REGİONLAR
Azərbaycan gəncliyi ictimai həyatın bütün sferalarında aktiv fəaliyyəti ilə seçilir
Bakı, 2 fevral, AZƏRTAC
Azərbaycan gəncliyi ictimai həyatın bütün sferalarında aktiv fəaliyyəti ilə seçilir.
SOCAR-ın mətbuat xidmətindən AZƏRTAC-a bildirilib ki, bu fikirlər “Azərikimya” İstehsalat Birliyində (İB) 2 fevral - Gənclər Gününə həsr olunmuş tədbirdə səsləndirilib.
Tədbirdən öncə kimyaçı gənclər ulu öndər Heydər Əliyevin adını daşıyan parkda Ümummilli Liderin abidəsini ziyarət edib, abidə önünə gül dəstələri düzüblər. Gənclər həmçinin yeni istifadəyə verilmiş Heydər Əliyev Mərkəzi ilə də tanış olublar.
“Azərikimya” İB-də keçirilmiş tədbirdə çıxış edənlər bildiriblər ki, ulu öndər Heydər Əliyev tərəfindən 1997-ci il fevralın 1-də imzalanmış Sərəncama əsasən hər il fevralın 2-si Azərbaycan gənclərinin bayramı kimi təntənəli şəkildə qeyd olunur. Bu gün Azərbaycan gəncliyi ictimai həyatın bütün sferalarında aktiv fəaliyyəti ilə seçilir, siyasi, iqtisadi, humanitar, sosial tədbirlərin həyata keçirilməsində mühüm rol oynamaqla bərabər, dövlət orqanlarında, parlamentdə, bələdiyyələrdə, biznes strukturlarında və digər sahələrdə təmsil olunaraq, cəmiyyətin inkişafına öz töhfələrini verirlər.
Natiqlər vurğulayıblar ki, Prezident İlham Əliyev tərəfindən həyata keçirilən gənclər siyasəti gənc nəslin hərtərəfli inkişafının təmin olunması üçün siyasi, sosial-iqtisadi, təşkilati-hüquqi şərait və təminatların yaradılmasını sürətləndirib, onların ictimai-siyasi fəallığının artmasına kömək edib.
Tədbirin sonunda Etilen-polietilen zavodunun 5, Təmir-tikinti İdarəsinin 3 və İdarəetmə Aparatının 2 əməkdaşı olmaqla 10 nəfər gəncə Fəxri Fərman və pul mükafatları təqdim olunub.