıq Qarabağı və ətraf 7 rayonumuzu işğal edərək azərbaycanlıları qətlə yetirən, onları ata-baba yurdlarından didərgin salan ermənilər indi qüdrətli Azərbaycan Ordusunun gücündən qorxub geri qaçırlar. Artıq haqq sözünü deyir, bax beləcə ya geri çəkiləcək, ya da sonuncu nəfərinizə kimi öləcəksiniz! Günlərdir Azərbaycan Ordusunun haqq mübarizəsindəki qələbə xəbərləri gəldikcə düşmənin canına vəlvələ düşür. Artıq o vəziyyətdir ki, Ermənistan rəhbərliyi öz xalqına yalanlar söyləyir, öz məğlubiyyətini gizlətməyə çalışır. Bununla da erməni əhalisi arasında hökm sürən təşvişi, qorxunu və ordularındakı yaranmış xaosu bir qədər azaltmağa çalışır.

Ordumuz irəlilədikcə, xoş xəbərlər gəldikcə insanlarda olan inam daha da artır. Çünki hər kəs anlayır ki, Vətən bizə yox, biz Vətənə borcluyuq! Əbəs yerə deyilməyib ki, bayraqları bayraq edən üstündəki qandır, torpaq uğrunda ölən varsa Vətəndir!

Rəşadətli Azərbaycan Ordusu, səsin daim “qələbə bizimlədir” sözləri ilə gəlsin! Həsrətlə yolumuzu gözləyən Şuşamızla, Kəlbəcərimizlə, Laçınımızla sevindir bizi. Bu günü tariximizə ən sevincli günümüz kimi yazaq. Biz Azərbaycan xalqı olaraq Ordumuza inanırıq! İnanırıq ki, igid oğullarımızın bizə zəfər xəbərləri gətirəcəyi günlər uzaqda deyil. Marş irəli, Azərbaycan əsgəri!

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.